Kar leh Chawlhni... ni 8-3-2020 khi ka kum 91 birthday a ni. Pathianin rem a tih chuan ni 7 emaw lek a nih tawh chu!

Tunah chuan upa ka intih ve tawh mai bakah, ka mitte hi vei lam chauh hmang ka ni rawl nen, ka taksa chakna hrim hrim pawh a nep tawh a, ka hriatnate hi, a mak khawp mai, ka hriat sate hi ka theihnghilh tam tawh khawp mai. Tunah hian Bethlehem Vengthlangah ringawt hian tuchhuan 15 emaw ka nei ve tawh a; mahse, tu fa/tu ber nge tihte leh an hminga koh fak theih pawh zuk nei mang lo ia!

Dam rei hi mihring tungchhoa kal chuan kan châk theuh awm e, hriselna a that loh chuan thuhran ni se. Pi Daithangi (Aithulha nu) pawh kha Indopui II-na (1939-45) lai khan kan inah a awm thin a, “Thih ka châk, dam hi a ninawm,” a ti chawk mai a. Vawi khat American Flying Fortress an tih mai 4 engine nei chu kha hniam deuh maiah a lo thlawk thut mai a le.. “Ka nu, ka nu, ka thi dawn,” tiin in hnuai a chuh rang teh asin.

KA HUANG hi kum engzat nge ka ziak tawh tih pawh ka lo chhinchhiah sise lo pek a, a rei ve thawkhat tawh chuan ka hria.. Kar tin chuak a nia, kum khatah hapta kar 50 thuartham a awm a, kum 5-ah chuan 50X5=250. Keini ang tar lam tan chuan kar tin thu chhuah hi thil awlai a ni thei ta lo. Eng pawh ni se tun hmaa ‘KA HUANG’ lo chhiar ve thintute zawng zawng chungah ka lawm em em a, ka kum leh thain a tlin ta lo ni berin ka hria, an mi hriatthiamna leh ngaihdamna ka ngen a ni e. DAM TAKIN ULE!