He column-ah hian eng eng emaw ni ka ziak ta zeuh zeuh va. Ka article chhuah ni lâ lâ a, chhiar tute kâ atangin lawmpuina aw ka hre thin a. Hetianga chhiartute hnen atanga thu hla han dawn hian keini ziak hram hram tute hi kan lo hlim ve em em thin a. Chung fak derna aw chuan nasa takin min ti phur thin a nih hi!. Hmanni khan 'Nun Tam' chungchang ka sawi a. Mihringin a kan mamawh ber chu Nun Tam a ni a. Nun Tam chu nungchang tha leh tlo, belhchian dawl, nghing ve ngai lo, rinawm leh taima, mite tana malsawmna ni hliah hliah hi a ni, kan ti thin. Dik pawh a dik reng a ni. 

Sum leh pâia mi hlawhtling, hnathawh leh eizawnna a ni 1 hlawh tam tak miten an nuihzat tlat hi kan awm teuh bawk a. Nun hi sumin a siam tha thei lova, beih vaka siam that theih a ni hek lo. Amah mihring bawkin a insiam tha thei a ni. Eng ang pawhin midangte bân chakna ringin bei mahse, amah siamtha theitu chu amah atanga tum ruhna awm Pathian pek chu a ni. He hringnun hi a lo ho khawp mai! Kan chak that lai chuan chuai thei lo tur, tawp thei lo turah kan in ngai thin. Awm pawh a awm viau a ni. Kan chak that lai chuan kan theihna a sang a, kan taksa a mar tha a, kan ti tuai a nalh a, mawi pawh kan mawi narawh e. Engkim ti thei a inngaiin kan zuam a tam a, kan zuam a zau! Kan zuan a zang a, kan kal chak a, kan tlan dawr dawr a nih hi!. Rit kan chawi rit thei hle a, zawh loh nei lo ang hiala inngaih chang pawh kan nei hial âwm e. 

Thil ropui kan hisâp a, thil ropui tih kan châk, 'Kei ka nia lawm' tiin tih theih loh neih chu tlâwmah kan la thin. Aia upa zawk, kum tam zawk, an vun pawh lo chuar ve tan tawh te chhoh en a hnehin kan chhuk en a, kan hmusit titih a. Tuna ka kum zat hi a kum a nih lai chuan kei aiin a nalh zawk, chak pawh a chak zawk tih reng ngaihtuahna chang kan hre der si lo. Mahni lo maha a vanglaia tlangval chhuan­awm, khawtlang en rawn leh khawtlang roreltute innghahna a nih vei nen, tuna taka he tlangval ve mai mai hian a han hmuhsit chu le, tih thinlung chhe pu hi hmuh tur tam tak kan thalai zing­ah an awm. Hneh theih loh ngah em em lei mihringte hi kan ho hlawm khawp mai. 

September 25 tuk a lo thleng a, phur takin ka tho a, ka inphih bawrh bawrh a. Ka insiam sawk sawk a. Kan awmna hi chhuah lam a nih avangin ni lo chhuak pawh kawl eng nen lamin a thlirin a hmuh theih a. Khawchhak lam ka han thlir a, ni chhuak hmuh tur a awm lo. Khua a duai a, chhim lamah ruah leh thli pai ni âwm tak chhum chhah tak zau taka in zar pharh mek erawh hmuh tur a awm. DDK-ah tlai lam dar 5:30 a tanga  hun hmang tur kan ni a. Muang marin ka inpuah chah zel a. Ka chhungte pawhin min phurpui a, hun tha min pe in boruak tha tak,  inbuatsaihna atana duhawm tak ka chang zel a ni. 

Hun a kal zel a, chutih rualin khaw chêngin min nang zui chho nghal zel a. Chawhnu dar 3 velah chuan ka partner tur nen chuan inzai zelin kei pawh chu ka theih ang tawka ulukin ka inchei ve a. A hun a hnai tulh tulh a, ruahpui van awn kan tih ang hi surin a baw ta tlawrh tlawrh mai. A sur nasa ropui lutuk, hmun hrang hranga mihring kan buai leh tan. Tlai dar 5:30 a kan programme pawh chu kan va hmang thei âwm love. "Durtlang - Bawngkawn kawngah lung lumin car a delh, Durtlang kawng a ping, tihte chu kan chanchin hriat awmchhun a ni zui  ta zel a. 

Kan thupui chu 'Khawpui khawsak man leh thil man tihziaawm nan hmalak dan tur' tih a ni a. A kawnsumar viau mai bawk a. Consumer-te vei ber pakhat chu thil man to hi a ni a. He lama lo inhmang mi ve deuh keini tan pawh hian a chakawm lehling phian. Khawpui, a bikin Aizawl hi namen lovin a thang chak a, tunah hian mi 4.5 lakh vel kan cheng mek a. Kumtin 2 percent velin kan pung bawk. Chhungkua pawh sing 6 zet kan ni mek bawk. Mizoram thau(sum) hi Aizawlah hian a tam zawk a luang ral mek a ni. Khawsak a hautak hle a, khawsak a sang hle thung. Inluah man a tovin a sang hle a, zirna leh thiamna lei a ngai a, khawsakna man a to hle a ni. Chet vel a hau tak a, transport system a tha lo hle bawk. 

Sawrkarin regulation siam bawk mahse, private regulation - in zawm a hlawh zawk bawk. Thingtlang hmun kil tin kil tang atangin kumtin sang eng emaw zat an pem lut ruih ruih a; hausate tih ang an tih ve a tulna lai a tam! Sap sikul mi rethei pual a awm loh avangin sap sikulah an fate an dah a tul ve ta thin a. Health Care lamah sawrkar khalh a awm tlem avangin private khalhah kan inhnangfak lo thei lo. Chuvangin khawpui chhunga chen chu sum thuni a ni ber a, sum thun tur nei lo tan erawh ba hmun siam a, rethei in sak a ni ringawt. 

Nia, khatia DDK Durtlang pan tur ka insiam lai khan ruah chu mi run luih an hrimin ala baw tlawrh zui zel a, kei pawh ka insiam chhunzawm zel a. A tha thei ang berin in siam, nalh pawh ka inti ve khawp! A hma zan hian DDK a kan hun hman tur mut hmunah ka ngaihtuah a. Dur­tlang kawng, lung lum fo, min fo, motor tangkhang fo ka ngaihtuah a, ka hreh phah ta em em mai a! Mahse, he rilru hi chuan min tibuai rei lo. 

Tichuan, DDK lama an hotupa Andrew-a leh Dr. Daniela te an inbia a. Kawng a pin thu  min hrilh a, kal tho kan tum. Programme thulh thei kan ni lo. Programme sawn a rem lo, kan ti bur mai a. Keini thian dun phei chu kan lo intiparh ve tawh mai si a. 

Mahse, Electric Veng kan thlen lai chuan 'Bawngkawn atang­in motor a jam vek tawh, a tlang theih loh hrim hrim, thulh mai ang u' tih chu kan thu tlukna a ni ta! Hun remchang hmasa ber atan kawng ping ngei awm tak chuan min thulhtir a ni ber e. Lei mihringte hi kan lo thû lo teih teih khawp mai. Kan Pathian hi a lo thu ber e. Keini hi chuan kan nunah hian sawi tur kan nei ve der lo, tih hi ka chiang ta tulh tulh a. Pathian kuta innghah hi a lo tul ber mai, Ka tih phah a, ka vui lem lo!