YMA hi Mizo khawtlâng nun min phuar khâwm tu, khawvel changkânna hrang hrangin min chen chilh hnu pawh a, Mizo taka ram leh hnam a dam khaw chhuah theih nâna min chelh tlat tu, kan hnam rohlu tlawmngaihna mei mit lova kan vawn nun theih nâna pawl pawimawh tak a ni. Mizote hi chhiat that tawhni khuaa in lâwm tâwn thin kan ni a, chhiat tawk chhungkua te hi tun thleng hian thingtlâng lamah chuan awmni khamin hlo an la thlawh sak thin. 

Khawtlângah chhiat tawk an awm hian YMA Member kan nih avang chauha kal tur, tlawmngaia pen chhuak tur kan ni lo va, Mizo kan nih avanga tanpui ngaite tâna pen chhuak tur kan ni. In mamawh tâwn vek kan ni a, tu mai pawh hian kan dam chhûng hian chhiat that kan la tâwk vek dâwn a, midang mamawh vek kan ni. Khawtlâng rawngbawlna, tlâwmngaih chhuaha thawh chi thawh loh avanga thubuai awrh ta kan hre lo. Chhiatni thatnia lan duh loh vâng emaw, hnatlân duh loh vâng emaw, hla zir duh loh vâng emawa jail tâng ta kan hre lêm lo. Hêng tlâwmngaia tih ngai chi rêng rêng hi chu a ti duh lo tân chuan tih loh theih vek a ni. Eng emaw tala tangkai hi kan tum tur a ni. I telna turah i tel ve thin em? 

Veng chhunga chhiat tawk an awm hian tunlai thiamna hmang tangkaiin mahni veng chhung WhatsApp group hrang hrangah veng mipuite hriattur in Zualko dah chhuah thin a ni a, Information Mike atangin kan puang bawk thin. Mi thenkhat chu an Status tâk ngial pawh Mitthi ten an chang lo va, status pawh tum chuang lem lo, khawhar lênpui tur an awm pawh hre lo khawpa mahni buaia buai te, thenkhat erawh Status-a hmang satliah mitthi in a kal tum miahlo an awm ve bawk. Mizo kan nihna hi chhiat tawk an awm hian kan ti lang tur a ni a, êng emaw kawng talah tangkai kan tum ve tur a ni. Social Media a tarlan ringawt a, a taka chet chhuah peih loh te hi kan ti tur a ni lo. Mizo hnama kan piang ta râu râu a nih chuan kan hnam chu tanpui ngaite tanpui thin, chhiat that tawhni khuaa in tuam hlawm thin, in lâwm tâwn thin kan nihna hi hriain a thu mai ni lo, a taka tlawmngaihna lan tir tu nih kan tum tur a ni.

Thlan laih a tûl a, kan tel lo va, tu’n mi sual vehin min veh lo a, thlân chu laihin a awm tho a; tute’n  emaw an lai mai a, keini kan âwl a. Khawhar inah ka kal peih lo a, khuang a ri a, tute emaw an zai tho a, kei ka hahdam a. Mi bo zawn, ruang zawn a tul a, mahni in chhung luma ka mut mai mai laiin tute emaw chuan an lo zawng mai a. Mahse, hêng khawtlâng rawngbâwlna thilte ti loa tute emaw kan awm theih chhan hi tute emaw tih hrâm hrâm vâng a lo ni tih kan ngaituah ngai em? Ti loa awm thei ve tho tute emaw zârah khawtlâng nun hi a himin a nuam thin tih hi kan ngaituah ngai em le? Ka tel loa khawhar ina khuang a rîk tho thin chhan te, thlân laih a nih tho chhan te, mualpho loa kan vêng a kal chhan te hi kan chhût ngai em? Ti loa awm hahdam ve thei thote tih hrâm hrâm rah a ni. 

Mahni awmna Section chauha kal tum kan nih chuan tlawmngaihna thlei bîk nei nun kan zawh tihna a ni a, tupawh hi engtik lai pawhin kan hman reng lo, amah erawh chu chhiat tâwk te tâna kan tih theih tâwk theuhah hian midang tih atan chauha dah mai lovin êng emaw tala tanpui ngaite tanpuitu nih kan tum tur a ni. Tanpui ka ngaih huna tanpuina ka dawn thin te, puih ka ngaih huna puihna ka dawn thinte hi ti lo thei thote hnen atanga lo kal a ni. Ka la thi ve ngei ang a, chutih hunah chuan ti loa awm thei rengte thlân laih saah min phûm ang a, ti duh lo se ti lo ve thei thote’n ka chhûngte khawhar an rawn hnêm ang. Ti duh lo se ti lo ve thei thote tih hrâm hrâm azârah a ni he society hi society thlakhlelhawm leh nuam a lo nih thin ni. 

Hei hi inzâwt thin ang u: hêng thil, kan tih loh avanga dân bawhchhiatna ni si lo, Mizo society chawi nungtu ni tlat site hi ti lo ta vek ila engtin nge kan awm ang le? Hêng kan tih loh theih, kan mutsan mai mai theih hnate hi tute emaw hi chuan an tih tho a ngai a, tute emaw hi chu ka mut mai mai laia mu ve lo an awm a ngai a ni. Kan tel na turah hian tel hram hram kan tum tur a ni. Heng tih loh theih titute avang hian nang leh kei hian he society hi nuam kan ti a ni. Hawh u, ‘tih loh theih ti hrâm hrâmtute’ zingah hian tel i tum vek teh ang u. Tlawmngaihna hian thlei bîk a nei lo va, engah pawh hian kan duh naah chuan hun insiam thei vek kan ni a, khawhar in kal, mitthi lumen, thlan laihna te hian kan rilruah hmun chang ve se la, tanpui ngaite tanpuina kawngah lûngrual takin feh chhuak dîal dîal ila, khawtlâng nuam tak kan ni ngei ang.