Zoram kawtchhuah - Lengpui Airport-ah kan in eipuar a, Holyland pan turin thlawhnaa hlim takin kan lut a. Lengpui atangin dar 11:30 ah Kolkata kan pan a, dar 12:30 ah kan thleng thei a ni. Kolkata atangin dar 6:30-ah Delhi kan pan leh a, dar 8:45 pm-ah kan thleng a. Tichuan Terminal No. 3 Bus in kan pan leh a, keini ang ram hmu zau lo tan chuan a van ropui teh lul em! Khawvel ram hrang hrang pan tum kan inpel suau suau mai, zan reu a awm lo, thlawhna lo tum tur leh thlawkchhuak a awm reng mai.

November 4, 2022 zing dar 4:30-ah Delhi atangin Gulf Air-ah chuang Bahrain kan pan a, van sang takah Pakistan chungah Arabian Sea chungah, Arab ho ram hrang hrang chungah darkar 5 vel zet kan thlawk veng veng mai a ni. Gulf Air thawktu Air Hostess hi chuan hawih hawm leh hlim hmel pu takin, in tur leh eitur te min pe a, free vek a ni, a ruk takin ril a tam bawk a, ka lawm hle a ni. Kan awmna India ram thlawhnaah kha chuan engmah free a sem a awm ve lo a ni. Coffee no khat pawh a to em em mai a ni.

Hetia thlawhna ka chuan mek lai chuan ka ngaihtuahna chu thli dang dai takin min rawn chhem her sak tlat mai a! Aw! kan Mizo tlangval engzat tak hian nge Thlawhtheihna khalh ve tawh le aw!? Mizo Pilot engzat nge kan neih tawh? Hnam dang ho chuan an khalh vet vet mai si a, ka ti a, Mizo takin ka ngaihtuah a, India Airforce te leh Pakistan Airforce te - van boruak sang takah an ram chhan nan an insual bur bur ngam. Chutiangin Israel tlangval te leh an hmelma te vangsang-ah jet fighter-in thiam tawkin an ram chhan nan an insual ngam - Enge kan rilru le?

Ka ngaihtuah zel a, kan state - kan ram neih chhun - kan politics khel hote hian lal ringawt te, thuneihna ringawt te chakin an tui hal bawk si. An lal theihna tur a nih phawt chuan dawt sawi an hreh hek lo, engmah tih hreh an nei bawk si lo. Kan ram khawpui Aizawl tlangah awmhmun kan khuar a, keimahni leh keimahni kan inbauh tawn mai mai.

Kum 2018-ah Zophai-ah kan zirlai ho ten kut tuarin Assam Police an hmachhawn, silai an hmet puak a, engemaw zat an hliam a nih kha. Kan tam Police te kha an dawih a ni lo - an kut erawh chu sawrkarin a phuar a, an kap ve lo mai zawk a ni. Khata tang phei kha chuan min cho zet zet mai a nih kha. Ramri lamah Assam lamin min ti buai zingin an huangtau tual tual, kum 2020 chhoah pawh min cho em em mai a nih kha.

Kum 2021-ah Assam ho chuan Vairengte lamah Assam Police te leh mipuite nen lo thawk chho lehin Mizoten hian kan hlauin kan ngam lo tak tak emaw tiin min rawn Nuthuri zuam em em tawh mai a. Vairengte lama Police hmun te Mizoram Police te duty na hmun te chu an rawn tam hneh a, silaite an hmet puakin teargas te nen Mizote min rawn kap hmasa leh ngawt a le! Mizoram police tlem zawk chu sawrkarin kan Mizo tlangvalte silai an hmeh tir ve hlauh a, vaiho hlau leh bak lengin an tlanchhe hawng a, a then ramhnuai-ah a then kawngpuiah. An rawn intih huai teh reng nen - an tlanchhe hawng! Kan naute hnenah kha aia tam kha han thal ula, ka duh a nia ka ti. Synod inkhawmpuiah ramri chungchang Agenda a lo lut a, kan minister pension pakhat thusawi ka hriat reng chu ramri chingfel tur chuan inkah deuh that that a ngai a tih te kha a dik hian ka hre tlat mai a ni.

Tichuan, Bharain khawpuiah an ram sana-a dar 9:00 ah kan tum a, Bahrain atangin Jordan khawpui Amman kan pan leh a, Darkar hnih leh a chanve velah kan thleng. 

Kan chuanna tur bus pahnihin min lo nghak a, Nebo tlang lam kan pan a, kan hotu ten chaw eina tura an ruatah lunch kan ei a. Lengpuia kan ei kha a ni mai a ; hmawmsawm kan ei tih loh chu chaw kan ei lo. Puitling thankin tawh vek kan ni a, riltam ru deuh vek kan ni, Upa Thangmawia pawh a ngawi ve mai mai! Tui ti tak leh tlai takin kan ei ta a, nuho pawh an nui peih leh tawh!

A bul hnai mai kha Nebo tlang - Hruaitu Mosia'n Kanan ram- Pathianin a thlir tirna tlang kha a ni. Nebo tlang chu kan han chuan ve ta mai chu a ni a, kan hlimin, kan phur tlang hle a ni. Khawvel ram dang Kristian te nen kan in su l zut zut tan tawh mai a ni.

Khai le, Hruaitu Mosia'n Kanan ram mawi a thlir vawng vawng mai a, Jordan phairuam ni tla tur karah Pisgah tlang chhip atangin a thlir a. Lalpan Gilead ram dan thlengin Napthalo leh Ephraim ram, Manase leh Judai ram zawng zawng chhim lam Jeriko phai ruam Zoar thlengin Lalpa'n Mosia hnenah, "He ram hi a ni, Abraham-a te, Isaka te, Jakoba te hnenah, 'I thlahte ka la pe ang' tia chhechhama ka lo tiam kha, a hmuh zawng ka hmuh tir phawt che, nimahsela, chutah chuan i kal lo vang," a ti a.

Keini ho pawhin Nebo tlangchhip Pisga atangin chuan hruaitu Mosia iangin Kanan ram mawi chu kan thlir ve vang vang ta mai!

November 5, 2023-ah Israel border, King Hussein border an tih chu kan cross fel a, Israel Bus Aircondition-ah kan chhuang a, 'Zion Gate' ah lutin Jerusalem lam panin kan duk par par mai a ni. An kawngte chu kan CM sawi ang deuhin, Rulngan pa ang zuar mai a ni a, Israel Engineer te an thiam deuh pawh a ni mahna, Nge? Rorellai party worker an inrawlh ve ngai lo zawk.

Mi ramah chuan Hotel-ah mipa hlirin hna an thawk a, bazar-ah mipain thil an zuar leh a, dawrah mipa bawkin an nghak leh a, an hmeichhia te hmuh tur an tam lo tlat mai. Kan ramah kan mipa hote - Rangvamual lam panin an tleh dul dul mai a, chu chang a ni lo - Camping Centre hrang hrang kan mu khat del dul mai te mithla-ah a lo lang zut zut mai a, eitur an mamawh, thilpek telin, tawngtaipui an ngai tiin kan tlangau reng mai si a. Aw! mi hnam chuan an nupui fanaute an chawm a, keini chhungkaw tam tak chu kan hmeichhia zawk ten nau kuah chungin ei an zawng, an pasal te leh an fate an chawm a, mutmu pawh tuah hman lovin an phe lawp lawp mai si a! Mizo mipa te u harh rawh u - ka ti a ni.

Kum 2000 liam ta a Israel ten an hnawl Lal Isua Krista chu Mizo hla phuah thiam Rev.  Taisena'n Israel ten an hnawl a, an paih hnu kha, Van Lal reng ro - Pialral lunghlu ka chhar ta a ti hmiah mai a ni.

Lal Isua Unaute ho chuan Abrahama Pathian, Jakoba Pathian Jehova chu an la be reng. Khawvel hnam dangte thlen ve phak lohvah Jehova chuan mal a la sawm em em a ni. Kan fak leh duhna chu an sakhuaah an rinawm em em mai te hi a ni. An kristian san lova, an mosolman san he lo, an Juda sakhua kha an la ring bur mai zawng a nih hi. Keini chu kum 100 a liam meuh chuan kan pherh nuaih tawh mai a ni si. Israel ram chu hna an thawk nasa te khu an entawntlak riau na te chu a ni.