Kum a thar a, kohhran leh khawtlanga pawl hrang hrang te pawhin hruaitu thar kan thlang a, kan hruaitu thlan thar ten an thawhpui tur te ruatin chanvo hrang hrang kan in pe thin. Heng mawhphurhna kan pek te hi pawl leh thil danga inhmang leh rintlak a kan ngaihte an ni tlangpui thin a, mi hman tlak kan zawng tlangpui bawk. Heng chanvo kan inpek hrang hrangte hi a tih hlawhtlin kawngah kan mamawh bulpui ber chu inpekna a ni. Eng pawlah pawh ni se, mawhphurhna chelh tura min ruat a nih chuan phat loh hram tum ila, kan tlin tawk leh kan zawh tawk tura kan hruaituten mawhphurhna min pek hi lawm taka pawm mai hi kan tih tur a ni.

Eizawnna emaw chhungkaw buaina vang ni lem lo va, chhuanlam dang siama phat mai hi kan in tih hmuh fo thin a, kan tlin lohna te, kan that famkim lohna lai te a in en mai lovin mi thatna hmuh thiam a, chhawr tangkai thiam hi hruaitute pawhin an tih tur a ni. Tumah hi a zawng zawngin kohhran leh khawtlang tan kan inpe theilo, kan hun neih chhun te kan hman thiam a, midang tana hun pek thiam hi kumthar atangin kan zir thar a pawimawh.

Zofate hnamdang laka kan danglamna em em chu kan Kristianna piah lamah Khawtlang mitin kan tel theihna, mitin huap pawl kan nei hi a ni. An sawi fo thin Khawtlang leh Kohhran a inhmang chu misual tak an awm ngailo tih thu pawh hi ngaihtuah chuan a dikna chen a awm áwm e. Kohhran leh Khawtlang a inhman hian min chher puitling a, rawngbawlna a ni emaw khawtlang thila chet chhuah a ngaih chang a awm fo thin, mi insiamrem thiam leh mi tlawmngai nih a ngai hle a ni. Pawl anga telna reng rengah chet chhuahna tur a tam thin avangin leh pawl thil tum anga chet chhuah angaih fo thin avangin Kohhran leh Khawtlanga inhmang tak tak te hi inchhungah hun an hmang tam theilo thin.Midang tana an hun hmang tam zawk te, a tul hun apianga che chhuak thei leh Kohhran rawngbawlna lamah pawh nise mahni hna thulh khawpa mi inpe te an ni chawk avang hian Mizo Society tan hian an va thawhhlawk tak em.

YMA thil tum pakhatna hi hun awl hman that tih a ni a, kan hun awl neih te hi hmang tha turin kan rilru kan siam fel em? Kum hluiah khân midangte tan hun kan hmang tha em tih te hi mahni in en let nân hmang fo ila, kan nun hlui leh kan nun danah te thil chin tha lo leh insiam thatna tur kan neih te a awm ngei ang. Kumtharah hian rilru thar nen bul tan that tum ila, rilru thar leh ngaihtuahna thar nen a hma kum aia hmasawn tum zel hi a pawimawh hle. Kohhran leh khawtlanga kan inpek chhuahna kawngah awmze nei zawka hun insiam te leh ruahmanna siam te a pawimawh a, kan mimal nun theuhah hmasawnna rahbi thar rap turin inbuatsaih ila, nikuma kan nun dan aia hmasawn tumin tan lâk i tum ang u.

Kan khawtlang tan a hma aia inpe thar turin leh kan theihna te mi dangte tana hlan turin inbuatsaih ila, mi dangte tana luang chhuak tam apiangin an zawng chhang a, anmahni lamah hlawkna leh hlimna an seng thin. Mi dangte tana inpe chhuak fo thinte hi an nun a hlim thin a, mi dangte tana nun leh hun hlan hi keimahni tan vek zawk a lo ni thin.  Kan hruaitute’n member thawhpui tur tha an neih leh neih loh hian hruaitute phûr leh phûr loh a hril thei a, anni phûr leh phûr loh chuan khawtlângah nghawng thûk tak a nei leh thin. Keini member-te phûrna chuan kan hruaitute a tiphûr ang a, anni phûrna chuan min tiphûr lehzual ang a, kan inphûr chhuah ang a, phûr lo taka tih ai chuan hma pawh kan sâwn zâwk ngei ang. 

Kohhran emaw Khawtlanga kan hruaitute hian kan hma min hruai sak a, an hnung kan dawl tel a ngai fo thin bawk. An diklohna lai emaw kan mit an tlin tawk lohna a awm chuan midang hnena sawi emaw midang hmuh theiha tarlan kher lo hian hmai­chhanah inhrilh mai ila, a tu ve ve atan pawhin dawnsawn a nuam zawk ngei ang. Tu pawh hian thatna lai leh tlin lohna kan nei vek a, midang chhiatna sawi thei bîk khawpa famkim kan ni bîk em tih te in zawt nawn fo ang u.

Pathianin mihringteah hian theihna sâng tak min pe a, a thil thlawn pek zinga mi kan talent te, a theihna min pek te hi mi dangte tan i hlan ve zel ang u. Luang chhuak nunah luang lut a awm thin an tih ang khan, khawtlang rawng bawlna hi mi dangte tana inpekna a ni a, tanpui ngaite tanpuina kawngah te, YMA chet vêlna hrang hrangah te, lusun khawhar lenpuinaah te hun pek i tum zel ang u. Mi dang­te tana mal sawmna thlentu ni turin tan i la thar zel ang u khai.