Hmeichhe danglam Adeline Pachuau

Thanglai Pa - Jan 08, 2023

India rama TikTok tihtawp a nih dawna Mizoram mai ni lo India ang pawha thawm nei lian Adeline Pach chuan January 18, 2023 khian Leitan Presbyterian Kohhran-ah pasal a nei dawn. Musical.ly atanga hriat hlawh, India rama TikTok tilar tura sawm ni pha ngat hringnun kawng zawh hi a lo na mai lo hle.

Ka fa upa ber lo piang hi kan lawm ve hle a, a hming hi keiman ka phuah ang ka ti a, a sap hming ah chuan Adeline ni se, hei hi French tawnga Noble tihna a ni a, Mizo hian a la thanpui dawn a ni tiin Zothanpuii tiin ka phuah a, Nu leh Pa bula la awm kha ka ni bawk a, kan la thawveng haih haih thin hle lai la ni bawk nen. A pian hnu lawk hian nasa takin a dam lo kha nia, zankhat a damdawi lei na tur ka Nun pawisa min pek te kha kan tlanbo pui pek a nih kha. 

Kum khat a lo tlin khan mi in luah in kan indang ve a kan thenawm ah hian Pathian thu awih em em mai U Rama hi a awm a, Nausen bawrh sawm rak mai Adeline i chu a lo hmuh in, "E khai tawngtai a ngai a nih hi," tiin Pathian hnenah tawngtaiin a natna chu a hlan a, chuta tang chuan a lo dam ta viau a, kan lawm kher mai Sikul te lutin rual a pawl pha ve chu a ni ta mai a ni. 

A naupan lai hian mipa ang in ka chei bawl a ni ber a, Arts  hrang hrang te hi a tui vel vek a ni ber a, Drums set vuak te Boxing leh Kham lawn te hnam Lam te chen in a tui vel vek a ni ber, Solo tur te hian school ah a ding chhuak hreh ngai lo. Harh chhuak hlauh lo ila chu Mipa ah ka lo duang chhuak teuh hle te pawh ni in ka hria.

St. Paul's atanga Class 12 a pass hnuah Doctor zir thei turin  Coaching te a kal ve a, kei in Goa-ah Solo/Drama/Indian Classical dance  te show tur in Troupe zingah ka hruai tel ve a,  Goa hmun hrang hrangah Show hlawhtling tak kan zu nei zo chu a hrawk Thyroid Cancer kan hmu chhuak ta tlat mai.

Nu leh Pa chu manganna chhum-in min chim khat ta mup mup mai, "Aw, a ni khawvel a hmabak nei ve tur chauh in tiang natna an vei mai chu nia," tiin hlim ni kawl ah a chhuak ve mawlh lo a ni. A Medical result chu kan hmuh ngam lo, Cancer tih inziah loh na ni a kan hriat chauh kan pho lang ngam a, mahse ani chuan engkim a lo hre ru vek si. "Nu Pa engah nge in lungngaih em em, Cancer te chu ka hlau hlei nem Pathian ringtu ka ni a engkim inbuatsaih hman in ka kal dawn a ni mai a, mi tam tak inbuatsaih na nei hman lo a kal an tam em hi. Kei chu ka vannei asin ka dam chen dam pha lo lah an tam em em a," ti te khan keini nu leh pa kha min hnem zawk thin a ni. Ka fanu hian khawvel hi a thim zawngin a thlir ve ngai lo.

Ti chuan Civil Hospital-ah a hrawk Thyroid chu zai a ni ta a, an zai zo chu aw chhuakin a tawng thei ta tlat lo. Thim thuah hnih na kan tuar a ni leh ta ber chu a ni. Vellore-ah kal leh in zai nawn leh a ni a, a Cancer tai darh te chu eng-zung hmanga enkawl niin tumah Doctor pawh luh theih lohna room ah ni 3 chhung tumah tlawh pawh theih loha enkawl a ni a, A kalpui tu a Nu rilru na chuan enkawlna room bul ah te chuan riah a tum thin a, ani lah chuan, "Khata i awm chuan rilru na in ka awm zawk, thlen in ah phei rawh," tiin a ngen cham chi a, kei In a ka awm kha, "Pa tuna ka awmna chu a nuam lutuk TV te a awm a khawhar hman a ni lo, ei leh in ah min duat si," te kha a rawn ti thin a, an enkawlna a zawh chuan, "Jail tan ka zuam ta zak mai," te kha a rawn ti chhuak kha a nia. Khum atang ten a lo tla a, tuman an pui thei si lo a, chaw pawh hmawlh sei-in an hawlh lut kha a ni si. 

An lo hawn hnu chuan a thiante Doctor zir in an lo liam tawh  si, phaia eng emaw tal ka zir ve loh chuan ka dik dawn lo. Hetia in a awm ngawt hi ka tan a tha lo, ti khan min ngen ta tlut tlut mai a, phal loh theih ni ta hek lo, BE (Computer) zir tur chuan kan yes ta nge nge a, amah lah chuan, "Hruai ka ngai lo pawisa kan seng hnem tawh si kei mahin ka kal thei," kha an ti leh mauh mai kha nia. Ani lah hmeichhe aw mawi tak kha bo tawhiin aw thum zawi te in a tawng chhuak ve thei hram hram kha ni chauh si, a duh anga awm tir kha thaah ngai mah ila ngaihtuahna chu a van buai duh map map em. Hamrik awrh tirin Lengpui Airport kan han lut te chu a hlim em em mai a, "buaina i tawh palha i tih dan tur," kan ti a, a hamrik kha phur em em in an ham ta vel thin a.

Pune pan tur chuan mittui tla zawih zawihin ka thlir liam a, hlim luih derna hun a liam chawp chilh ve nghal ta kha nia.

Kum hnih hnuah anau te a awm naah hruai thla tanin a naute In luah puiin an zir lai a zir zawh pui vek a, Masi dawnah an lo hawng thin a, Vellore pan in in-Check-up in an liam leh a, Pune chu Rel-in an pan leh ta thin a ni. "Pa ka lo Cancer hi a van remchang em, kan thil zir a kan lo hawng leh kal vel kan sumdawn te hian ka Cancer vanga insenso a lo tum ve zel a nia," te kha a ti thin a, a thil tawnah hian lawmna tawk hi a hmu ve zel thin a ni.  

An zir tur an zir zawh chuan a tlum ber in a la zo ve hman lo a awmpui kha tul an ti leh ta si a, Pune College-ah B.A hi ka lo zir leh ang a ti a,  higher secondary school-ah pawh science la kha ni a, a nau thil zir nghah pah chuan B.A chu tha tak in a lo zo ve leh mai a ni.

An lo haw tak tak (kum 2015 kha ni in ka hria) hna han thawh  mai tur a awm si lo, Musical.ly kha a hmel hriat a, an zir chiang a, zan mut theih loh ah a khawih ta a, khawvel hmun hrang hranga naupang ho kha a kawm a, a zai pui a, Home Work te a tih pui bawk thin a, Muslim naupang te thlengin a kawm thin a ni. 

India-a tik-tok a lo luh te khan Promote turin India khawpui lian hrang hrangah an sawmna angin a zuk kal ve ta thin a ni.

BBC Asia chuan Asia-a  Social media a tha lama hmang hai chhuah tuma hma an lak lai khan, uluk taka an zir chianna neih hnuah Adelini chu thlan chhuah a ni ta hlauh mai kha nia, a mah kawm tur khan an lo kal a, Lengpui Airport an lo thlen khan an Taxi hman kha BBC palai te khan Ade-i phone no. pein an inbe pawp a. Kan In awmna te hrilhin an lo thlen te khan chhehchhawl thawmhnaw nen chhuat a lo nawt mek a, an bungrua te kan han thiar thlak pui ang nawk nawk a, kei lah chuan Balhla/ Dragon fruit te leh Kiwi etc. te leh thingpui leh chhang, kan ram thar ho ngei kha ka lo chhawp bawk a, an lawm der ve viau chuan ka hria.

Khatia a room leh bathlar vela an inkawma Video te a thla an lak sak pah khan zai tui mi a nih thin te kha a sawi a. A aw a chiangkuan loh tak avanga zai lam a tih theih loh dan te a sawi a, "Pa Cancer ka vei vel kha ka sawi tel duh ang em," kha a rawn ti a,  kei chuan sawi rawh pawi hlei nem ka tia, chutia Cancer patient a ni tih an hriat tak khan kha lam khan an rilru kha a la ta viau niin ka hria.

BBC palaiin Zorama mimal kawm tura an rawn kal chilh chhan hi Pi Lalziki Sailo kha niin ka hria a, ani kha Mission Sap Pi Zirtiri enkawl, sap ramah te lehkha an zirtir hial kha a ni a, Pi Lalziki Sailo chuan amah enkawltu Pi Zirtiri hriat reng nan College te pawh din kha a nia...

Share now