Mizo te hi hnam tlêm te, chimral hlauhawm tham lek kan nih zia kan sawi fo a. Chutih rualin chim ral hlauhawma kan awm chhan hrang hrang hi kan sawi zui tam lo khawp mai. Chim ral kan nih theihna thil hrang hrang zingah thalai boral kan tam thu leh a bîk takin mipa kan kiam chak hle tih hi data hrang hrang atanga lak khawm pawhin hai rual a ni lo. Zirchianna leh thil zat lawr khawm hrang hrang atanga a lan dan te han thlir hmasa ila.

Mizoramah kum 1984 atanga kum 2024 thlenga ruihhlo avanga thi chhinchhiah tawh zat hi mi 1,873 an tling tawh, chhinchhiah loh hi eng emaw zat an awm rin a ni. Mipa - 1,648 leh hmeichhia - 225 an ni. Tun hnai kum 11 chhungin Mizorama Kohhran lian ber, Presbyterian Kohhrana Kristian Thalai Pawl (KTP) Member thi mi 5, 279 an awm a, mi 4,632 chu mipa an ni. Economics & Statistics Department-in Kum 2022 chhunga Births & Death record-a tarlan danin Mitthi -8584 an awm a, an zinga - 5520 hi Mipa an ni a, 3064 hi hmeichhia an ni. Kum 2022 a mitthi zawng zawng atanga chhutin Mipa thi zat hi 64.30% a ni. Tun dinhmun, record thar berah phei chuan, hei ai hian kan tam fe a rinawm.

Mizoram Police CID (Crime) in a chhinchiah danin kum 2014 atanga kumin July thleng khan Mizoramah mahni nunna la mi 948 chhinchhiah zingah a tam zawk, 794 chu mipa an ni a, hmeichhia 154 an awm bawk a, nunna la tam ber mi 584 te chu kum 20 atanga kum 39 inkar mi an ni. Mahni nunna la duh hiala manganna leh harsatna tawk te hian an mang­anna mite hnena an thlen theihna tura rilru inhawng taka lo ngaih­thlak sak tu leh chhungkua leh khawtlanga an sawi chhuah ngam theihna tura boruak tha siam hi kan tih makmawh a va ni em.

Hmânlâi khân a bîkin Mizo mipate kha Zawlbuk atangin zonun zemawi zirtir an ni a, an nun a kaihruai hneh hle a, an puitlin hnu thlengin zonun zemawi an chhawm nung thin. Mipa naupangte kha zing thawh hlim atangin sava veha chhuak, thangte kam a, thing fawm thin, inbuan thin an ni a, val upa leh aia upate kaihhruaina hnuaia seilian chho an nih avangin a hriam pawh an hriam hle thin. Hmei­chhiaten tui an chawi a, inchhung sekrek khawihin an theih tawkah an intuaihriam a, an mahni tawkah an chhel thin hle a ni. Hmanlai Mizo dinhmun kan hriat dan chu, an khua him leh ralmuanna thlentu chu Mipa an ni a. Khawtlang mai bakah an nupui fanaute innghahna tlak ni turin, rim takin an thawk thin. Ral (dotu) lakah an thlamuan leh thlamuan lohah pawh an khaw thalaite innghahna tlak an nih leh nih lohah a innghat thui hle. 

Tunlaiah erawh thil a lo danglam ta a, khawvelin changkan lam a pan a, thiamna leh finna a lo sâng a, intuai­hriamna tur hi mipa naupang tan a awm ta meuh lo a tih theih awm e. Zawlbuk kan neih tawh loh avangin mipa naupangte hian tih tur an nei ta lo tlangpui a, sikul kal leh lehkha zir bâkah a bîk takin khawpui ah chuan kan fate kan thlah zalen ngam tawh lo va, changkanna in a ken tel lirthei te a lo pung a, sualna a pung ve zel bawk. Mipa naupang tam zawk hian sikul kal bâk loh chu hun awl an nei tam hle a, an hun awl hnawh khah nân phone en a, games khelh bâk inchhungah tih tur an nei ta meuh lo, pawn lama len tirin ngaihtuah an na si a, in chhung khurah an theih tawk tih tir hi kan tih tur pawimawh tak a ni. Inchhung sekrek khawih te, insuk, ei rawngbawl, chhuat nawh, tui chawi leh adt. hi hmei­chhe tih atan chauha dah a thiang tawh lo va, thil eng pawh hi mipa leh hmeichhe fa kan nei a nih chuan an intuaihriam nan i thawh tir zel ang u. 

A bîk takin mipa naupangte hi kan thlah zalen a, inchhung khurah an tih theih awm tawk tih tir nachang kan hriat loh luatah Phone khelh bâk tih tur an hrelo tlangpui thin a, kan no hlei hlui ta vek emaw tih mai tur a ni. Hun awl an ngah luatah ruihhlo bawiha tang ta, tih tur neih loh avanga mahni tleina tur zawng hi kan pung ta zel a, a tam zawk chuan sualna lam kawng an zawh zel tih hi a chiang hle a ni. Phone games khelh bâk tih tur an hre lo a, a bâk activity tam tak an tih theih awm tawk hi kan zawn pui zel a tul ta viau mai. Kan inenkawl dân hi a chhel zawng leh a hriam zawnga her remin kan fate hma hun hi kan kutah a awm tih hria ila, mipa thawh awm, hmeichhe thawh awm te ngaihtuah chung­in an kuta rinna nghah ngam te hi kan zir thar a ngai ta hle mai. 

Kan thalai tam tak zu leh ruihhlo avanga nih tur ang ni pha lo, chhungkua leh ram tan hman theih lo va Mipa boral kan thahnem zel a nih chuan, eng ang pawhin YMA leh pawl hrang hrang ten ram leh hnam humhalh kawngah tan la viau mah ila, kan ram luah tur kan awm mumal miau loh chuan, kan mamawh leh tul min phuhru turin hnam dang kutah kan in nghat lo thei dawn lo. Ram leh hnam vei a, hmalam hun thlirtu tan chuan, thlà muanga awm a theih nganglo a ni. Inchhung khur atangin bul tan that tum ila, Ram leh Hnam tana fa hrin man hla ni turin kan fate theihtawpin i chher hriam teh ang u.