Ni 6-2-2020, Ningani khan Mission Veng Mihlun, Pu R.Vankhuma, November 1926-a piang chu a boral hlauh mai a. 1943-a St. Anthony’s High School-a kal dun kha kan nih mai bakah, Venghlun mi boral ta chu tiin ka va vui ve a. 1930 chho vela Mission Veng nen a danglam tawh em avangin hman lai Mission Veng nihphung ka rawn ziak veleh hram a ni.

Kei, a aia kum 3 tlawnga naupang ni mah ila, Mission Venghluna piang, la dam, upa pawl nia ka inhriat ve tawh avangin Mission Veng, Welsh Missionary hnuaia a awm lai ka hriat ang ang ka rawn ziak ve a ni.

Mission Veng hi Missionary-in Tlangnuam lal hnen atanga an lei a ni. An inleisakna lehkhaah chuan, “Tlangnuam lal, Lal Singh Sunuar chuan, Mission Veng mual, Challui kin atanga Luipui nen an infinna thlengin Welsh Mission hnenah Rs. 100/- (cheng za)-in a hralh a, in hmun leh huan atana lei a ni.

Lei Ni 17.2.1911 Record ni 20.2.1911 Witness D.E.Jones

Khitiang khi Mission Veng lo pian chhuah dan chu a ni.

Ka hriat theih ve chinah pawh Mission Vengah chuan in (chhungkua) 70 aia tam awm phal a ni lo. A chhunga chengte pawh Presbyterian Kohhran mi chauh an ni tur a ni. Chhungkaw tinin dailen in (pit latrine) an nei tur a ni. A rim a chhiat nep nan vut phul ziah tur a ni, tho luh theih lohna turin chhin tha tak siam ngei ngei tur a ni tih a ni. Ek in endikna bute an siam a, ka pa (Ch.Pasena) leh Pu Lianhranga kha endiktu an ni nghe nghe.

Sakhaw lamah pawh an strick hle. An hming sawi lo ila - Pa pakhat chuan Venghluia Savun Kut a lo va hman avangin kum khat an hnawt chhuak a, mi dang pakhat, mi hlim sang pawhin a fanu nula boral “KA KAI THO LEH DAWN” a tih avangin phum a phal lo a, khum-za tliak vek khawpin a hahum khum a, chu pawh chu thla 6 an hnawt chhuak a ni.

Missionary-te kha, an veng siam a ni bawk a, an strick hle a, a bikin chhungkaw nu leh pa kha Chawlhni Sande sikul leh chawhnu inkhawmah an phut deuh a, tu tu emaw paho chawhnu inkhawm peih lo, lehkha lo deng khawm (playing card) te kha chawhnu inkhawm laia surprise check neiin an thawng darh thin a ni awm e.

An ram lei ngei chhunga chengte kha chu control an tum nasa hle, awm pawh a awm reng a ni. Inpuiah meichhem phal a ni lo. Choka hrang vek kan nei nghe nghe a ni. Hei pawh hi kan-mei thuhlaa invenna tha tak a ni. TUNAH ERAWH CHUAN “KA RAM A NI, KA THU” tih hi lal ber awmin ka va hmu.

Khi ta Challui tih khi tuna Vailui kan tih hi a ni. Luipui kan tih khi Sakhisik (Tlangnuam leh Mission Veng inkar lui khi a ni.