Kum 1900 February thla ah Bridle Path(ranchhawr theihna kawng) in laih tlang a ni. An hotupa Sapsanga Hav. Sova Karn Rai a ni. Sumsuih lam Midum kham chhuah kawn ah Sakawr chunga chuangin Roman script in hetiang hian a ziak.

Lalzuia hi ni 14 Sept. 1920-ah Bawlte khua ah a lo piang a, a pa Upa Vawmphunga a nu Thangchuangi te an ni. An unau hi pariat an ni. A pa rawngbawlna chawi a-a hming hi sak a ni.

ZIRNA LAM: Hlimen ah Mission School zirtirtu Chhuankila hnuai ah pawl 3 a pass hnuah Sikulpui ah pawl 6-a pass leh a ni.

ZIRTIRTU AH TANG: Thiak khua ah Primary zirtirtu in ava awm a, thlakhat ah cheng 2 a hlawh thin.

Thiak khua chu Sapin ava tlawh a, Lalzuia chu tawnglet turin an sawm a, khawchhung chu an fang dun ta a ni. Biak in an va thleng ta a, Lalzuia’n “This is Chapel”, ati a. An fang kual zel a, kal kawngah Patea fate an hmu a, “These are the sons of Patea”, a ti leh a. Lalzuia chuan lehkha zir chhunzawm leh a duh tak avangin a bang leh ta mai a. Mizoram ah High school kan la neih loh avangin hmun dangah a zir a, kum 1942-ah matric a pass ta a ni. A pa Upa Vawmphunga mifing tak mai chuan Dip.in Civil Engineer Gauhati-a zir turin a thawh chhuak leh ta, tha taka a zir zawh hnu in PWD Overseer hna a thawk zui ta nghal a ni.

MIDUM KHAM JEEP – KAWNG: Kum 1957-ah Jeep in Thiak Bangla a thleng thei a. Aizawl Bawrhsap L.S.Ingty a hunah Aizawl leh Lunglei motor kawng laih hna chu an thawk thut mai a, kham karah motor kal tir an tum tlat mai bawk si a, theih tawp in, sial tlang ngei tumin an bei a ni. An hotupa Pu Lalzuia ber pawh chuan an kawng laih chu hlauhawm a ti hle mai a, an kawng laih ah chuan, hetiang hian a sawi “Kan Lalpa Isua khan Jeep Midum Kham an kawng laih ah chuan, rawn khalh ta sela…..Gabriela leh Angel ho ten thla zapin rawn veng bawk sela….Isua chuan Lalzui lo chuang ve rawh le min ti sela…..Aw Lalpa ka chuang ngam lo ka ti ang,” a ti!! Pu Lalzuia sawi hi a dik viau a ni, Jeep leng deuh chiah chiah a nih avangin a hlauhawm em a ni, kham sang lutuk lengkir sang pui pui a ni a, a hlauhawm em em a ni.

Pu Lalzuia hova Midum kham an laih tlang hi June thla a ni. Tichuan ni 10 June 1958-ah APO Pu Hauthuama’n Jeep a khalh tlang chho a, Sumsuih leh Hmuifang-ah motor a khalh lut a ni.