Indona hmunah chuan, tû mah pâwnah an chhuak sup sup ngai lo a, lên chhuah suau suau pawh an tum ngai hek lo. Hrilh ngai loin mahni in lumah an tawm thap thin. Anmahni rûntuten an luh chhuah hma chu, hmun biru thei ang berah an tawm kûk thin.

“Indona hmunah chuan, tû ma’n mahni zalênna phût luiin nawrh an huaihawt ngai lo; dam khaw chhuah dân mawlhin an ngaihtuahna a mawlh tawh avângin an zalênna pawh hralh an phal hial thin!

“Indona hmunah chuan, tû mah ril tàm avângin an phunnawi ngai lo. Phun chu sawi loh, thih ai chuan riltáma dam khaw chhuah theih dân tûr dap an thlang zâwk thin. A hmaa an khawsak thin anga khawsa  leh a, ei leh a, in leh thei tûra an nunna zuah a nih theih nân an tawngtai zâwk thin asin!

“Indona hmunah chuan, tû mah mahni sumdâwnna ngaihtuaha buai hman an ni awm ngai lo. Indo laia dâwr hawn a pawimawh ber lo a, chu ai chuan dam khaw chhuak tûra vir buai a ngaih pawimawhawm tawh zâwk. Kah hlum i nih ngawt loh chuan Pathian hnênah, zalên taka dâwr i hawn leh theih hun i dîl zâwk ang. He hun khirh tak leh buaina chhûm pik chun kâra mi nung chênna rama ni thar pêk i la nih ve avâng hian Pathian hnênah lâwm thu i sawi zâwk ang.

 “Indona hmunah chuan, kan fate sikul an kal loh avângin kan rilru a buai thei tawh lo. Buai a hnêkin sawrkârin kan fate, tih luihnaa sipaia a tan luihtîr loh avângin kan lâwm zâwk thin. An zirna in pawh, sipai lemchan zir nâna a hman loh avângin sawrkar chungah kan lâwm zâwk hle ang.”

Aw le, vawiinah hian khawvêl pum pui hi râldona hmunah a chang mêk a ni. Râlthuam leh silai hmanga ‘indona’ a ni lo a; ramri tiam chin pawh nei lo ‘indona’; sipai tha chakna hmang miah loa ‘indona’; inkah-hai puang tûra inbiak remna awm thei miah lo ‘indona’ leh hmun thianghlim inzahsakna pawh awm miah lohna, ‘indona mual’ râpthlâk leh tihbaiawm takah kan awm mêk a ni. Min dotu sipai hi khawngaihna nei miah lo sipai, zahngaihna rilru pu eih lo, nû-nau pawisawi lo pawh sawi zo lo leh sakhaw hmun thianghlim pawh serha min zahsak tumna nei miah lo sipai nunrâwng a ni. Indona-in thil a tih chhiat pawh pawisakna nei map lo sipaiin min rûn mêk a nih hi!

Kan ram awp lai hi thlâk danglam a tum azeng pawh a ni lo a; kan leilung hausakna îta thlahlel pawh a ni bawk hek lo. Râl hlauhawm, zahngaihna nei miah lo, min rûn tûra theih-pa-ling kawha a theihna zawng zawng sâwm khawma, a siruk laa na taka rawn thawk chhuak sipai hlauhawm ber chî a ni zâwk e.
 

He râl hian a tum lian ber leh a tum awm chhun chu, ram tina thihna thlâ, a tam thei ang bera zârtîr a ni tawp mai a ni! Kan khawvêl pum hi thihna-in min ngam hunah, ani chu a kua a puar chauh ang a, a lung a awi chauh ang! Kan leilungah hian inkhuarna bîk nei si lo leh, a tum ti hlawhtling tûra khâwl hlauhawm pawh chelek miah si lo hian, ram tinah a vâk kual mêk a nih hi. Khawi ram sawrkar ropui mahin a che vêl hi an khap dai zo ta lo! A tawi zawngin sawi ta ila: ‘A duh ang thâlin a tâl a; amah leh amah hi a dân siam chu a ni nghal vek mai a ni!’ Chu sipai, râl hlauhawm tak chu ‘Coronavirus, Covid-19’ kan tih hi a ni.

Vânneihthlâk takin, he sipai hlauhawm tak hian chak lohna leh duapna lai a neih ve tlat. Chu lai tak chu ‘hneha ngam theih’ a nihna lai chu a ni. Kan hneh theih dân awm chhun chu: inpumkhatna, tanrualna leh thuawihna te hmang chauhin a ni.

Tûn hi, naupang chhia anga chhang leh hriak ngèna nawrhna hun a ni lo e. Chûng ai chuan, kan Pathian Lehkhabu Thianghlimin, mihring hi chhang chauha a nun lohzia min hrilh kha i hre reng zâwk ang u. Covid-19 do tûr hian inti chak thar leh ila; dawhtheihna nei zêl thei tûrin i insangmar hrâm hrâm ang u khai. Kan vei leh kan ding lama kan unaute tâna ding ngam tûrin tho chhuak ila. Nakin lawkah, kan zalênna te, kan sumdâwnna leh kan khawtlâng nun hlimawm takte kha kan nei lêt leh dâwn zâwk nia.

He hun khirh tak mai hi, mi dangte tanpui nân, hun hmanhmawhthlak a ni tawh a; mi tin inhmangaih tawn nân pawh, hun tuah tak a ni tawh bawk tih hi i theihnghilh lo ang u. Lalpa’n mal min sâwm theuh rawh se.

(He thu ziak hi Africa-a ram pakhat, Uganda President, Kaguta Museveni-a thu sawi, thiam ang tâwka Mizo tawnga ka lehlin ve a ni. President Kaguta hian a ram mipui zînga Covid-19 dona kawnga sawrkar thupêk zâwm tha duh lote a vauna thu leh mipui mimir a fuihna thu chah hi, Covid-19 hripui lêng dona kawnga ram khat hruaitu thu sawi ropui leh mi tam tak rilru hneh bertute zînga ngaih a la ni ta reng a ni. A thu mal leh tlar tin, a sawi ang dîk diakin ka let lêm lo a. Mizoten kan hriat thiam theih dân tûr leh kan nunphung nêna inmil thei tûrin kaih hera pawh rem lai ka nei nual mai. –ZSK)