Inzaina room atanga a fapa zaitu Doctor a lo chhuah rual rualin Sally chu a zuang tho a. "Ka fapa chu engnge a an? A tha em? Engtikah nge ka hmuh theih ang? A lo ti sawk sawk a. 

Doctor chuan, "A pawi ka ti khawp mai ka pi,  theihtawp kan chhuah chungin i fapa chuan a tlin ta lo" 

Sally chuan, "Engvangin nge naupang te lehzelin cancer an vei? Pathian hian a enkawl tawh lo em ni? Pathian, ka fapain a mamawh ber lai che khan khawnge i awm?"

Doctor chuan, "I fapa ruang hi i awmpui rih duh em? University a phurh a nih hmain Nurse pakhat a lo chhuak dawn a"

Sally chuan a fapa ruang kianga a awm laiin Nurse chu lo awm ve turin a ngen a. A sam sen theng chu a kutin a chul hauh hauh a.

Nurse chuan, "A sam thenkhat hi vawn that atan i duh em?" tiin a zawt a.

Sally chuan a duh thuin a chhang a. Nurse chuan a han tan chhum a, sarangah thunin Sally chu a pe a. Sally chuan, "A ruang university a zirlaite hman tangkai atana hlan hi amah, Jimmy-a duhdan a nia, tu emawin an tangkaipui thei ang a ti a. Keiin rem ka ti lo zet a, mahse, Jimmy chuan, "Ka nu, ka thih hnuah ka taksa hi engatan mah a tangkai tawh dawn hleinem. Mipa naupang tuemawin, a nu kianga ni khat tal a awm belh  theihna tura tangkai a ni mial maithei asin," a ti tlat a. 

A sawi zawm zel a, "Ka Jimmy-a hian thinlung thianghlim tak a nei a ni, midangte a ngaihtuah fo a, a theih phawt chuan midangte tanpui a inpeih reng thin". 

Thla ruk chhunga hun tam zawk a hmanna Mercy Naupang Damdawi In chu a tawp nan Sally chuan a chhuah san ta a. Jimmy-a thawmhnaw leh thildangte chu a car seat ah chuan a dah a. In lam pana inkhalh haw chu hrehawm a ti kher mai. An in ruak huaia luh chu a la hrehawm zual leh nghal. Jimmy-a thawmhnaw, bungrua leh a sam thenkhat saranga a dah chu kengin Jimmy-a room ah chuan a luh pui a. A car lem leh thildangte chu Jimmy-a'n a dahna thinah chiah zel chuan a han dah ve a. Jimmy-a khumah chuan bawkin a lukham chu a kuah a, lungchhe takin a tap ta zawih zawih a, a tap muhil ta nghe nghe a. 

Zanlai bawrah Sally chu a thangharh a, a bulah chuan lehkha inthlep fel thlap hi a lo awm a. Heti hian a inziak a :-

Ka nu duhtak,

Min ngai dawn tih ka hre reng, i bulhnaia awm a, KA HMANGAIH CHE tih sawi tur ka awm tak loh avang khan ka theihnghilh che emaw, ka hmangaih lo che a ni reng reng lo. Engtiklai pawhin ka hmangaih reng ang che ka nu, nitin a zual zel ang. Engtikah emaw chuan kan la inhmu leh ngei ang. Chumi thlen hmain erawh i khawhar hnem turin i duh phawt chuan mipa naupang enkawl tur lo la ang che, rem ka ti thlap a nia. Ka room-ah khan a awm thei ang a, ka inawmlemna toys leh thawmhnaw dang pawh a ring nghal vek thei ang. Mahse, hmeichhe naupang i duh zawk erawh chuan, mipa naupangin kan duh ang chi kha chu a duh ve lo maithei. Naute lem leh hmeichhe naupang thil i lei sak te pawh a ngaih ka ring. 

Min ngaihtuah avang khan lungngai lo ang che, ka awmna hi hmun nuam tak mai a nia. Ka thlen hlim khan ka pi leh ka puin min lo lawm a, hmun thenkhat min fankual pui nghal bawk a, mahse, hmun zawng zawng tlawh kim tur erawh chuan hun tam zawk hman a ngai ang. Vantirhkoh te hi an fel em em a, an thlawk hi hmuhnawm ti deuhin ka thlir thin. Ih maw, Isua chu a lem kan hmuh thin ho nen khan a dang daih! Ka hmuh erawh chuan amah tih ka hre nghal tho. Amah, Isua ngeiin Pathian hnenah min len pui asin. 

Chuan maw, ka nu, Pathian malchunga thuin thil kan sawi dun a, mi pawimawh deuh ang maiin min bia a. Chutah chuan alawm mangtha tur che leh thil dang sawi tura i hnena lehkhathawn ziah ka dil. Thil tih ngai loh a nih chu ka ring sa a, mahse maw ka nu, Pathian chuan lehkha min pe ta a, a ziahna turin ama pen ngei min hman tir bawk. Ka lehkhathawn rawn petu tur che hi Gabiel-a a nih ka ring. Pathian hnena i zawhna thenkhat kha, a chhanna ziak turin min hrilh a, 'Ka mamawh ber laiin khawnge a awm daih?' tih kha Pathian chuan a pangngaiin a bulah ka awm reng e, ka fapa kros a an khenbeh laia a kianga ka awm reng ang khan, a ti. Ka kiangah a awm reng, a fa naupang zawng zawng englai pawhin a awmpui reng angin. 

Taka, ka nu, ka lehkhathawn hi midangin an hmu ve thei miah dawn lo aw, nangmah chiahin i chhiar thei ang. Midang zawng zawng tan chuan lehkhaphek var satliah mai a ni ang, a tha i ti em? Pathian hnenah a pen hi ka pek let leh a hun ta e. Nunna bu a hming ziah luh nan a hman leh a ngai a. Vawiin tlai zanriah chu Isua kianga thuin ka ei dawn a, a tui dawn tih ka hre sa. 

Ka hrilh theihnghilh tep che a, tunah chuan na ka nei tawh miah lo. Cancer pawh a dam vek tawh. Ka hlim em em mai ni, a chhan chu maw ka natna tawrh kha a na lutuk a, ka tuar thei tawh thlawt lo a ni. 

Hmangaihna nen-
Pathian, Isua leh keimah