Kan ti dawn dek dek emaw ka tia, Khrismas a lo hnai leh ta khawp mai. Tun tum chu kan tleirawl lai, kan thengthawn ve laia Khrismas kan hman dan ka’n ziak ang e.

Mission Veng (Aizawl)-ah sawn hmun 3-ah Khrismas ruai kan theh tlangpui, (a) Tlangbawk Vengah, (b) Venglaiah leh (c) Dawrkai Vengah. Kei chu Mission Venglaia khawsa ka nih avangin Venglaiin tute emaw, mi inphal inah kan hmang thin. Kohhran hi chuan ama programme a siam ve mai a, biak in programme tibuai loin khawtlang pawhin programme a siam ve mai.

Khrismas hma thla hnih velah khawtlangin thing kan phur a, a pui a nawiin kan thawk a ni ber mai. Thing kih, tan leh eh chu tlangvalin an tum vek a, a phurh hawn lam erawh chu nulain an tum thung. Tum khat chu kan thing kih chuan tang a nei mang si lo a, val upain, “Nula pakhat leh tlangval pakhat inkawpin phurh tur dap mai teh e,” an tia, Ramveli leh Thanchhingi chu Rinthanga (Sapthlenga) leh keiin kan pawp a, thing chu kan zawng ve ta a. Vanneihthlak deuh maiin Hnahthap ding ro, kan phurh zawh tawk awm vel hi kan hmu hlauh mai a, kha kan phur tha ber awm hial e!

Tum khat leh chu Vaivakawn ral, Shriman tillah an tih thinah khan Sapthlenga nen bawk bawng kan zuk zawng a (khalai khan tin vel khat siki (1/4 of rupee) niin ka hria. Kan zu innaah chuan Gorkhali nula, hmel tha zet mai hi a awm a, a hming chu RUNCHI tih a ni. Cheng khat chauh ka nei sia, kan in a, kan zawng a, kan va lut leh a, kan in leh thin, a hmel hmuh châk avangin. In kan thlen hnuah pawh Zokhumi (w/o J.Lalsangzuala) leh Thangliani (w/o Bawihchhuaka) te nen chuan a tawp thlengin RUNCHI tiin kan inko. Tun hnua ka hriat danin RUNCHI tih chu Tahbelh tihna a lo ni leh fangin.

PHE tih angrengte hi a hming pawh kan hre phak lo. Tute emaw tui bel kan hawh khawm a, tlang tuichawi zan kan siam a, hmeichhia tawh phawt chuan tuium an rawn lek chhuak a, a te deuh chuan um hnihte an khirh a, mipa naupang lam thung chuan meichher an buaipui a, tui chawi kawngkam palin a tuar duh khawp mai!

Urlawk zan (24th Dec) hi chuan zai tlaivar hi kan tum tawp mai a ni ber, naupang lehzual chuan hla hre hek lo ‘U AM’ hi kan sa tlut tlut mai thin. PHE-te la awm hek lo, tui bel hawhkhawmin (chutih lai chuan tui bel nei lo kan la tam khawp mai) daih loh changte a neih phei chuan urlawk zana tui han chawi leh rihte a tul thin. Tlangval hawklakl tan chuan leh veng dang nula ngaizawng chuan mahni venga tleitlak harsa tak niawmin an sawi! Kei pawh hi veng danga ngaihzawng nei nasa pawl ka ni (min ngaizawng ve lem lo). Chuvangin, mahni vengah Xmas zaikhawm velah ka tam lo khawp mai.