Vawiin chu mi mal thu hla ka han sawi mai mai teh ang. Kum sawmpali kal ta (8th October, 2008) nimin angah khan kan nu nen hian Pathian hminga damchhunga awm dun tur leh rawng inbawlsak tawn tura intiamin  kan innei a. Hman ni lawk emaw tih laiin nimin kha kan inneih kum 14-na champha a lo ni ve ta reng mai. Dam chuan hun leh ni te hi a kal chak mang tak e maw!

Kan inneih kum 14 chhung hian lawmna leh lungngaihna te, malsawmna leh vanduaina te kan nupa hian kan pal tlang ve ta zauh zauh mai. Lungngaihna leh vanduaina kan tawh te hi min ti pumkhat zualtu ni se, lawmna leh malsawmna kan dawn te hi kan inhmangaihna tizualtu atan hmang thei zel i la a va tha dawn em. Fa kan awt em em a, kan inneih atanga kum ruknaah fapa kan han nei a, kan lawm teh asin. Pathian min pek ngeiah kan ngai a, a hmingah pawh Isak Vanlalpeka kan sa nghe nghe a ni. 

Kan fapa Isak Vanlalpeka hi a han lei kang deuh a, nau a awt ve em em mai a, kan tihtir pawh ni hauh loin tum khat chu kan varanda kilah hian a lo tawngtai a, mawlmang takin, “Lalpa, min khawngaih la, a nu pum chhungah hian naute lo dah ang che,” a ti a. Van Pathian chuan rilru thianghlim taka naupang tawngtaina chu a lo hre nameuh mai a, a tawngtai hnu lawkah a chhang tur chu kan pai ta tak tak a, a u chuan a awh em em nau a nei ve ta a ni. A u nen hian kum ngain an intlau a, a nau hi tunah kum thum a ni dawn tawh a, a chhang tur erawh kan la pai ta rih lo. Pathianin tul a tih chuan a chhang tur pawh min la pe leh mahna. Pathian thu thu ni teh se.

Rilru lam zirmi te chuan ‘Nupa nun hlim hi fate tana damdawi tha ber a ni’ an lo ti a, a awih awm khawp mai. Keini nupa pawh hian kan fapa hriat lai leh hmuh laia inhauh loh hi kan tum ve fan a, tum tlat chuan a tih theih khawp mai. Tin, dam chhung tawi tê hi inhauh nan leh innghirngho nana hman reng mai hi a fuh lo ve hrim hrim. Nupa kan hlim loh chuan chhungkuain a tuar a, fate nun a nguai a, an hlim lo a, chhungrilah thlaphanna an nei thin. Nupa kan hlim dun a, kan inhmangaih chuan faten nuam an ti a, an thla a muang a, inrintawkna nen khawvel an hmachhawn thei thin. 

Mahni kawpppuite rel ching, mi hrang hriata an tlin lohna sawi zut zut ching ho an ngaihsan awm loh ka ti thin. Kan khawppuite kan rel fo hian kan kawppuite kan timualpho a, keimahni pawh kan intimualpho bawk. Kan nu hian min rel ngai lo a, ka chanchin hi a chhe zawngin mi hrang hriatah a sawi ngai lo ve tlat. Sawi duh se chuan sawi tur a ngah khawp ang. Mahse a sawi ngai lo a, a zarah mi pangngai angin ka lang chhuak ve mai a nih hi. 

Tin, intihthiam loh hleka chhungte hnena zualko zen mai pawh hi thil tha lo tak a ni. Tuk zan a lo tam a, han inhauh chang leh thu inbahfuh loh chang chu a awm ve bawk ang. Chutiang a awm hleka chhungte hnena zualko nghal sek maite hian nupa nun a tiderthawng duh a, chhungte kan timangang bawk. Nupa na na na chu kar loah kan intithiam a, thinrimna pawh a reh leh mai a, thu tak hla tak a nih loh chuan lungawi lohna te hi chhungte hnenah te hian thlen sek lo i la a him ber. Kan nu hian (kan ti lehpek ang e) a chhungte hnenah hian min rel ngai lo. A chhungte aiin ka chhungte hi a ngaihtuah zawk mah thin a, ka chhungte pawhin kei ai hian an phone zing zawk daih. 

Tirhkoh pawla’n, “Hmangaihna ngawt lo chu tuma engmah ba suh u,” a ti a, nupa nunah pawh hian hmangaihna ngawt hi chawi sang i la, i vawng nung zel ang u. CFL Hmingthanga’n- 
‘Tlin lohna zawng zawngte inngaidam tawn a,
Felnaa inruat tawn zawkin, 
Hmangaihna chauh hi kan karah ding reng se
Lei dam chhung ni chhiar dun zel turin,
Hmangaihna chauh hi i vawng zel ang aw’
    - ti dun zel ang aw ka thai Mampui!