Bangladesh a Sunni Muslim chhungkuaa piang ka ni a, ka pa, sipai general, intelligence service lama thuneitu hnen atang chuan inkhuahkhirhna hautak zet ka tawng chho a. Sipai lalte leh an chhungkuate chenna tur quarters lian pui puiah kan khawsa thin. Chhiahhlawh ten kan mamawh zawng zawng min tih sak bawk thin. Bangladesh leh Pakistan rama politician lawk ten kan in chu thil tih khawm nan an hmang fo va. 

Muslim sakhaw school-ah kalin quran kan zir thin a, tin arabic tawng hlui imam-in (Muslim sakhaw puithiam) min zirtir bawk thin. Ka pa chu thlahtu lamah Jordan lal ram awptu hashem ho atanga lo chawr chhuak a ni a. (hashem hi zawlnei muhammad-a tuchhuan kal zel ni a ngaih a ni) A pian leh murna atang rengin kei pawh Islam sakhaw hmuchhuaktu thlah kal zel ka ni ve tihna a nih chu. 

Min thlahtute avangin kei pawhin mi zah ka kai phah hle a. Chutih rualin ka naupan laiin erawh hun hrehawm tak ka tawng a, ka nu leh pa an inthen a, rin loh takin ka pa-in nupui dang a nei leh ta mai bawk si a. Kum 8 mi ka nih chuan hawisan ni riauva inhriatna ka nei a, ka nu ka ngai thei hle.

Ka nuhrawn chuan ka rilru leh taksaah tawrhna min thlen fo thin. Anchhia min lawh a, cricket khelhna wicket tiangin min vua a, a tin hriam tak chuan ka bengah a ham a, a thi fo thin. Ka taksaah na neuh neuh ka nei deuh reng thin. Ka pa hnena ka tlan tauh ve chang lahin dawt sawia min puhin vuak ka tuar fo bawk. 

Kum 13 ka nih chuan air force college hmingthang takah lutin, ka pa anga mi hmingtha nih ve ka tum a ni. Amaherawhchu, kum 1975-ah kum 21 ka nihin ka chhuah san leh ta a. Ka naupan laia in chhunga ka thil tawn avanga ka rilru hliam la dam si lo chuan, a hniam zawngin min kal tir a. Mahni intihhlum duhnain min tibuai hle. Tichuan, tum lawk lohva thil lo thlengin ka nun a thlak danglam ta vek mai a ni.

Pakistan a khaw lian ber dawttu, Lahore kawtthlera electric heater lei tuma ka kal laiin, mingo pakhat hian Pathian thu inziak tract/lehkha a sem lai hi ka tawng a. "Tu nge i nih a, khawi atanga lo kal nge i nih?" tiin ka'n zawt a. 

Lal Isua chhiahhlawh England atanga lo kal a nih thuin min chhang a. Jesus People Movement pawl, kawtthlera chanchintha hril a vak vel thin, kum 1970 chhova khawvel hmun hrang hrang hrut kual thin zinga mi a lo ni a. Muslim sakhaw vuantu ka nih angin Isua ka hriat dan chu Mohammed-a hun hma lam zawlnei tih a ni. Kross-ah a thi tih te chu ka awih hauh lo, Juda hovin an khengbet zawk niin ka hre nghe nghe. 

Kan inbiak lumlam viau hnu chuan, he sap pa hi Keith-a a ni tih ka hria a, ka kir leh hmain yard 50 bawr vel ka kal sawn hman a. Muslim sakhaw vuantu ka ni naa a sakhaw chungchang chu hriat belh ka chak ta tlat a. Isuan min chhuah zalenin nun thar min pe dawn tih Keith-a chuan min hrilh a. A Pathian chuan ka harsatnaa min tanpui a inpeih tih chu ka ringhlel deuh naa, mipui zik huai huaina kawtthlera, pheikhawk dawr kiangah chuan Isua hnenah ka tawngtai ta a.

Hei hi a ni ka nunin a zawn ngei chu tih ka hre thei. Lung lian tak ka phurh lai lak sawna zang ta huai ang mai hi ka ni. Thil zawng zawng chu mawi em em vekin ka hmu a, hlim taka zai vak ka chak hle. 

Islam sakhua ka thlauh thlak avang chuan, kan chhungkua ka tihmingchhia a, rinawm loh avanga tihhlum mai pawh tawk thei ka ni. Hetih lai hian ka thiante nen Lahore-ah kan khawsa ho va, Isua ka nuna ka pawm thu ka han sawi chuan an thin a rim hle mai. Ka pa, muslim ruh tak mai, nitin vawi 5 mecca lam hawia tawngtai ziah, inkhuahkhirhna tha tak vawngtu hnenah ka chanchin chu ziakin an thlen ta a. Kan sakhuaa ka rinawm lohna avanga min zilhhau turin Lahore-ah a lo kal nghal a. A thiante min zilh tur a ruat bakah hawi kir leh turin min ti nasa hle bawk. An beihna in awmzia a nei lo tih an hriat chuan rilru lam enkawlna damdawi inah min dah ta a. 

Kar 2 chhung chu damdawi inah chuan awmin, sipaiin min veng bawk a. Chhiar tura thuthlung thar bu ka ken luh ruk chu chhiarin nuam taka hun ka hman mai bakah mi eng emaw zat chu Lal Isua lam hawi turin ka tanpui bawk. Pathian hnathawh a lo thleng a, rilru daktor te chuan chian lohna ka nei lo tih fiahin, min chhuah tir ta a ni. 

Ka pa chu a thin a ur hle a, Multan, Pakistan a Punjab chhim lama a inah chuan chhuak thei lovin min hreng a. Sipai silai keng venna hnuaia kar eng emaw zat khung ka nih hnu chuan bus-in ka kristian thiante awmna hmun Lahore-ah ka tlan chhuak thei ta a. Police ten min zawng tih ka hriat chuan, Karachi lamah tlanin, thuhriltu pawl ka va zawm ve leh ta a. Dinhmun khirh taka awm chung chuan, Bible chu a eiin ka ei duak duak a ni ber mai, rinnaah pawh ka thang nasa hle. Ka by heart a, testimony sawi fovin, Bible tract ka sem thin bawk a. 

Kawtthlera kan rawngbawlna chu kum 1976 tir lama, ka pain a thil tih theihna hmanga hma a lak hma chuan, a thang ve zel a. Police ten kan zinga mi 5 Islam dan kalh zawnga che tiin min man ta a. Jail pindan te takteah tawt zetin min hnawh a, luak khum hnu blanket sinin chhuatah kan mu a, no te reuh te inthiar nan min chhawp bawk.

Ka tan pui mi 4 te chu ramdang mi an ni a, ni rei loteah an chhuah a, an ramah an thawn haw nghal bawk. Ka ID card leh passport min hren sakin, "Muslim i ni tawh tur a ni lo, a nih loh chuan i thi ang" tiin min vaukhan a. 

Kum 1977 ah chuan ka pa-in kristianna bansan turin min nawr chep leh ta hle a. Kan sakhua ka hawisan avanga lu tan hiala min vau takah chuan, loh theih lohvin Pakistan chhuah san a tul ta, thlan tur dang ka nei ta lo a ni. 

Kan ram ka tlan chhiat san buai vel hian thla sarih zet a awh a, hetih chhung hian Pathianin engkim min ngaihtuah sak thin. Thinlung inhawng tak, mi fel tak tak ten thahnemngai takin min tanpui fo thin a ni. Kabul atang hian Turkey, Russia, Belgium leh Holland te paltlangin a tawpah Sweden ram ka lut ta a ni. Sorkar nena eng emaw chen kan in chhaih kual hnu chuan, a tawpah politics avanga raltlan inhumhimna zawngah min pawm thei ta a.

Sweden chu ka in thar a ni ta. An tawng ka zir a, Evangelical Lutheran kohhranah lawiin hetah hian kum 1979 a nupuia ka neih tak Brita-i nen kan intawng nghe nghe. Uppsala a muslim pem khawmte zinga rawng ka bawl hmain, Torchbearers international Bible School, Holsby-ah ka zir hmasa phawt bawk. Ka nupui Brita-i'n nurse hna a thawk a, keiin office pakhatah tihfai hna ka thawk ve bawk. Bual in leh chhuat ka nawh fai lai te pawhin Pathianin min hmang duh a ni tih ka tawng ta zel a. 

Lahore a ka awm laia, khawvel puma Lal Isua chanchin tha hril tura min kohna atan, min buatsaih zui zel a ni tih ka hria. America ramah Bible zir turin kan kal a, kum khat hnuah let lehin Word of life Training Centre, Uppsala-ah kum 4 zet zirtir hna ka thawk zui a. 

Kohhranah nasa takin ka inhmang a, university hrang hrang zirlaite zingah kawtthlera rawngbawl leh damlote tawngtai sakin hun ka hmang thin bawk. Rawngbawlna zau zawka ke pen tura kohna ka dawn chu kum 1983 a Poland rama ka awm laiin a tak ram a lo lang tan ta a. Nupa pakhat, a mamawhte tana eitur motora phur te hi ka kal pui a. Catholic thalai camp ah thu ka sawi a. Sawmna siamin stage chu mi tam tak leng thei turin kan buatsaih a, thalai thahnem takin Isua hnenah an nun an hlan a ni. 

Hemi hnu lawkah hian Dynamies World Ministry pawl ka din a, Asia, Africa leh Latin America rama rawngbawlna atana bul tanna a ni ta nghe nghe. 1993 ah kan headquarter chu Lancaster, Pennsylvania-ah kan sawn a.  Kum 40 kal ta chhung khan, hnam hrang hrang 75 zet zingah rawngbawlna hun remchang ka nei a, Asia, Europe khawchhak lam leh Africa-ah te kohhran eng emaw zat kan din bawk.