Kar kal ta Ningani kha khawvel pum huapa ni ni bik, World Environment Day a ni a, Aizawlah pawh hemi pual hian Minister-hoin hun hman a ni a. Environment han tih hian a huam zau hle a, khawvela awm zawng zawng hi a huap vek a, leilung, tui, boruak, nungcha te leh thing leh maute hi environment-ah chuan an tel vek a ni, tun hma sikul zirlaibua ‘Min Hualveltu’ tih khan a awmzia hi a phawk chhuak tha viau awm asin. Kum 40 vel kal ta atang khan kan chenna khawvel venhim duhna hi a lo awm tan a, sumdawnna lama hmasawnna chak tak avangin science leh technology lamah pawh hmasawnna nasa tak a lo thleng a, khawl hmanga thil siam chhuah a pung thur thur a, chungte leh mihring pung chak zel avangin boruak a bawlhhlawh tial tial a; tui thianghlim a tlem hret hret a, sik leh sa inthlak hunbi a mumal hleithei ta lo a, khawvel vawng daitu chhim tawp leh hmar tawp bakah tlang sang pui puia tuan leh mang ata vur khang hlawmte an tui ral mek bawk a. Heng zawng zawng infawkkhawm hian harsatna a thlen nasat zel avangin environment siam that hna hi mut mawh hnar mawha neih a hun ta hle a ni. Ram hmasawnna a chak poh leh environment-in a tuar nasa a ni. Kawlphetha siam chhuahna atana tuikhuah avangin luipui luan dan a inthlak danglam a, mamawh chakkhai a tam zel avangin ramngaw a chereu tial tial a, mihring thli leh bawlhhlawh paih avangin nungcha dangten an tawrh phah a, kan khawsak a nawm poh leh thing leh mau leh nungchaten an tuar nasa ting mai a ni. Nunna nei zawng zawngte hi inpeng tawn vek kan nih bakah nunna nei lo leilung, tui leh boruakte nen kan inkungkaih vek bawk. Tunlai khawvelah hian mihringte leh thil siam dangte kan inmamawh tawn dan hi kan ngaihtuah tawh lo zawk a, a bikin khawpuia chengte phei chuan lei lung rin chhana eizawng lo neitute leh ramngaw inkungkaih dan te, sik leh sa hunbi inthlakin an eizawnna a nghawng dan te, an tan a ni sa leh ruahsur pawimawhzia te kan hriatthiampui pha lo zawk ang. Mi thenkhatin tlangram lo neih hi ramngaw tichereutu berah an puh ngawt thin a. Sorkarin NLUP a kalpui chhan ber pawh hi tlangram lo neih bansan duh vang a ni nghe nghe. Mahse, thingtlang pa chuan forest department aiin ramngaw tichereu lo zawkah an inngai ve tlat thung. Ngun taka chhut pawhin a dikna lai a awm tlat. Thingtlang pa chuan a eizawnna nena inzawm tlat ramngaw hlutzia a hre chiang a, a chereu chuan a eizawnna a chhe vek dawn tih tuma hrilhfiah a ngai hran lo. Tunhma chuan ram tha lai zawng zawng hi vantlang ram vek a ni a, mi mal ram a awm meuh lo (Lalte lal lai phei chuan mimalin ram an nei lo a, khawtlang ta vek a ni zawk). Chutih hunlai chuan dai hnaiah ngaw tha tak an zuah thin a, lo neihna atan bak ngaw an vat lo a, thingtuah leh châk atan bak thing an kit mai mai lo bawk. Sorkar kuta kan ram a awm tak hnu, ramngaw leh nungcha humhalh thlenga department lamin thuneihna pumhlum an neih tak hnuah ramngaw a chereu nasa a, nungcha an rem zel nia mi thenkhatin an sawi hi ngaihtuah zui fe tham a ni reng a ni. Lehlam zawnga ngaihtuah chuan ramngaw siamna tura kum tina sorkar hmalakna kan hriat lar em em thingphun beihpui pawh hi tul lo a sum tam tak sen ral ang hialah a ngaih theih thawthang a ni. Sorkar thuchhuah a kan lo hmuh danin kum 1999 atanga 2013 thleng (kum 15 chhung) khan thing tiak 26,69,187 zet phun a ni tawh a, a tam khawp mai, hemi hma lama phunte nena belhkhawm phei chuan nuai 30 a tling hial maithei. Heti zat a tam thing kan lo phun tawhte kha puitling ta se la chuan Mizoram hi a ngaw khup tawh hial ang a, buaipui fe tham ram ngaw kan nei hrim hrim ang. Sum leh pai senso han chhut phei ila chuan a uihawm tham khawp ang. Kumin pawh hian thing tiak phun tur 9,37,115 lai dah hran a ni tawh bawk. Hengte han ngaihtuah hi chuan ramngaw siamna atana thingphun hi a sawngsawhlawt tehchiam lo tih hi a chiang reng a, sorkar hmalakna lian tak a nih avang hian tlawmngai pawlte leh zirna hmuna mite pawh hian an buaipui mai niin a lang. Mizoram hi kum tina monsoon (fur ruah) dawng tha tak kan ni a, ruahsur hun hi thla 8 vel lai a ni. Ruahtui a tlak that avang hian phun kher ngai loin thing a to thuai zel a, di hmun pawh hi a kan loh a, ran a tlat loh bawk chuan rei lo teah thingin a luahlan thuai mai. Hman deuh khan Phulpui khuaa kan kal tumin rambuai lai chuan Zawlpala thlan tlangchhip bawr vel chu phul vek a nih thu leh sipaiin ration thlakna atan an hman thin thu an sawi. Thingte chu kit se, tiphul leh se ka ti ang reng khawp mai. Chuvangin, ramngaw siamna atan hian thingphun beihpuithlak ai maha pawimawh chu ramkang ven hi niin ka ngai ve tlat. Kum tina ram kang venna (Fire prevention) leh thingphunna atana cheng nuai tam tak sen ral hi a uiawm a, corruption a nasa ti zawng pawhin a sawi theih awm e. Tun hnaia sorkar official-te thusawi kha tak tak a nih phei chuan thingtlang lo neih bansan an tam tawh hle a, kumin lo hal hun lai pawh khan kum dang aiin chhum a tlem a nih kha. Chuvangin, ram kang venna tura sum lo kalte hi dik taka hman ni sela, ram kan hun lai thla hnih chuang awrh chhung hian veng hneh ta phawt ila a hlawhtlinna rei loteah a lang ang. - Lalthlamuana Ralte