Kan hriat angin Mizoram hi Kristian ram a ni a. Kris­tian - ten ro kan rel a. Kristian - ten hna kan thawk a. Kristian- ten politics kan khel a. Isua hnung zuitu rinawm nih kan duh theuhva; kan infuihna pawh a ni. Sakhaw dang kan ngaithei lo va, sakhaw dang bia chu kan ngaisang lova, kan hmusit a. Kristian nih chu nuam kan tiin kan muanpui hle. Kan inchhuang hle bawk. Isua hnung zuitu tha leh fel intiten dawr an kai a, an sumdawng bawk. 

Thianghlimna leh felna a thuam ringtu kan ni. Kan tlatna hmun apiangah Lal Isua hming kan lam kur zut a. Pathian thu kan tuipui satliah lova, kan atchilh a ni ber. Kan hun tam zawk leh kan hun hlu zawk Kohhran tan kan bel zo ti tih thin a ni.

Heti fakau va Kristiannain min luh chilh rual hian thil tha ang reng tam tak a lo chhuak a, thil tha, rotling hmuh tur erawh a tlêm hle thung.

Lal Isua hnung zuitu tha rorelna hnuaiah kan awm  e, kan inti a. Rorelna tha zîk tluak erawh hmuh tur a awm  lo thung si a nih hi! 'Mitdelin mitdel a hruai a, khuarkhurumah an tla,' tih chu a takin a thleng mek a ni. He thu­fing hi kohhran leh ram thilah a thleng mek.  

Thutak pai lo Pastor, nun khawro, nun tla bal Kohhran Upa hi a tam zawk fe kan ni mek! Kohhran mipuite hruai sualin an awm mêk! Mahni hmasial rân chunga tha ber leh thianghlim bera insawi thin kan ni mêk a ni. Belh chian dawl lo nun ruak, tui pai thei lo iptê kan ak vek si! A va hah thlak em! sawrkar hnathawk, a lian ber atanga, a tê ber thlengin sual laka fihlim awm tak maw? nun pawlawh tak hmuh tur kan haih chham lo!

Ram hruaitu luber atanga thlir hian nun belhchian dawl tak, mahni inphat a, mahni rak raih khawpa insâwr chhuak zo hi kan la awm lo. Mipuiin thil thar tha leh tlo, thianghlim leh fel fai kan beisei laiin thil tha ber  hmutu an la awm lo. Danglamna thlen thei Zoram mihhring zingah hian an lo la chhuak lo a nih hi! Mipui beidawngin kan la  siam tluang zel dawn em ni? kristian roreltu kut hnute chu a la bal tluang zel dawn em ni? Hnai lo e, mipui hmaa kan intiamnate chu kan hlen dawn alawm! kan la ti la thei lo cheu a ni chuan keiniho hian ral thum bak hma chhuan tur kan nei hauh lovang! 

Hotute u, in thinlung bawlh­hlawh thian fai rawh u. Hmun thiang hlimah in mite hruai rawh u. Pawl politics khel lo ula, ram mipui politics dik khel zawk rawh u. In thinlung tithianghlim rawh u. Mo tir changkan bansan ula, chenna in ropui thlahlel hek suh u. Tangka sum ngaina lutuk lo ula, engkim chan huamin mipui rawng bawl zawk rawh u. Mahni awmna apiang tha intiin, mi dang thutna kan hmu bawlh­hlawh zo thin a ni ber.

Rorelna chan kan duh luat­ah kan theih loh tur chiang sa reng thlengin mipui pek kan tiam a, Kan sawrkar chuan keini chuan kan ti ve lo vang tiin pawr tak leh ring takin kan au ve, mahse a lo ni thei hauh si lo, lo pawn a tang a thlir a lo ni si lo. A chhung a awm chuan a lo sak talh mai thin si a. Khualliana țan te, in hmuah dur dur te hawn policy te, nepotism- te, departmental work te chu a lar ta hle mai a nih hi! Roreltu Hnam Run chhul chhuak leh Bhawan thisen fa hrinten Zoram mipui min hnuh dante kha, kan chhang kham a, kan luak a ti chhuak a, tan mie chu ngai ah kan nei zo tawh a. An lo ti thin tih avangin mahni kan in thiam chawp a, thil thar tha hmuh tur reng a awm lo.

Mahni party sawrkar lai kan fel bik loh teh reng nen an tihsual hlekin ar a chuk tui lo khawpin bauh ang luih luih a. Thenawmte ui  kawlh, hmelchhe tak ang chauhvin kan inchhuah nek a ni.

Kristian political party, kristian politician țheuh țheuh, ințawngțaisak kan va hlat teh reng em? Ring lo mi te, pathian, ban sawm nei betute ang maiin kan nung  mêk. Kristian sakhaw be lo zingah hian mi tam tak mihring mihrinna  ngaipawimawh an awm a ni. Heng ho hian 'Humanity' an ngaipawimawhin an dah sang a, an dah lal a, an zah em em zawk thin. Khawtlang an veiin an zah a, an mihring pui te an zah a ni ber. India ram state pakhat chief minister phei chuan mei chung khuh na hi a han ngai pawimawh khawp a, he ti hian a sawi a, Humanity is may relation, a ti hial a ni. A mihring pui te a zah a, an thlamuanna turin nasa tak in hna a thawk a ni.

Keini chu Kristianna hi kan sakhua a ni a. Kan sakhua nei tu chu Pathian nung a ni. Kan Pathian chu a thianghlim a, kan Pathian chu a fel a, a dik a, a rin­awm. Ropui tak a ni. A mite tan a nun a pe a. A mite mal a sawm thin a ni. Thihna hlimkawr ruam A miten an zawh laiin an kiang­ah a awm tlat thin a. Thih­na an pumpelh thin a, thihna hial a hnehtir thei a ni. Chutiang Pathian betute chu Mizo Kris­tian te hi kan ni a. Mi thianghlim hnung zuitute chu an thianghlim ve tur a ni a, an felfai tur a ni bawk.