Ruihhloin Mizo Thalaite a tihbuai nasat zia kan hre theuh awm e. Chanchin thar han ngaithla ila, ruihhlo man a nih thu kan hre reng a, kil tin atanga kan do chung pawhin man tur a awm reng a, a kalkawngah kan awm miau avangin kan man zel pawh a rinawm. Ruihhlo avanga a tuartu chhungkuate phei chuan a hrehawm zia an hre chiang a, pawn lam atanga hriat aiin a fiah zual duh hle.Ruihhlo hi thalaiteah a zual tulh tulh a ni ber a, sual do kawngah tan lâk nasat a tul ta hle a, ngaihtuahna sen nasat a pawimawh ta hle awm e.

Mizorama tlawmngai pawl lian ber YMA-in Kumpuan atan 'Ruihhlo Do' a puang a, chak zawka ruihhlo do a nih theih nân Aizawl khawpui chhunga Branch YMA 111-te chu bial (Zone) sawm (10) ah then an ni a, Zone Anti Drugs Squad (ZADS) chak takin kal pui mêk a ni. Min nektu leh do tu an pung zel dawn a, ram tana feh chhuak thin te thlawp tlat hi kan tih tur a ni a, a tul anga puih mai bakah an hmalakna tur te ti thuanawp zawng ni lo va chet hi kan tih tur a ni a. Khawtlang nuam leh ralmuang kan nih theih na tura phut let nei lova thawkte inpekna hi a fakawm tak zet a, a tul ang zelin an chet chhuahna tur te leh an hmalakna turah te i tawngtaipui fo thin ang u.

Excise & Narcotics Department chhinchhiah danin kum 1984 aTanga March 2026 thleng khân ruihhlo avangin mi 2016 an thi tawh a, kumin bîkah mi 19 an thi tawh. Ruihhlo avanga thi chhinchhiah ni si lo hi eng emaw zat an awm ngei ang. A thi te zingah a tam zawk mi 1770 mipa an ni a, 246 chu hmeichhia an ni. 

Kum 1980-ah daih tawh khân Pu Roliana Ralte chuan “Aw Vala, Vala” tih hla lo a phuah chhuak a, ruihhlo phuarna ata tâl chhuak tura Mizo thalaite a chona hla a ni. A hla a lo pian atangin Zoram hian kum sawmnga hmel a hmu tep tawh a; mahse, a hla hi kan la mamawh zual sauh sauh a, hun tha la ngah tak thalaite hi ruihhlo salah kan tâng suau suau a, thui tak thlir tura ngaih thalai lung fing zâwkte hian kan châkna kan hneh lo fo chu a nih hi. Pi Lalsangzuali Sailo pawhin râwlthar ruihhlo bawiha tângte chhanchhuah nân kum 1996 khân "Râwlthar tang fan fan" tiin a lo au chhuah pui tawh a,  Pu Rosangliana (Zorock) pawhin 'Aw Mama', tiin ruihtheih­thil tha lo laka inveng fimkhur turin min lo chah lawm lawm tawh a nih kha. 

Ruihhlo ngai, Home a kan thalaite tam zia hi en ila, hriat pawh a hrehawm hle.  Home lâr zual zingah OKM Home, Tawngtai Bethel Camping Centre leh TNT-ah mi sang chuang an awm reng a. Heng mai aTang pawh hian tan lâkna tur tam zia a hriat mai âwm e. Thalaite hi ruihhlo bawia lut zel lo turin chhungkaw tinin kan rilru kan pêk nasat a, thangthar lokal zel turte tan khawvel tha zawk pek hi kan tum thar a pawimawh zual ta. Ruihhlo tih chhin hi, a bawia luhna a ni chiang hle a. Hetianga tih chhin hlauhawmzia pawh kan inzirtir nasat a, a tul phei chuan khawng zâwka kal a tul ta hle mai thei. 

Mizo thalaite hi Ruihhlo tel lova hlim thei kan ni tih khawvel hriat a puangchhuak tur leh he indona a min kotu kan Pathian duhdan a ni tih hre reng chunga he indona a dopui ni thei theuh turin kan insanmar deuh deuh zel hi kan mawh a ni. Ruihhlo do na kawnga che chhuak ngailo YMA Member nih hi a inhmehlo tih kan hriat thar a, helama kan indona nasa leh zuala beih hi he kumpuan neitu YMA Member-te mawh lian tak ani tih hriat chian hi Mizo thalai YMA Member-te tan tihmakmawh a ni ta e. 

Kan hmalam hunah, Home-a dah ngai thalai kan tlem nan te, chhungkaw boruak nuam zawk kan neih theih nan te, thalai innghahna tlak kan chher pun zel theih nan te, tuna thangthar lo awm zel turte hi kan enkawl uluk an ngai hle. Kan ram kan chhan a ngai a, kan hnam kan humhim a tul bawk. Thalaite nunkawng dika an kal kan beisei laiin, eirûkna lakah kan fihlim a tul bawk. Hengte ngaihtuah hian, ruihhlo laka thalaite an fihlim nan leh sumdawnna tha lo laka thalaite kan fihlim nan kan theihna zawn theuhah tan i la thar zel teh ang u.