Kan state-ah ngei Covid-19 vanga nunna chân kan awm ta. A lungchhiatthlak hle mai. Mitthi chhungte an lainatawm hle mai bawk. Ruang kil leh inbawihsawm pawh awm loin, mahni in luma ruang lak pawh awm loin thlanmualah an invui liam tawp mai a ni a, rilru a na duh ngawt ang. Mahse, kan hun tawnin a zir miau si lo.

He hri leng zet hi chu a huat awm ngawt mai. Eng chen nge min la chenchilh dawn lah a hriat der si lo. A invenna (vaccine) lah an la siam chhuak thei bawk si lo. Tuna kan tih theih awm chhun chu sawrkar thu awih a, theih ang tawka fimkhur a ni rih mai. Hri leng karah kum tawp kan lo hnaih leh ta viau mai a, thla leh mai hi Krismas thla a ni leh ta der mai. Leilung dan pangngaiin thla a sik leh ang a, khua a vawt leh hle ang. Tlang hri leng mai mai pawh thlasikah chuan a dam har kan ti thin a, kumin thlasik lo thleng tur chu Covid-19 vang hian a nghahhlelhawm lo hle mai. Kumin kum laihawl, thla hmasa mai thleng khan he natna hmuhchhuah tam zawk chu natna lang chhuak lo (asymptomatic) an ni deuh vek a, ZMC-ah emaw, district danga Covid Care Centre-ah emaw kar hnih khat an awm a, damin an lo chhuak zel mai. Kha vang khan he natna hi eng he huah kan ngai lo hman hial a nih kha.

Tunah erawh khaw awm dan a inthlak tan a, natna vei hmuhchhuahte pawh natna lang chhuak (symptomatic) an ni ta thluah mai. A hmaa kan zuam ang ngawt kha a ni ta lo tan riau mai. Sawi leh sawi hnu, thlasikin min hmuak chho ut mai bawk si a, lockdown tir lama kan fimkhur tluk zeta kan fimkhur a hun ta viau mai. Inkhaihdarh awlsamna, puipunna leh awmkhawmna ang chi chu kan pumpelh hram hram a tha a ni. He thlasik lo thleng tur hi fimkhur taka kan hmachhawn chuan inkaidarh lutuk loin kan paltlang thei mai ang. Pangngai taka he thlasik hi kan paltlang thei a nih chuan nakum lamah chuan a invenna (vaccine) pawh an hmuchhuak mial tawh mahna. Donald Trump phei chuan a campaign speech-ah tun atanga kar hnih khat velah vaccine sem chhuah theih a beisei thute pawh a sawi kha maw le.

Tunlai khawvelah media a chak tawh a, mi tin deuhthawin smart phone kan hum tawh bawk a, he hri chungchang, inkaichhawn dan leh fimkhur dan turte chu kan hre bel ta viau mai. Kan tih theih leh kan tih tur awmchhun chu kan thil hriatte a taka nunpui a ni ta ber mai. He hri kai lo tura kan fimkhur piah lamah he hri do hneh tura kan theih ang tawka kan taksa kan tihchak a, zan kan mut that a, exercise tha taka kan lak pawh a pawimawh khawp ang. Kan fimkhur hle chung pawhin kan kai palh thei tho a, chu erawh sawi theih a ni hauh lo. Kan fimkhur loh vanga kan kai a nih chuan sawrkar leh khawtlang hruaitu, VLTF/LLTF-te dem loin keimahni kan indem tur a ni bawk ang.

Tin, ram changkang leh hmanrua (health care facilities) nei tha zawkte pawh an fimkhur chuan keini chu nasa lehzuala fimkhur tur kan ni hrim hrim. Hma kan sawn ve deuh tak vangte pawh a ni mahna, natna benvawn - zunthlum, thisen sang, kal tha lo leh thawhah (asthma) te kan tam viau mai a, heti chung hian zuk leh hmuam lah chu kan la duh phian mai bawk si. He Covid-19 hian hetiang natna benvawn neite hi a zuam bik an ti leh nghal a, kan fimkhur a hun chho ta viau mai.

Tin, fimkhur tur leh inkhuahkhirh tur hian sawrkar phut chiam emaw, sawrkar kar chiam emaw chi pawh a ni lo mai thei. Mizoram sawrkar hian he hri leng do kawngah kher hi chuan theihtawp a chhuah ni pawhin a lang a, hri leng do kawnga thawktute inpekna leh thawhrimna hi a fakawm khawp mai. Health department lama thawktuten rim takin thawk mah se mipui kan fimkhur loh chuan an thawhrimnate hi a thlawn mai dawn a; chuvangin, mi tinte theih ang tawka kan fimkhur hian sawrkar kan tawiawm tha tihna a ni a, khua leh tui tha kan ni bawk ang.

Thil buaithlak tak chu Mizote chu hnam inpawh, thenawm khawveng inlen pawh tel tel thin kan ni a. Mi mitmei veng chi leh mi hmaizah tina chi kan lo ni bawk nen, mi lo leng tur ‘lo leng suh u’ in tih ngawt chi lah ni si lo. Fimkhur dan inchen lo leh hlauh dan inrualkhai lo hi a buaithlak lai chu a ni. Tin, mi sawisep nih te, mi rel nih te kan hlau em em mai bawk a, venthawn kan ngah luatah mi tam tak chu fimkhur kan duh ang pawhin kan fimkhur ngam thathum lo niin a lang. Mahse, a theih hram chuan tun thla hnih thum chhung na na na chu fimkhur hram ila, hrehawm deuh mah se i tuar hram hram teh ang u. Miten fimkhur uchuak min lo ti deuh a nih pawhin kan him phahna a nih dawn chuan chu tluka hlu chu a awm chuang lo ve.