Mizoram dinhmun siam that duh, ram leh hnam vei tak takte hi an vei dan a inchen lo khawp mai a, an vei chin pawh a inang lo zung bawk. Thenkhat chuan kan ramin chhiatna leh harsatna a tawh hrang hrang sawi tur kan hriat viau lai hian a siamthat dan tur ngaihtuahna an seng phak lem lo a, kan ram hruaitute zingah pawh thil tha tih duh viau anga lang, ti thei lem lo leh hmalak dan tur haihchham hmel ve tak tak an awmin a lang. Hmanlai atanga tunlai thlenga Zofate chanchin (History) han chhui let hian Pathian hruaina duhawm tak kan chang thin tih hi hai rual a ni lo a, ram leh hnam din chhuahnaah hian mihring chakna leh thiltihtheihna piah lamah Pathian a inrawlh thin tih pawh history-ah hmuh tur a tam hle a. Khawvel kalphung inher danglam dan ngun taka thlir pawhin chung lam remruatna vek zawk a lo ni tih hmuh hmaih theih a ni lo. Thangthar zingah mithiam zawk leh fing zawk an lo chhuak zel a. Sakhuana lam hawi apiang hnualsuat chunga inchhiar zau, vengva tak takte phei chuan kristianna hi kan chhiat phah zawk ang hiala chhuahin kohhran meuh pawh an bei hreh ta lo fo mai. Mahse, kan hnam history han thlir let hian tun dinhmun min hruai thlengtu hi Pathian a ni tih hai rual a ni lo. Sorkar chak ber ni thin Kumpinuin min awp laiin missionary-te thahnemngaihna zarah rei lote chhungin Zo hnahthlak zawng zawng kristian kan ni hman a, zirna bul min tan sak a, an inpekna zarah college tha tak din a ni bawk a, kan hmasawn theihna turin kawng hrang hrangin an thawk a ni. Kan sakhaw zui a fuh avanga kawng tam taka kan vanneih zia sawi tur a tam ang. Kan chhehvel hnam hrang hrangte vaihoin an chim pil mek laia kan la hlang bik em em mai pawh hi ngun taka chhut chuan Pathian hnathawh a ni tih loh rual a ni lo. Chuvangin, keini hi chuan kan biak Pathian hi hawisan thei kan ni lo a, kan hnam hruaitu atan kan thlang reng tur a ni ang. Kumthar kan chuan tan mek lai hian kan hnam din chhuahna leh tluk chhiatna hi Pathian kutah a awm a ni, tih hre thar leh ila. Suahsualna chi hrang hrang hluar tial tial te, hruaitute leh mipuiten dan kan pawisak lo thin zia te, thiltithei zawkten dikna an pal zut fo dan te, rinawmna an mausam thin dan te, hlemhletna chi hrang hrang hluarzia te han ngaihtuah hi chuan hun harsa zawk kan hmabakah hian a lo thleng mai ang tih a hlauhawm khawp mai. Lalte leh mi lianten Pathian an tih tawk loh vanga chhiatna nasa tak a lo thlen thin thu Bible-ah kan hmu a, ram hrang hrang history-ah pawh thuneitute nawmsipbawl nasat vanga harsatna lo thleng chanchin hmuh tur a tam bawk. Isua pian hma kum sanghnih vel kal taah khan Asia khawmualpuia ram ropui ber leh sorkar thiltithei ber mai chu Babulon a ni a. Nebukadnezzara hun laia an ram awp zau zawng chu mel sangkhat bial zet a ni. An khawpui ropui zia chu tunlaia scientist-te pawhin mak an tih hial tur a tam mai, an lal in ropui zia te, an kulh that zia te, inchhawng sang pui pui te, an sipai chakzia te, an lal leh roreltute ropui zia te pawh sawiin a siak lo. Huan inkhai ‘hanging gardens’ an tih phei chu mihring kutchhuak thilmak zual pasarih zingah a tel nghe nghe. Ram hrang hrangte insumdawntawnna hmunpui a ni a, hausakna tinreng luankhawmna a ni ber e. Mahse, Pathian thuawih duh lo lal zurui leh chapo tak Belsazzara'n mihringte chunga thuneitu pawi a khawih avangin chumi zan la la chuan Media leh Persia sipaiten an bei a, an kulh ropui tak chuan a chhanhim zo lo a, a tlawm a, a lalna a tawp zui ta. Chung hunlaia miten khawvel tawp thleng a lalram ropui tak ni thei tura an ngaih Babulon sorkar chuan Pathian pawi an khawih man an tel a, bawhchhiatna avangin lalram ropui tak chu a tluchhe vek a. Chumi zan atang chuan Babulon chu a ding chhuak tawh ngai lo a, an kuchhuak ropui tak tak an chhuan em emte chu thlaler vaivutin a chimpil zo ta a ni. Billy Graham phei chuan, Babulon tlukchhiat chhan kha Media leh Persia sipaiten an hneh vang ni loin, an hmelmate lo thlen hma khan an sualna chuan an boralna tur hi a lo thlen tir hman daih tawh zawk, a ti. Rom lalram ropuizia hi tunlai thleng pawhin mi thiamte hrilhfak a la ni. An sorkar inrelbawl dan thatziate an sawi thin a, an rorel dan kalphung chu tunlai sorkar tin hian an la chhawng vek an ti. An khawpui Rome ‘Chatuan daih khawpui’ an tih mai chu kawngpui zawng zawngin a chhun vek, an ti a. Han ter pha tur sorkar dang an awm lo reng reng a, an ram awpte atangin ei tur leh silhfen chi tinreng a lo luang lut a, anmahni aia tam daih sal an chhawr a, an nawmchenna sanzia te hahip a sawi tur a awm. Mahse, chu lalram ropui eltiang mai chu a tlachhia a, ding chhuak leh tawh loin a kehdarh zui ta a ni. Mi thiamten Rom ram ropui tlukchhiat chhan an sawite chu: nupa inthen tam lutuk leh chhungkua an ngaihthah vang te, nawmchenna an uar lutuk te, pawn lam hmelma beihna tur ralthuam siam vak vak laiin an ram hmelma chu chhung lama awm anmahni zawk chu an ni tih an hriat loh vang te, sakhuana lamah an tlakchhiat vang te. Indona vang ni loin an nawmchen uar vang te, Pathian laka an sual vang te, an lalte leh mi liante bawhchhiat vang te, mipui rilru put hmang dik loh vang tein lalram ropui tak chu a tluchhe der a ni. Pathian pawisa lo, suahsualnaa inhnamhnawih lui tlat hruaitute leh mipuite bawhchhiatna avangin lalram ropui tak tak an tluchhe tawh a, an ropuina zawng zawng nen leilungah hian an luang ral tawh thin. Pathianin Chanchin Tha hmanga a zawn chhuah hnam kan ni a, kan inchhuanna ber pawh chu chu a nih mek lai hian Pathian thuawih loh pawizia he hnam hian a hriat reng theih nan leh ram hruaitute pawhin Pathian ih loh hlauhawmzia an hriat fo theih nan leh mipui pawhin Pathian thu kan awih theihna turin i tawngtai thin ang u.