Zawhna: Ka kut hi zanah hian a lum bikin an sawi a, keima’n engmah ka feel silo. Mi taksa han khawih ila. i kut a sa an ti zel mai a, ka taksa ah a sa in ka hre si lova, enge a chhan ni ang?

Chhanna: Mihring taksa lum zawng hi normal anga kan sawi leh hriat fo thin chu 98.6 degree Fahrenheit emaw 37 degree Celsius a ni a. Mahse 97-99 F hi normal ah ngaih a ni tho, mihring a zirin. Kan awmna hmun a zirin kan body temperature hi a inthlak ve thei a (teh in), mahse kan chhungril core temperature erawhchu hemi normal a vawng tur hian kan taksa in a veng thin. Kan body temperature hi normal aia a lo san deuh chuan insawiselna, awm nuam lo, lu na emaw luhai, tiril khur ang te a lo awm thin a. Chutiang a awm lem lo anih chuan tisa lum chi i ni ve hrim hrim te pawh ani thei awm e. I temperature erawh lo check ve hrim hrim la, 97-99 F chhung anih chuan engmawh pawi emaw fel lo awm lo angah a ngaih theih ang.

Zawhna: Kum 60 over tawh ka ni a, walking exer ka la thin a, mahse 30-45 mins vel hi Treadmill ah ka ti a, over exer ka hlau si a, a tawk em? Taksa ngeih tawk, over si lovin engtia rei nge tawk ang?

Chhanna: Mihring hi kan in ang lo khawp mai a, kum upa lamah pawh hian la in fit tak tak hi an awm fo mai. Exercise lak hi kan taksa tan a pawimawh hle a, chutih rual chuan i rawn sawi angin kum a lo tam chuan chin tawk neih thiam a tul thung. Kum a lo tam chuan ruh leh ruh chuktuah (joints) ho a chak lo ve tial tial a, balance a tha tawk lo ve tial tial bawk a, chuvang chuan intihpalh, a bikin ruhtliak te hi a awl bik hle a ni. Tin, lung (heart) lam a lo chak lo ve hret hret bawk a, taksa in a zawh chin bak exercise te hian heart attack emaw stroke neih te pawh risk a awm ve thei bawk.

Exercise hi ti thang tan chuan mahni zawh tawk hriat a awl a, ti thang lo tan erawh thlan a han tla a, nuam tihna a lo awm tan a, tum aia nasa a exercise a awl duh viau. Chutiang avang chuan intihpalh bakah insawiselna dang pawh neih phah ve theih a ni. Sports lam chi phei chu chin tawk neih thiam a pawimawh hle. Kum 40 pelh tawh hi chuan hrisel tha viau pawh ni ila kan taksa flexibility te a hma a lo pha tawh lo thin a, over exercise (entirnan badminton game 5 chuang khelh thut te) hi taksa tan a pawi thei thin a ni.

A dang leh ah chuan kum a lo tam hian dehydration (taksa tui tlachham) hi a awm hma tawh thin a, tui an lo in tlem deuh tawh thin avangin exercise vanga thlan tla khan taksa a tui awm a paih chhuak hnem a, an lakluh nen a in balance loh avangin dehydration hi a awm ve fo thin. Chutiang ah chuan luhai, ngaihtuahna bing mup te a awm thei a, intihpalh a thlen thei thin a ni.

Kum tam lamah chuan sawi tak angin engtia rei nge exercise tur tih sawi thiam a har a, mahse helam expert hovin an sawi dan chuan thlan tlak tan tirh velah hian duh tawk a him an ti thin. A tlangpuiin kar khat chhungin 150 mins hi taksa sawizawi nan hman hi a him tawk viau an ti thin a, chutiang anih chuan ni khatah 30-40 mins vel hi chu him tura ngaih a ni. Mahse sawi tawh ang bawkin mihring a zir ani a, hrisel tha leh insawizawi thang ah chuan darkar khat chuang exercise te pawh a him pha ve tho awm e. 

Pawimawh leh bawk chu ei leh in lam hi a ni a. Kum a lo tam chuan ei leh in hi uluk zual a pawimawh khawp mai. Ei tlem, insum lutuk te hi a him lo thei a, chutiang tho in tui tih zawng ei vak te pawh a him lo thei tho. Moderation (a him tawk) hi a pawimawh a, tin, balanced diet a pawimawh hle bawk. Taksa sawizawi regular si a, ei leh in lam uluk loh chuan tlakchham a awm duh a, a bikin Vitamin deficiency te hi a awm hma thei. Chuvangin ei in hi ngaih pawimawh hram hram a tha hle.