Zawhna: Ka Pu, kum 28 mi ka ni a, nau hi vawihnih ka chhiat tawh a, chhul thuah zelin. Ka chhiat atangin kum 3 a ni tawh a, ka la pai thei ta miah lo mai. Hmeichhe lam Doctor panga lai mai ka rawn tawh a, test ngai an tih ka test vek a, a tha vek e, harsatna kan hmu lo an ti zel bawk sia. Kan pa hi BP sang nei a ni a, meizial zuk leh dildar hi a ti thin a, amah lam hi a ni mai ang em?

Chhanna: Nau pai theih leh theih loh chungchangah hian kan hriat atana tha chu Pathian malsawmna liau liau a ni tih hi kan sawi hmasa duh a. Hmeichhia hrisel that hmel tak, khawsak kawngah pawh fa panga aia tam pawh nei se an chawm thei ngei ang tih hriat te hi fa nei thei lo an awm leh tlat thin a. Nu chawrche tak, hrisel loh hmel tak te hi  fa nei duah an awm leh fo bawk a. Nupa insawiselna nei miah lo, hrisel that hmel tak te hi fa nei thei lo an awm leh lawi bawk a. Chutiang chu kan nih avangin fa neih chungchangah chuan kan thu lo hle a ni tih hi ka han tarlang hmasa duh a ni.

Nau chhiat chhan hi chi hrang hrang a awm thei a, mithiamte sawi dan chuan 50% dawn lai hi nau insiam dik lo (genetic lam – extra or missing chromosome) a ni e an ti. Mahse inthlahchhawn fel lohna lam a tlem hle thung an ti bawk. Hmeichhe naupai hi an pai hun chhung hi pathum ah then a ni a – first, second leh third trimester an ti. First Trimester (Pai atanga thla thum chhung) a nau chhiat chhan tam ber chu a chunga kan sawi chromosomal causes hi a ni. Hei bakah hian hlam (placenta) insiam fuh lo vangin a awm thei bawk a, a hma lama nau lo chhiat tawh ah hian a risk a sang zual bawk.

Second leh Third Trimester (4-6 months) chhunga nau chhiat chhan hi zunthlum, thisen sang, kal tha lo, thyroid buai (hypo or hyper thyroidism), infection vang te a ni leh bawk a. Tin, chhul lam fel lo vang te in nau chhiat hi a thleng thei bawk a, intihpalh (tluksual, intauh etc) vang te in a awm ve thei bawk. Chuvangin nau chhiat tawh hi chu heng ang kan sawi te hi an neih leh neih loh check theih ni hlawm se – thisen test, BP check, ultrasound etc te hi tih ngei atana tha an ni.

Naupai theih loh chhanah hian zuk leh hmuam ti nasa te, zu in nasa ah te a awm duh viau a. Hmeichhe lam fel loh vang ngawt ni lovin mipa chi a chak tawk loh vang te in naupai thei lo hi an awm thin. Chuvangin mipa lam pawh sperm test tih ngei a tha a, chu bakah chuan Thin tha lo te, Kal tha lo nei ah te leh eng natna benvawn engemaw ber nei ah te a awm thei bawk a ni. Hmeichhe lamah hian chibawm lam fel lo – polycystic ovaries nei ah te naupai harsatna a thleng thei a, tin, endometriosis (chhul chhung bang tisa chhul pawn lama tai darh) nei ah te a awm duh bawk.

Engpawhnise, test i lo ti vek tawh tih i sawi a, ka han tarlan tak, a bikin – Blood sugar, Thyroid Function Test, Liver Function Test, Kidney Function Test leh Ultrasound te hi i ti vek tawh ang em a hriat loh a, la tih loh i neih chuan lo ti tha leh ta la. In pa pawh chutiang bawkin in check-up ve thei bawk se. Tin, chi kawng a lo phui palh thei a, chumi hriat nan chuan HSG X-Ray tih a tul thei bawk ang. In pahnih chuan heng te hi lo ti thei ta ula, a chhan a awm anih chuan a hriat chhuah theih ka beisei. Mahse sawi tak angin chhan hriat miah loh a nau pai thei lo hrim hrim hi an awm ve bawk ania.