Chawlhni hmasa, ni 19-1-2020 a KA HUANG chhuakah khan Mizo pi leh puten Khristian an nih hma, hapta kar an chhiar dan ka hmaih hlauh mai a, hei ka rawn thual e: (Sunday to Suturday) Vawiin, Naktuk, Naktip, Nakthai, Nakthian, Nakkun, Nakdak tiin. Hman ni khan tuin emaw Lamsuala an khai hlum dan min zawt thut mai a.

Kum 1929-a piang ni mah ila, kei hi chuan ka hre phak ve lo. Ka nu min hrilh danin Lamsuaka khan Paihte sumdawng a that a, chuvanga khai hlum an ni awm e. An khai hlumna hmun pawh Aizawl Jail bul velah khian a ni awm e. Min zawttu min zawhna tak chu khawii group-ah emaw an khai hlum dan a ni awm a, thenkhatin hruizenin an ti a, a thenin Nghakuai ang thirzum an ti a ni awm e. Ka hriat ve dan chuan hruizenin a nghawngah an hling a, a dinna kha an phet a, chutiang chu a ni awm e. A thuhrimah nghakhuai anga inkhai hlum hi ka la hre ve ngai lo. Thenkhat chuan an thih nghal loh chuan Nawn a thiang lote an ti a, ka hriat ve dan chuan a nghawngah a thih thlengin tih a ni mai.

Aw le, thu dang aw... Ka sangha man hmasak ber chu Tunzên kiu chen zuk nia. Lui kal (zan len dente hi ka hrat khawp a), ka tet deuh laiin ka u-in Tlawng (Reiek kai)-ah min hruai a, kai kan thlen chuan kan chawl hret a, chhak lama Serlui khawhthlain Tlawng a finna lai chu, ka ninhleiin, “Ka han deng teh ang,” tiin ka tlan chho a, chhun lai a ni vel ang, thiam leh thiam loin len chu ka han deng ve ngawt mai a, Nghatun (tunzên) kiu chen zet mai hi ka khuh hlauh mai a, a tal ta buan buan mai a, ka chhuah mai ka hlauh avangin ka u, kai vela min lo nghak chu ka au tuar tuar mai a. A hla deuh bawk sia, a hre mai thei si lo, lungpui sang deuhah ka chuang a, ka te teng tung mai a. A tawpa tawpah chuan min rawn hmu ta a, ka awm danah avang chuan a lo pawng tlan chhoh ve ngawt a, ka sangha man a hmuh chu awlsam takin a zuk man ta mai a ni. Kha... keimah chauh chu ni ila, ka chhuah daih mai thei a ni!

Tlawnga zan len den kha ka hrat khawp a, tum khat chu Inrinni hian Suardarh thlangah Tuipuisatang an tih hi ka hmu ve. Aligator te tak te, Tangkawng lianpui ang hi ni berin ka hria. Nghawng emaw, kiu ralkai emaw te chu a ni ngei ang. Chubak chu Tuipuisatang ka hmu ta ngai lo reng reng.

Len sina tum khata sangha ka khuh (man) tam ber chu pialtlepa Nghalim tla khawm hi Tlabung len sinin ka zuk khuh a, 200 a tling thelh a ni. Upain sangha man lai hian ngaihzawngte pawh kan hre chang lo an tih thin hi a dik awm ngawt mai.

Tum khat phei chu rultuhain ka ke vei lam phah chungah mi chuk a; mahse, ka len den ka thulh chuang lo, hrat tak ka ni.