Khi tah, kawlvalenchham khawchhak tuipui ral, thim leh eng inthenna ram atang khian thiamna pur chaw turin Ralkapzauva chuan Shillong khawpui a pan ve vang vang a. Chu khawpuiah chuan retheihna leh harsatna chi hrang hrang, rual ute tihduhdahna leh zahna namen lo a tawng a, chung harsatnate chu inbawhbehtir mai loin tumruhna nasa zawk neih phah nan a hmang ta hlauh a, lehkha zir lamah nasa takin a ram tang ta hlauh zawk a ni. 

Theih tawp chhuaha a han beih takah chuan an pawlah pawh a ti tha pawl a ni ta mai reng a, an zirtirtute hriat leh duhsak pawh a hlawh ta viau mai. Mahse, theih tawp a chhuah chung pawhin an pawlah chuan tluk theih reng reng loh mi pakhat a nei a, chu chu bengali naupang Chaudhuri a ni. Chaudhuri chu lehkha thiam thei tak a ni a, an hausa a, a pa pawh ICS officer a ni a, Assam sawrkar hnuaiah dinhmun pawimawh tak a chelh a, bangla nuam takah an cheng a, mi zah an kai a ni. Chuvangin, Mizo naupang Ralkapzauva chuan Chaudhuri chu deh loh sakei huaiah riak a ngai tan ta a, Chaudhuri-a hnuaia pahnihna dinhmun hauh mai chu a chanpualah a ngai nghet ta a, chu dinhmunah chuan a lungawi ti tih ta.

Mahse, an headmaster chuan Ralkapzauva chu a lo tan ru em em mai a, a ko fal a, nasa takin a fuih a, “Mizo tan Bengali tluk loh thu a awm em ni? Hman laiin in pi leh pute pawhin an lu an la thin a ni lo’m ni?” ti meuhin a fuih a. Ralkapzauva pawhin, ‘A ni mai awm mang tak e’ tiin ngaihtuahna thar a neih phah ta a, a zirlaiah chuan nasa lehzualin a insawr bik ta a, tih tak arpa tuihala a han beih meuh chuan an pawlah pakhatna a ni thei ta. Bengali naupang chu a hnuaiah a awm ve ta thung a ni. Hei hi Zikpuii Pa thawnthu mai mah nise he Mizo naupang Ralkapzauva thawnthu hian Zofate tan thuchah pawimawh tak a nei a, Mizote hian kan beih a, kan tum phawt chuan hnam dangte hi kan tluk thei. Kan tluk thei mai ni lovin an chungah kan awm thei a ni tih hi.

Tunah pawh Assam nen ramri-ah buaina kan nei mek a, Assam police-ten thal fang an thlah hmasa a, kan Mizo tlangval huaisenten an chhang let a, hniak pherh vungin an tlanchhe ta a nih kha. Mizo tlangvalte khan zahngai hlauh lo se tam tak an thi ang. Min zuam em em a, ramri-ah mai ni loin kan ram chhungah, kan buzawlah min luhchilh a, an ti lutuk ta a ni. Tunah hian Assam sawrkar chuan ramriah commando 4,000 rual a rawn dah dawn an ti em ni? Commando sang sawm pawh ni raw sek sek, Cachar vai ngal ria an nih chhung chu Mizo tlangval, kan police huaisente hian an hlau hauh lo ang. Hmanah pawh kan pi leh pute chuan Cachar vaiho an run a, an lu an la thin a ni lo’m ni?

Tunah hian ei leh barah min hrek riltam tumin kawngpui an dang chat mek an ti em ni? An duh chen chen min han hrek teh se, riltam chuan tumah kan thi lo ang. Kum 20 chhung ram buaiin a hrual fip tawhte kan ni a, tih tak takah chuan mautuai chauh ring pawhin kan dam khawchhuak thei alawm le! Tin, kan ram chhungah bungrua a lo lut tlem deuh a nih pawhin mamawh titlem ve mai ila, chawhmeh pawh chhawp duah tum lo ila, ram leh hnam chhan nan chuan maian bai, chi leh hmarcha nen chauh pawh puar kan tum ve mai tur a ni. Petrol leh diesel a lo vang ta deuh a nih pawhin kea kal uar hlauh ila, kan hrisel ang a, kan in fit daih zawk bawk ang. Kan BP sang leh zun thlum te pawh a tla hniam rawk rawk mai ang.

A thuhrimah Silchar kawng dan pinte hi eng vangin nge kan hlauh chiam ang? Kan tawrh chuan an tuar ve viau tho ang. Thla hnih khat min han hrek se, an sangha te, an tomato te, an panhnah te tawih hum hum mai se, an in tual vuak duh hial mai ang. Silchar kawng a tlang tha lutuk hi kan intodelh loh phah zawk em? Kumtluanin Silchar kawng hi ping se, ei leh barah tun aiin kan intodelh phah zawk ang. Tih tak takah chuan ram kan nei tha a, kan ramah eng thlai pawh a tha duh em em a, ruahmanna mumal tak awm se kan intodelh em em ang. Tunah hian thingtlang lama kut hnathawkte chuan thlai an thar tan mek a, an thlai tharte hi kan ram chhungah man man zawk leh awmze nei zawka an hralh theih dan ngaihtuahpui an ngai viau a ni. Nikum lockdown laia sorkarin vegetable supply chain a kalpui dan angte khan kalpui leh dan awm se a tha ngawt mai. 

Ei leh bara kan intodelh ngat chuan tun aiin kan huai ang a, Assam sawrkar pawhin min nuthuri zuam mai tawh bik lo ang. Kan intodelh a, kan ram a him phawt chuan media lamah chuan duh tawkin min lo sawi chhia se, hring ei ang pawhin min lo chhuah ang hmiang, kan ram leh hnam a him phawt chuan chu tluka hlu chu a awm lo ve. Lu la hnam ti pawhin min lo sawi se engnge pawi? Kan pi leh pute chuan hringchar vai lu an la thin tak tak tlat alawm.