KHAWTLANG LUNGLEN

Thanglai Pa - Oct 27, 2022

Pipu te hunah khan nat lawkna nei em em lo in thihna an tawh thut thin hi 'Za chham lak' an lo ti a (khuanu hian nitin mi za thi turin a ruat lawk a, mi za thi tur an awm tlin loh chuan dam tha lai zinga mi mithi za an tlin nan a la tel thin ah ngaiin 'ZA CHHAM LAK' an lo ti ve reng thin

Tun tum chu "Khawtlang Lunglen" lam hi bihchian i lo tum ila. Khawtlang lunglen hi Mizo mi nawlpuiin kan hriat lar na ber nia ka lo hriat ve thin chu Mizo hmeichhe ropui Lalsangzuali Sailo in "Hei hi maw an sawi khawtlang lunglen, a len hian kei zawng a leng vawng vawng" tia 70's chho vela thiam tak maia Zoram tlang tin a nghawr chhuah khan kan nunah khawtlang lung chu chiang uar in a pho chhuakin ka hre thin. 

Heti hi a nih vang hian zirlai leh exam dangah pawh "Khawtlang lunglen hi han hrilhfiah teh?" ti se "Ngaih bik awm lo leh lunglenna bik sawi tur nei si loa khawtlangin kan lung a tih len em em hi khawtlang lunglen chu a ni,"…. tih ang lo a chhang chu mark hmuh lohna a nih mai hmel.

C Sanga (zaithiam) kha a tleirawl chhuaha rimawi lama lo in kaihruai tawh thin kan ni a. Mi pawi sawi ngailo leh min ngaina ve em em tu a nia, kei pawhin nau ena ka en bik a ni nghe nghe a. Zoram chhung leh state pawn thlenga zaia lo inzui ber tawh thin kan nia. Tlai khat chu Treasury Square atanga Venghlui a ka tlan thla kha Upper Republic thlen hma hian C Sanga nen chuan kan in hmu hlawl mai chu ka ding a. Chutia kan han inhmu chu ka tlan tlang leh mai chu a phal ta reng reng lo mai. Kan zin tawhna te chu a sawi kual char char a (Scooter ke hma chu a ke in a kar cheh a). Darkar chanve vel zet kan in din chilh hnu chuan, "C kan kal tawh tak tak ange" ka tia. Min chelh din reng inthlahrung deuh chuan, "I scooty ang hi ka la chuang lo kan chuang kual zawk a nge," kha a tia an va chuang kual leh a, a lo kir chuan min chelh reng kha nuam a ti tawh bik si lo, mahse a che zia ah chuan min ngai em em tih kha a hriat hle a (kan zin te hian khum khatah kan mu mai zel thin kha nia).

Kal ka tum ta tak tak chu ka scooty chu ka tinung a, C-a chuan "Leh lawk U Matlan khawhar chhungte pual" a ti a, tichuan ani chuan khawhar hla 'An leng siau e, an awi lal nunnem a' tih hla kha a sa a, kei Aprillia scooter a chuang chungin ka hmai bulah a hmai rawn dahin khawhar hla sa chung chuan a phone chuan kan selfie dun a. Ka kal thei tawh tak tak emaw ka tih tawh hnu chuan "E leh lawk, naktuk chuan Tlumtea hruaiin lo leng ngei ngei ang che, Pung Punga nen an inkawm a ngai a nia" a tia kan In-a a lo len chang hian pug (uite) ka neih hi a lawm thei lutuk a, ka ui hming chu "Tlumtea" a nia, chuan ka ui ang chiah pug tho chu a lei ve a, Pung Punga tiin hming a phuah ve a. Tichuan ka tlan haw ta a, ka rilru te te chuan "C-a chu kan inzui ve nasa in kan in duhsak tawn thin si a, min ngai ve hle a nih dawn hi" te ka ti rilru mai mai a.

Vawikhat pawh ka thianpa hi a na hle mai a, Civil Hospital ah a awm a, ka thianpa chuan mu reng chung chuan C. Sanga hla sak thin 'Mahse biah zai nem ten min chhang lo hian maw, sir ah min hnawl ka hlau leh si' tih kha a sa hlurh hlurh reng mai a. A tukah chuan Civil Hospital ah chuan C-a nen chuan kal dunin ka thianpa damlo chu kan han zaipui alawm, ti khawp chuan kan in ngam dun thin kha nia.

Venghlui C Sanga te veng leh kan In Upper Republic hi a in ep tha hle a, zanah tui taka mu in, a tuk zing ka la thoh chhuah chiah loh lai chuan Venghlui Information Centre atang chuan Pu C. Vanlalsanga thih thu chu an rawn puang ta mai. Kha tuk zing zet kha chu ka tan zing tihbai awm tak a van ni em. Tun thleng hian ka bengah Venghlui Information-a an thu puan kha a la cham reng mai chu nih hi, a mi den a na duh kher mai. 

Pipu te hunah khan nat lawkna nei em em lo in thihna an tawh thut thin hi 'Za chham lak' an lo ti a (khuanu hian nitin mi za thi turin a ruat lawk a, mi za thi tur an awm tlin loh chuan dam tha lai zinga mi mithi za an tlin nan a la tel thin ah ngaiin 'ZA CHHAM LAK' an lo ti ve reng thin (Thihna hming pakhat angah an lo hmang a nih thin kha). Hetianga thi thut tur te hian an mahni ah danglamna mak tak neiin an tlawh ngai loh te an tlawh kual ruai a, engkim mai chuan an lung a ti lengin, an phi ruai ruai thin niin ngaihbel tur hi a awm fo mai zawng a nih hi maw. Hetianga mi tu emaw a lo awm thin hian alawm Pipu ten "A lo hetih dawn vang anih dawn hi 'KHAWTLANG LUNG LEN' a nei khan ka hre reng a" an lo tih thin.

Share now