Zawhna: Ka pu, tlangval kum 34 mi ka ni a, thau lampang. Ka dulah leh ka taksa hmun hrang hrangah hian bawk te reuh te te a awm thliah thliah mai a. Kum 5 kalta vel khan ka entir a,  Doctor in thau satliah a nih hi an ti mai a. Zu ka in regular deuh hian a bawk hi a zual deuh a, ka in loh chuan a te leh deuh thin a, enge a chhan ni ang le? Khawngaihin.  -  Reuben, Vaivakawn

Chhanna: Taksa ah hian bawk chi hrang hrang a awm thei a. A rawn intanna a zir hian a hming pawh an thliar hrang a. Entirnan, thau hlawm atanga insiam anih chuan “lipoma” an ti a, thazam (nerve) atanga insiam anih chuan “Neuroma” an ti leh a, tha emaw tisa taksa peng zawmtu atanga intan anih chuan “Fibroma” an ti leh bawk. A hranpa in an awm thei a, a inpawlh te pawhin an awm thei (entirnan Neurofibromatosis). Heng bakah hian arngeng a hnai chhuak lova in up kan tih mai, Sebaceous Cyst te pawh a awm thei bawk.

Heng a chunga kan sawi te hi bawk hlauhawm (cancerous) ani lova, mahse a ninawm fo thin thung. Lipoma bik hi thau lutuk (overweight) ah te a awm duh viau. I rawn sawi hi Lipoma chi khat anih duh hmel viau mai; zu in regu bikah hian a thang duh bik te a awm a, chutiang chu multiple symmetric lipomatosis  (Madelung’s Disease) an ti a. Hetiang hi i lo nei te pawh ani thei. Bawk hlauhawm chu a ni lo nang a, mahse a ninawm duh phian. Neurofibromatosis an tih phei hi chu taksa peng hrang hrangah a awm a, paih fai theih a ni lova, a thang zel a, hmai hmel leh taksa peng te a ti mawi lo fo thin.

Taksa a bawk awm, han khawih a feel theih chi ho hi chu a tlangpuiin a hlauhawm lem lova, han hrual vela na a awm loh a, a than loh phei chuan hlauhawm angah kan ngai lem lo. A awmna lai vun rawng a lo danglam a, a thang a, na emaw nuam lo a thlen erawh chuan entir vat a pawimawh thung. Khawi atanga rawn insiam nge tih hriat nan hip chhuah (FNAC tia kan hriat – hriau a hip a, exam) te a tul thin. Doctor entu thutlukna siam tur a ni a, entir a pawimawh tihna a ni.

Heng bawk kan sawi chi hrang hrang te hi na emaw awm nuam lo a thlen loh chuan enkawl a tul hran lova. A then chu a reh ve leh mai thin a, mahse a awm reng a, a than erawh chuan paih te pawh a tul thei. Lipoma bik hi lian deuhva rawn thang a awm ve thei a, nunphung a tihbuai chuan paih tir mai a tha. Nangmah bikah chuan zu i in vanga a rawn zual thin vang hian Surgeon Doctor lo entir ve thei la chu a tha viau mai.