Chhungkua han din a, nu leh pa dinhmuna han din chuan fa te ngaihtuah hi a lo na duh dawn khawp mai. An retheih kan hlau a, an rual awh bik kan hlau a, an nawmsak loh hlauin kan phe dawr dawr thin.

Kan fate mamawh apiang kan ngiahtuahsak a, an harsatnate kan sutkiansak zung zung hian an tan a tha ber em? Hetianga kan tih hian nu leh pa an hmangaih phah sawt em? An rilru a puitlin phah sawt em? Nge, an rilru kan tisawngnawi a, kutdawh rilru an put phah zawk?

Kan fate hian retheihna hi hmachhawn lo se, harsatna tawk lo se tih hi nu leh pa tam tak duh dan a ni mai thei. An retheih leh nawmsak loh hlauin kan thawk a, kan buai thin. Kawng lehlamah chuan harsatna tawk nasa apiang hi an chhel ting mai a, an puitling duh zawk niin a lang. Kan mi hmasate zingah harsa chung leh rethei bak berh chunga lehkha zir hram hram, bei tauh tauh, a tawpa officer lian tak ni ta hi sawi tur an tam khawp mai.

Mihring nun kawngah hian harsatna tawk lo lutuk leh nuam sa taka hun hmang thin te hi mi puitling tak an vang khawp mai. Thli na takin a nuai fona hmuna thing ding chuan zung a kai nghet ting mai a, a fip fap mai a, thli nazawngin a chhem thlu mai mai ngai lo. Harsatna leh retheihna tam tak lo paltlang tawh mihring chu a fip fap mai a, an tlo nge nge thin. Harsatna tawk ngai lo, nu leh pa te’n an mamawh tinreng an ngaihtuah sak, keh thei dawma an dawm te hi an no nghulh duh khawp mai. Harsatna chhe te nei se, “Depression ka nei” an ti a, an thu kun lup duh khawp nia.

Actor lar leh hausa Jackie Chan hian sum tam tak a nei a, fapa erawh pakhat, Jaycee Chan chauh a nei. Kum 2011, April-a Beijing khawpuia award hrang hrang an semnaah Jackie Chan chuan a sum zatve chu charity-a pek (donate) a tum thu te, a fapa tan sum hnutchhiah tam a tum loh thu te a sawi a. A fapa tana sum a hnutchhiah mang loh chungchang press-mite zawhna chu ti hian a chhang, “Mi puitling a nih chuan a rawn inngaihtuah ve mai ang chu. Mi puitling lo a nih chuan eng anga tam pawh hnutchhiah i la, a rawn dek ral mai mia tho ang,” a ti mai a ni.

Fanau enkawl kawngah heng te hi hria i la a va tha em:

1.Fate hriatah leh hmuh laiin nupa inhauh loh hram tum ila.

2. Fate hriatah an zirtirtute, sande sikula an hotute leh mi dang hrim hrim rel loh a tha, chutilozawng mi rel an ching zui ve hlauh dah ang e.

3. Fate hriatah mahni kawppui te rel leh an tlin lohna lai sawi chhuah loh hram tur. ‘I nu/i pa hmusit rawh’ tihna tluk a ni.

4. TV en fimkhur a tha. Inhauh tamna leh awka vina inbiak tamna serial film lehlin te hi naupangte en fo atan a tha lo. An tet lai atanga lehkha chhiar an ngainat theih nan an kum mil ang zela an chhiar êwm lehkhabu ngaihtuahsak thin a tha khawp mai.

5. A pawng a puia naupang vin leh hrawk hi chin loh tur, fate hneh loh entirna mai a ni.

6. Naupangte zuk leh hmuam laka an fihlim theih nan inchhungkhurah zuk leh hmuam that lohzia inhrilh fo tur a ni. Nu leh pa pawh entawn tlakin zuk leh hmuam lakah kan fihlim tur a ni.

7. Fate thian kawm tur thlan fimkhur a tul ta khawp mai. Chhungkaw nun tlabal tak leh zirtirna tha dawng mumal lo fate chu kawmtir loh mai a tha zawk.

8. Pain emaw, nuin emaw naupang a zilh lai leh thunun laiin mi dangin lo chhan a, an thlavang lo hauh loh tur.

9. I thinrim laiin naupang kutthlak lo hram turin fimkhur la, an sualna avanga an lakah thununna tiang i lek duh anih pawhin i thinrimna chu nghak dai hmasa thin ang che.

10. Fate hnena i lo tiam tawh chu tihlawhtling ngei ang che. Chutilozawng i faten nangmahah rinna an nghat lo mai ang.

11. Fate ngen apiang tihsak leh pek hi a tha ber lo. Chinese thufing chuan ‘I vawkpa leh i fapa chu an ngen apiang pe la, vawkpa thau tak i nei ang a, fapa sual tak i nei bawk ang’ a ti.

12. I faten pawisa an ngainat loh nan fimkhur la, an thil mamawhte chu nu leh pain leisak a, pek mai zawk tur a ni.

13. Mi zingah leh thiante bula an awm laiin i fa chu tizak ngai suh ang che. Zahna hian thuawihna aiin inrunluihna a thlen thin. Tin, mahni inrintawkna pawh an hloh phah der thei bawk.

14. Fate sualna hi zeppui loh tur, zeppui chuan sual lo emaw an inti mai ang. Chutihrualin, sawi zuah zuah erawh a tha ber chuang lo.

15. Naupangte chu an thiltih that lawmpui a, fak fo tur a ni. Fakna awka hian mihringah phurna leh thathona a thlen thin.

16. Naupang tihthaih hi a tha lo a, ramhuai leh thlahrang chanchin sawi ai chuan Bible-a mi huaisen chanchinte, Mizo pasaltha huaisen chanchinte hrilh a, huaisen tura fuih fo zawk tur a ni.

17. Naupangten rualelna rilru hrisel an neih theih nan mi tumruh leh hlawhtlingte chanchin sawipui thin tur. Ngaihsan tur dik an ngaihsan chuan chu chuan a tha lamin thui tak an nun a kaihhruai dawn a ni.

18. Nu leh pate hian kan fate kawmngeih kan tum tur a ni. Pawnlama biak nuam leh nelawm tak, inchhungkhurah erawh fate laka nelawm lo leh biak huphurh awm tak kan ni hlauh dah ang e.

19. Kan fate hian in chhung hi nuam an tiin an zalen tur a ni. Fate bengchheng leh ninhlei ngaitheilo nihloh tur. Pawn lama an lenchhuah ai chuan inchhunga an awm a, an ninhlei pawh a tha zawk.

20. Fate bulah Isua zahpui a awl hle. An rilru nem laia rinna kawngah kan kaihhruai loh chuan an rilru sak hunah camping leh crusade-a nawr luh an ngai mai ang.