9/11 laia Delta 15 flight attendant ziah lehlin a ni.

September 11, 2001 ah chuan Frankfurt, Germany kan thlawh chhuah san atangin darkar 5 zet a liam tawh a, north Atlantic tuipui chungah kan thlawk mek a ni. 

Vawi leh khatah parda rawn inhawngin, cockpit a captain va hmu thuai tura tih ka ni. 

Ka va luh ruala ka hmuh chu, pilot leh midangte chu engemaw takin an rilru a kap tih ka hre thei. Captain chuan message lehkhaa inziak hi min lo pe a. Delta Office pui, Atlanta atanga rawn thawn niin, 'USA ram chung lam boruak chu passenger phur thlawhtheihna zawng zawng tan khar vek rih a ni. A rang thei ang berin tum theihna hnai berah tum tura hriattir in ni a, remchang rawn dap thuai ang che u' tih a lo inziak a. 

Tumahin engnge thil awmzia tih an sawi lo. Thil tha lo tak a thleng mek a ni tih kan hriat theuh avangin tum theih na tur hmun kan zawn vat vat a tul a ni. Pilot chuan tum theihna hnaivai ber chu kan thlawh san tak km 400 a hla, Gander, Newfoundland, Canada-ah a nih thu a sawi. 

Canada air traffic control be pawpin, let leh a tum phalna a dil nghal a, ihe lovin an lo remti nghal bawk, zawhna an zawt miah lo. Engvanga zawhna zawt buai lova tum phal sak nghal nge kan nih tih pawh a hnu lamah kan hre zui bawk. 

Pilot ten tum tura thlawhtheihna an khalh kual vel lai chuan, message dang lo thleng lehin, New York chheh-vela terrorist te an chet thu a lo ni a. A hnu rei loteah terrorist ten thlawhna an hijack thu kan hre zui bawk. 

Kan tum hma deuhin passenger te hnena dawt hrilh rih mai kan rawt a. Kan thlawhtheihna khawl lamah thil fel lo chhete a awm avangin airport hnai ber, Gander, Newfoundland a tum a, enfiah a tul tiin kan puang ta a. 

Thlawhtheihna kan hun rem fel hnu chuan Captain-in thu a rawn puang a, 'Nula leh tlangvalte u, heng thlawhtheihna dang 20 zet te hian, keimahni ang bawka khawl lam fel lohna an nei vek lo, kan tumna chhan tak chu thil dang vang zawk a ni. 

A hnu darkar engemawti a Gander airport a thlawhtheihna tum zawng zawng chu 53 zet kan ni a, 27 te chu USA passenger phur thlawhtheihna kan ni. 

Chutih lai chuan thlawhtheihna radio atangin terrorist ten World Trade Centre an sut bakah Pentagon pawh beih a nih thu a vawi khat nan kan hre ta a. 

A hma lamah khan, a indawtin thlawhtheihna pakhat zel a passenger te chu chhuah tur a nih thu min hrilh a, tlai dar 6 bawrah chuan kan chhuah ve hun tur chu a tuk chawhma dar 11:00 daih a nih thu an rawn puang zui bawk. 

Gander thuneitute chuan, a tul anga damdawi lam, tui in tur leh inthiarna lam min ngaih-tuah sak tur thu an sawi. An sawi ang ngeiin an ti bawk.

Vanneihthlak takin damdawia enkawl ngai kan awm lo hlauh. Nu raipuar,  kar 33 a upa naupai erawh kan nei a, kan ngaihven tha hle. Mutna a nuam vak lo chungin zan chu kan hmang ral ve ta a. Ni 12, zing dar 10:30 bawrah chuan school bus rawn inzui diah diah hi kan hmu a, thlawhtheihna atanga chhuakin terminal building-ah kan lut a, immigration leh custom lamah kan in report a, Red cross-ah kan inziak lut bawk. 

Chumi hnuah chuan, keini thlawhtheihnaa thawk/ crew hote chu motor hrana min hruaiin, hotel te fel deuhah min dah ta hlawm a. 

Kan passenger te kha khawi lamah nge an kal ve tak reng kan hre lo. Red cross thuneitute atanga kan hriat danin Gander khua leh a chheh velah hian mihring 10400 vel an cheng mek a, chutih laiin an mikhual tur thlawhtheihna hrang hrang passenger te chu mi 10500 zet kan ni thung! 

Hotel-a chawl hahdam turin min ti a, US airport te hawn a nih leh veleh min hriattir tur thu min hrilh bawk, rang tak erawh a nih a beiseiawm lo. 

Nikhat liam hnuah terrorist te chet dan chu hotel-a TV kan en atangin kan hre mumal ve ta chauh nghe nghe. 

Ni hnih hnuah chuan Gander airport lama let leh tura hriattirna kan dawng ta a. Thlawhtheihnaah chuan kan passenger te nen kan han inhmukhawm leh ta tham tham a, ni 2 chhunga an hun hman dan te pawh kan hre ta hlawm a. 

Kan thil hriat chu a ropui danglam khawp mai- 

Gander khua leh a chhehvel km 75 bial chhunga school, hall leh punkhawmna In remchang zawng zawng chu an tiruak vek a, keini ho passenger te awmna turin an buatsaih vek mai a lo ni. 

A thenin mut puan, zampher, sleeping bag leh lukham te an thawh a. 

High school zirlai zawng zawngte chu passenger hote buaipui turin an lo in volunteer vek bawk. 

Kan passenger pakhat raipuar kha in la hria em? Darkar 24 chhunga pan theih Damdawi in bul lawkah thlen tir a ni. 

Phone leh e mail hmang duh te tan nikhatah vawi 1 zel hman theihin ruahmanna an siam a. 

Chhun lamah chuan passenger te chu vahkualna hun siam sak thin an ni. 

Chhung tinin an rawngbawl sa chu high school-ah chuan an rawn keng khawm thin a. A then hotel-a ei duh zawk chu an hruai a, chaw tui tak tak an lo hlui thin. Thlawhtheihnaah an thawmhnaw hak thlak a awm vek avangin, lehkha them sem theuhin a mamawh te tan thawmhnaw sukna an ruahman sak bawk. 

Passenger te thlawhtheihnaa an rawn phurh let leh fel chuan, tuipuia nuamtawlna lawnga zin ho ang mai an ni. Hmingin an inko thei vek a, an cham chhunga an hun hman dan te an inhrilh tawn a, tunge hun hmang nuam zawk ti niawmin an titi laih laih a. 

Atlanta pana kan han thlawk chhuak leh chiah chu thawhtheihna hire-a duh ang anga awm a, hlimhlawpa chuang kan ang zawk hle. Thlawhtheihnaa hnathawk ten an vil run lo a, boruak a danglam hle. 

Passenger te an inpawh tha em em a, hmingin an inko nalh nalh mai a ni. Phone number, adress leh e mail te an inpe kual a. Tichuan thil danglam tak a lo thleng ta. 

Passenger pakhatin min rawn pan a, thlawhtheihna chhunga thupuanna atanga thil puan min rawn dil a, kan tih ngai loh a ni naa, hemi tum hi chu hun danglam bik a nih avangin ka lo phal sak a, mike chu ka pe a. Mike atang chuan tun ni hnih khat chhunga an thil tawn te a han sawi leh te te a. 

Hmelhriat ngai miah lohte atanga ngaihsakna leh duatna an dawn zozaite chu a sawi a.

Lewisporte khaw mipuite thatna chu engemaw ti tala rulh let ve tul a tih thu a sawi a. 

Kan thlawhna number Delta 15-hming chawia tanpuina thehkhawm/trust fund a huaihawt dawn thu sawiin, Lewisporte khaw high school zirlaite puala scholarship atan a nih tur thu a sawi. 

A chuanpuite chu an phal zat zat sum thawh turin a sawm zui a. A lehkha kal kual tirin kan hnen a rawn thlen leh meuh chuan an pawisa thawh tlingkhawm chu dollar 14000/- chuang zet niin a thawhtu hming address leh phone number te a chuang bawk. 

Pa smart tak Virginia a Managing Director hna chelh mek hian an thawhkhawm zat chiah a thawh belh tur thu a rawn puan bakah, thil tul angte buaipui a inhuam thu a sawi a. Tin, chu an hmlakna chu an chuanna thlawhtheihna, Delta Company hotute hnena thlen paha sum thawh ve tura a ngen tur thu a sawi bawk. 

He thil thleng chanchin ka ziah lai hian pawisa thawhkhawm dollar mataduai 1.5 zet hmangin high school napang 134 lai an tanpui tawh nghe nghe a ni. 

He thawnthu hi puanzar ngei ka duh chhan chu thawnthu ngaihnawm tak a nih vang a ni. Hmun hla takah, min hre ngai miah lotu ten, duat leh duhsak taka min lo enkawlna hian beiseina thar min siam sak a ni. 

Khawvelah hian thil tha a lo va la tam em tih min hriat nawn tir hle bawk. 

Thil tha lo leh chanchin ngaihnawm loin min hual vel mek lai hian, chung thil tha lo a lo thlen ruala tanpui inpeih a lo penchhuak, mi tha an la awm a ni tih a tilang chiang hle. He thudik hi kan theihnghilh tur a ni lo.