Zemabawk-ah, mi ngaiha 'pitar, hmeithai bengngawng lehnghal' a thi a. Vuinaah kan va tel ve a. A fapa pastorin thu a sawi a. "Ka pa a thi tawh. Tunah ka nu a thi leh ta a. Ka nu leh pate khan in leh lo leh khawvel thil min hnutchhiah tur engmah an nei lo. Mahse, Lal Isua min hnutchhiah a, chu chu kan unau tan hian a tawk em em a ni," a ti a nih chu. 

Thingtlang atanga Aizawl pem lut, rethei tak si, hlim leh nuamti taka fate enkawlin an khawsa naw naw a. Chanmari West ah in an nei ve thin. An inpui ve chu, a hmun chawpin leiin a minpui vek mai a. Sak leh ngaihna a awm lo. Pa ber thih hnuah nu berin a fate a kilkawi a, fate awmna hmun hrang hrangah a tlan kawi a. Inpui, nu ber nghah lum tur ni awm tak, fate mangang pawh an tlan khawm vena tur a awm tawh lo. Nu ber pawh, a fate awmna hmun remchang apiangah zawhte no nei ang maiin a insawn kual sek lo thei lo ve bawk a ni.

Makpa pastor fel zet mai a nei a. Chu pawh chu naupang tein a thi a. Mi pawhin pasal an sun a, an nupuiten hawna tur, 'inpui' an nei thin. Pastor nupuite erawh chuan hawna tur 'in' an nei lo va. Pastor thar lo awm tur tan quarters chhuahsan thuai a ngai bawk si.

Chutah chuan alawm, a nu leh pa ten an hnutchhiah Isua kha a lo lan tak chu! Zemabawk bial kohhran mipuite thinlung chu Isua'n a rawn tiche ta a. Tuna pitar kan vui mekna in chu, a hmun chawpin, a chhip sang lai ber thlengin, an lo dinsak tawp mai a nih chu! Isua chetna tura Zemabawk mipui thinlung inhawng pawh hi pui tak a ni.

Chu pitar hming chu sawi ila, hria an tam lo ang. A pasal hming pawh sawi leh mah ila, mi tin hriat tur chi an ni lo. Kal paha 'hei hi an in a nih hi," han tih tur kha a awm der lo a. 'Hei hi an motor a nih hi,' tih tur pawh an nei lo. An thih hnuah an sulhnu bak rochun tur hnutchhiah tur an nei lo a. A fate chan diat diat tur ro sum leh pai sem tur an nei lo.

Chhungkaw tam tak buaina ka hre ve thin. Nu leh pa atanga rochan tur inchuh buaia inkhung ta rup rup te pawh ka hria. Chu pitar fate chuan Heirship certificate an inchuh ve lo a, in hmun lo ramah an buainl lo. Inchuh buai tur a awm lo hrim hrim. Awm ta pawh ni se an buai chuang lo ang.

An fate chu pali an ni. A fanu upa ber chu pastor nupui, tuna hmeithai ta si chu a ni a. An kohhranah Kohhran Hmeichhe Zaipawl conductor a ni. Chumi fa chu Synod Choir ah a tel mek. A fapa upa zawk chu Pastor, Rev. PB Mankima a ni, a nu ruang chunga thusawitu khi. A fa pathumna chuan pasal neiin theihtawpin pasal fanau enkawl chungin a phak tawkah rawng a bawl ve a, Kohhran Hmeichhe Zaipawl conductor a ni. A pasal chu KPP Zaipawl Conductor a ni a, an fapa chu an Kohhranah Zaipawl Conductor a ni bawk. An fapa tlum ber pawh Missionary ah kal thinin, tunah erawh zirtirtu a ni. An hming sawi ta ila, mi tin hriat tur an ni chuang lo. Celeb an awm lo. Meng zau lutuk lo hian an zai thiam chhungkua thung! 

An unau chu an inngeih a. An chhungkua chu an hlim em em a. An lungawi em em vek a, an nun a hahdam em em vek mai. Atu chhungkua mah chu ruitheih thilin a tibuai lo a. Tlawm takin an nung a, tu pawimah an sawi lo a, an hnawksak lo a nia aw!

Pi leh puin ro hlu ber Isua chu tu leh fate tan tan an hnutchhiah tlat alawm. Nu leh pa lak atanga rochun tur atan hian Isua tluk a awm lo ang tih ka ring ta. 

Rethei apiangin Isua chu an inrochun kher lo, hausa apiangin an inpe chhawng lo kher lo. Isua neitute chu hausa mahse an buai lo a, rethei mahse an hlim tho. Tlai leh rilțama awm dan, hausa leh tlachhama awm dan an hre tlat.  Eng dinhmunah pawh an nun a buai lo tawp a nih chu. An lungawi a, engkim an tithei tlat (Phil 4:11-13).

Chhung tin hian thil dang zawng aiin Isua hi inrochun chhawng zel ila, kan ram chu a fel mai ang maw le!