Pi leh puten, “Hmeichhe thu, thu ni suh, chakai sa sa ni suh,” an tih chu tunlai khawvelah chuan thu satel lu mai a ni ta. A chhe lam emaw, a tha lam emaw pawha kan buaipui nasat leh boruak nei lian ber ber te chu hmeichhiate an ni ta fo mai. Hmeichhe fin hian tuikhur ral chu a pel chiang ta khawp mai. 

Hmanni lawkah Champhai DC, hmeichhia chu a chhuah hlauin NGO hrang hrang intelkhawmin total bandh an huaihawt a, kawng an zawh mep mep mai. Chutih laiin a laka FIR submit-tu chu hmeichhia a ni a. Kuhva lama lo ‘so what’ em em pawh hmeichhia bawk. Chiahpuam vanglaia a bul tumtu leh a hnar kaitu ber pawh hmeichhia tho. Khehpuama hming langsar tak pakhat pawh hmeichhia a nih kha.

A chhe lam chauh ni lo, a tha lam kawngah pawh kan hmeichhiate hi an duai loin, sulsutu an ni ta fo mai. Mipa tih theih ang chu an ti ve thei ta zel mai. An ti thei mai ni loin kawng tam takah mipate min khum ta. Tun thlenga Mizo Olympian kan neih pahnih zinga pakhat chu hmeichhia a ni a, Mount Everest thlengin an lawn chhuak ve ta zel mai. Hman ni lawka Synod Mission Board-in missionary 50 an lak pawh khan a zahve aia tam daih, hmun thuma thena hmun hnih dawn kha hmeichhia an ni! Hmeichhiate hi namai lo tak an ni. Sa talhnaah sa an sat awrh awrh a, sangha leh arsa ngat phei chu hmeichhe sah leh zawrh a ni ta deuh vek mai.

Awm nem zawk leh thahrui nei lo zawk an ni chung hian an duhnaah chuan an tuang an tichhah leh em em a, chutihrualin an duh hunah chuan mittui tihtlak keuh keuhte hi an hreh leh chuang miah lo a. Samthang khaw pa, Pa Thaa tihdan takah contralto aw râta eng emaw an han sawi keuh keuh tawh chuan, an sawina hun leh hmunin azir phei chuan pa hi tui angin kan nem leh mai thin. Kan demawm bik miah lo a nia. Thei ei thing lo, Pathian meuhin ei a khap pawh eitir thei ngattu kha an ni a, an duhnaah chuan theuneu lo tak an ni. Khati khawpa lal ropui leh fing Solomona meuh pawh hruai sual a, milem biakna lama a rilru kawih hersaktu pawh tu dang ni lovin hnam dang hmeichhia, nupuia a neih takte tho kha an ni. 

England lal Edward-VIII meuh pawh khan ram ni tla seng loa roreltu nih ai chuan nuthlawi Wallis Warfield Simpson-i tang belh kha zuk thlang zawk a! Mizoram thleng thlengin kan lo ui a, pawi kan lo tih pui a  nih kha-

Ram nitla sengloa roreltu, 
A pawi mang e nuthlawi leng leh annemin, 
Haulai changsial ang a zawlthlu e, awi aw! 
An rel thiam ngei e, mingo valin, 
Lei lal crown leh nuthlawi an buk leh dawn e,
Nuthlawi a kang lo a pawi ber mai, awi aw!”

Hmeichhiate hian hma an sawn tur a ni a, an hmasawnna dal zawnga chet lo lak emaw, dan lo zam phei chu kan tih tur a ni hauh lo. An hamthatna kan ngaihtuah pui ang a, hma an sawn hi kan phal em em tur a ni. Khawvelah hian hmeichhe rahbehna leh hnuaichhiahna ram reng reng ram nuam a awm ngai lo. Central sawrkar pawhin hmeichhiate hmsawnna hi a ngai pawimawh em em a, hmeichhiate hamthatna tur scheme hrang hrang a duang chhuak a, hmeichhe chawisan leh tihhmasawn hi sawrkar laipui thil tum pawimawh tak pakhat a ni reng mai. 

Hmeichhiaten hma an sawn mek lai hian mipate hian hma kan sawn ve zel em le? Hmeichhe hmasawn chhoh dan leh mipa hmasawn loh dan en hian, “Hmeichhiate hmasawn rual hian mipate pawhin hmasawn ve kan tum tur a ni,” tia infuih kan ngai ta mah mah mai. Kawng tam takah hmeichhiate hi hmahruaitu leh sulsutua an tan a ngaih fo chuan mipate hian kan tih tur kan ti lo a, mipa/chhungkaw pa kan nih anga kan mawhphurhna kan hlen lo a, kan nep tihna a ni.

Kan hmeichhiaten zirna leh eizawnna, hmasawnna kawng tinrengah hma lam an pan chhoh zel laia mipate a hnungtawlh zawnga kan kal chuan kan hnam hmakhua hi a êng lo viau mai thei. Veng tin leh khaw tinah hian nula fel tak tak, chhungpui nu atana tha tak tak tur hi an kat nuk a, hetih lai hian mipa tih tlak, hmeichhe tana innghahna tlak erawh an vang tan pharh mai. Kan veng/branch zim teah hian kum thar hnuah mitthi pali kan nei tawh a, mipa vek an ni. 

Mipaten kan tih tur kan tih loh a, eizawnna leh mawhphurhna hlen kawngah duap zawk leh rin kai lo zawk kan nih zel chuan kan hmeichhiate hi an vak chhuak nasa tawlh tawlh ang a, an tawn kuakah mipate hian an pawnfen vuanin kan zui duan duan mai ang. Nakinah chuan kan hmeichhiate hming hian LSC-te hi a la awm fur ang a, ration card-ah nen lam an hming hi a chung berah a intlar fur mai. Hmeichhiate hi fingin fel hle mah se ram leh hnam himna/din chhuahna meuh an koah a innghah tawh chuan kan innghahna chu a derdep hle tihna a ni a, Mizo mipa kan inenlet a tul e.