Khrismas lam thu bawk aw... Ka hriat ve theih chun (1936) vela Mission Vengin Khrismas kan thlen dan tlangpui chu, November thla tawp lam vel atang khan puitling zawkte’n Khrismas thlengtu tur an lo ngaihtauh a, pa lungleng deuh chuan, “Kumin chu kan lo thleng ve ang e,” an ti mai a (a nih loh chuan Chhungkaw tlawmngai tur an dap mai thin). Tlangval tlawmngaiin thing ro, Khrismas leh Kumthar chhung daih tur an zawng a, chu chu December thla tir lamahte nula leh tlangval leh naupang zawng zawngin kan phur a, Masi thlengtu tur inah kan keuh ruih ruih thin. Khrismas dawn ni 10 vel a la awmin tlang tui kan chawi a, mi inphal tuibel hawh khawmin kan chhung thin. PHE tih ang reng te a la awm loh avang leh tuikhuah neihte chu thil harsa a nih avangin tuibel hawh ringawt pawh thil awlai tak a ni lo. Thal a lo ni tawh a, veng tinin kan chawi avangin tui a kang a, kan tlaivar lo chauh fo mai nia (Ka hriat sual loh chuan Dawrkai Venga Pu Kaphnunan 1937-ah tuikhuah (water tank, cement-a siam a nei a, keini (Ch.Pasena 1938-ah, Pastor Chhuahkhaman 1938) chu chu tuikhuah, tuikhawlna nei chu kan ni mai).

Mission Veng chuan dan naranin hmun thumah Khrismas kan hmang thin - Tlang bawk Vengin hmun khatah, Venglaiin hmun khatah, Dawrkai Vengin hmun khatah, Khrismas/Kumthar thlengtu nih hi thil awlai lo, chhangchhiatthlak tak a nih avangin a thlengtu chu veng khata mi tha an ni chawk mai.

Tlangvala pum pa, mahni venga ngaihzawng neih loh chuan zan tui chawi tih ang lai vel phei chuan VENG DANG SIAL hi kan ni deuh ber mai. Tuikhur tui a kang a, tlaivar dawn dawna nghah a ngai si a, Tuikhur vel kha nu leh pa awm loa inrimna remchang em em, a chang phei chuan ka chhanga love letter inthawnna remchang tak a ni thin. A to ve lo, keini ang duang thung chu, tuikhur vela thing tang zawn khawm chu kan duty a ni mai. Hetia ka type lai pawh hian Sakhisih tui kang nghah ka hre vawng vawng mai. Ka thik teh asin. Kei chu kan veng nula min duh der eih pawh awm hek lo, veng dangah ka tlei zawk mah thin.

Tum khat phei chu mahniin Cheng 1/- thawhin veng dangah masi ka hmang daih nghe nghe. Dik tak chuan tu pawh inphalrai (zalen) lai deuh a nia, thing phurh/tui chawi chu a hrehawm lo tak meuh a ni. Tlangval tan chuan mahni ngaihzawngte nena tui kang nghah tluka nuam awm pawhin ka hre lo. Min diptu, an chhungte awm hek lo. Khang hunte kha tun lai thalai chuan in tawng ve ta si lo a, Lungli, Darnam, Sakhisih, Lungrem tuikhur tihte kha tun thleng mai hian, lunglen khawhar chang chuan ka ngai vawng vawng thin. MAK tak maiin Pathianin dam reina ti mai ila, kum 90 thleng thleng min pe. Ka rualpui, ka kawm thinte an boral zo ta.