Mizoram khaw hming thahnem tak hi chhan neia phuah an ni hlawm a, ka hriat ve thenkhat ka’n chhuah ve a, chhan mak tak takte pawh a awm nual a ni. Kum 1948-a kan Bawrhsap (Superintendent, Lushai Hills) chu L.L.Peters, Mizo tawng thiam zet mai a ni a (hlaah pawh “Ka pu Peter min khawngaih rawh, min khawngaih rawh. I kekawrtlawn min hawh la, i sap lukhum, i kuaite nen min hawh bawk la. Ka intlawhtlawn awr awr mai tur a!” tih a awm kha).

Thangthar lehzual hriat atan, tun hmain Deputy Commissioner kan nei ngai lo. Superintendent, Lushai Hills tih an ni thin. Lushai Hills chu a bika enkawl leh rel a ni. Kum 1948 July - October chhunga Chhiarpui hna thawk turin Temporary Census Department an din a. Chuta thawk tur chuan... Census Officer, Supervisor, Enumerator, Clerk leh Peon lak thar tur a ni. Pu Peter-a chuan exam/interview amah ngatin a hruai a, a rualin min ko khawm vek mai a, ani’n kain a sawi a, keinin ziakin kan chhang a. Chutah chuan Supervisor hna ka chang ve a, khawchhak lam ram circle 6 ka bial a ni. Ke veka kal a ngai a, puan pheikhawk hnuai lamin a daih mawh khawp mai! Ka bial chu Aizawl khawchhak lam Tipaimukh atanga Farkawn/Thaidawr a ni.

Khaw hming mawi lo thahnem tak Bawrhsap chuan a thlak a. Entir nan, hmeichhia an chhiahna thin... CHHIAHTLANG te, saw VAIHAL tiin. SATEEK chu KEIKHUM tiin. CHHUHLAWH chu THENTLANG tiin. Mahse, mi thahnem takin Chhiahtlang an tih thawm ka hre leh ta a. Zahmawh rawngkai a nih mai bakah hming tlawm tak a nih avangin a khaw mite sawn VAIHAL tiin hmang leh ta zawk se ka ti ngawt mai.

THINGSULTHLIAH tih pawh khi a chhan leh a vang, a hriaten an han sawi takah chuan thlak mai an rel a, a hming put chhan an sawi chu: khi khuaah khian tlangval mikhual 3 emaw lai an thleng a ni awm e. Zanah a hrang theuhin nula an rim a, an nula rimte chu an thei (mutpui) ta vek theuh mai a ni awm a, a tuka an chhuahsan leh dawn chuan kawtchhuahah, in nulate kan mutpui e tih entir nan THING SUL AN THLIAK a ni an ti.

Thingsulthliah a nih chhan tak chu zahmawh rawngkai ni mah sela a hming hrim hrim THINGSULTHLIAH tih ri hi a mawi an ti riau mai a (Indopui II-na lai vela vai sipai lo chhuakte kha chuan TINSUKIA an ti mai!), rei tak an sawiho hnuah thlak loin a hming ngai an puttir ta a ni.

Ni e, Mizo hian zahmawh rawngkai khaw hming kan nei nual mai. A?la awm emaw ka hre lo a, Farkawn chhak Tiau lui kam deuhthawa THAIDAWR te pawh khi khaw hming mawi tak chu a nih loh khi.

CHHAWRTUI tih pawh khi... a tuikhur khi fenthlir liang sei deuh maia zawm suah ngai khawpa thuk a ni awm e. Nu pakhatin kun ngawr ngawra a lo suak lai chu pa pakhat thinglukham pu hawngin a hmu a. A kaihza khawivah-lawi bakte pawh a lang ni chuk em ni tehreng, a thing put a dah a, mawng lam atangin, ui style-in a bei ta mai a, a peih fel pawhin chhuak mai thei hek lo. A lo chhuah meuh chuan amah titu nen ngei chuan an zawng duh zar zar e an tih thin kha. Chu tui chu a chhawr hle a ni. Kei pawh ni ila.....