Mizoram comics bu lar ber thin ‘SUDDEN MUANGA’ ti a ziaktu Lalsangzuala-Lai-saizawk, Pa ropui chanchin:
Pian leh murna - Tarik 13 January 1951-ah Mission veng ah a lo piang a. A pa Lalnghinglova Dawrkai, Puanthui thiam a ni. An In thin chu ‘Vanbuangi Gas Agency’  Vanhlira(L) In hmun hi a ni.

A unaute: 
1. Lalbiakliani w/o Khumliana
2. Lalbiakchhungi w/o  Sapruala
3. Lalbiaktluanga h/o  Zairemi
4. Lalbiakzauva h/o Zoliani
5. Lalbiakmawia h/o Malsawmi
6. Lalbiakzami w/o Lalpawla
7. Lalbiaksanga h/o Malsawmi
8. Lalsangzuala h/o Laldinsangi
9. Zokhumi

Tuithaphai-Manipur ah Sipai bang hoten pem an sawi mawi a, mi tam tak an pem chhoa a. Pu Lalnghinglova leh Pu Chhawngkhala (Thakthing dawrkai) te chuan Manipur-ah ram en in an han zin dun a. Churachanpur an han thleng a, nuam an ti in pem an duh ta tlat mai a ni.

Mizoram an lo thleng a, Manipur a pem tum chuan an inbuatsaih ta a, kum 1952 kum tir lam ah chuan chhungkua in an pem ta, Lalsangzuala pawh kum khat hmel a hmu vel chiah a ni.

Churachanpur hming put chhan, Sir Churachan Singh chu kum 1891 bawr vel daih ah Churachanpur ah hian a lal tawh nia sawi a ni.

ZIRNA KAWNG: Roman School-Don Bosco High School ah kan kal ho thin. Sangzuala nen kan thu dun a, tlar hung lam ah, ti hian ka ngaihtuah let a, zirtirtu ten class ah min rawn zirtir mek lai te hian thianpa Sangzuala-pek chuan, Rinngai, hei Miss Boboihi lem, an ti a, an thai zeuh zeuh a, hei Pu Luka lem a ti a, an ang em em zel mai a ni. Thiante hriat loh hian kan nui ru kan nui ru mai thin!

A talent hlu zet mai chuan, “Mizote Comics hlutna min hmuh tir na kawng a lo ni daih mai, Sudden Muanga comic chuan Mizoram a dengchhuak hneh hle. Lamka College a Lecturer pakhat a ni a, mahse, hei hian Mizoram khawvel a deng chhuah phah lo. Pu Thangzama-cinema hall ah tlar hmaah Rs 1/- man ah kan thu dun fo thin-Vai film leh Sap film kan en thin.

Sangzuala chu Don Bosco atangin, Sialmat Christian High School-ah Pawl-9 leh Pawl-10 kum khat-ah exam kawpin Matric tha takin a pass thei a ni. College pawh tha takin a zova, MA(History) hi JNU-Jawaharlal Nehru University campus Canchinpur, Imphal atangin a zir zo a ni.

EIZAWNNA: Ni 6 February 1970-ah Lamka College ah Lectures hna a zawm-a subject lo zawk Mizo subject a la thung a ni. A boral ni thlengin Lamka College ah a thawk a ni.

CHHUNGKAW DIN: Kum 1980 January 13, a birthday ni takin nupui hmeltha tak Nl. Laldinsangi Sailo d/o  Thangvela nen an innei. Fanau malsawmna pawh an dawng, fanu 6-an nei.
1. Noel Lalremsangi
2. Lalkhumtiri
3. Rualthankhumi
4. Vanlalliani
5. Vanlalruati
6. Lalhmachhuani

An fate hian pasal tha tak tak an nei hlawm a, Imphal, USA, Assam, Churachanpur ah te an awm hlawm a ni.

Lalsangzuala’n kum 1977 March thla atangin ‘Sudden Muanga’ bu a chhuah tan a, Lamka bawr velah bul a tan chho a, reilo teah, Mizoram a lo thleng nghal mai a ni. A lehkhabu hi a copies an siam tam telh telh a, copy 3000-8000, thlengin an siam a ni. Pu Lalsangzuala-a room atangin Mizoram Politic in lum let vel dan te, Mizoram chet vel dan te, chu SuddenMuanga-bu ah chuan a rawn thai lang char char thei zel thin.

A hunlai vel kha chuan Sudden Muanga-hre lo an awm lo vang, Mizoram book exhibition-ah Rs 100/-a chhuah tan tirh in a dawng a. A comics-bu hi cyclostyle-in a man a her mai thin, a chhungten an tihpui bak ah mi dang pawh 7-vel lai chu a ruai thin a ni.

SUDDEN MUANGA- Status
An nupa in-Sudden Muanga-lim an siam a, A hma lam atang chuan a khabe a dawh sei vak lo.

Buhpawl in a ruangam an din a, saiip hruiin a suih khawm a. An nu in-chirh diak tur a lo rap kawi a, an pa in lo zutin a lo bel mawlh mawlh bawk a, an tul nupa hle a ni.

Nisa-ah an pho a, a khi lai te chu an hnawh phui leh a-a la nem lai deuhin chemte in a hlep mam leh a, a rova-an peih chu a ni der mai.

An fanu naupang ber Chhuanteii, a harh rual tak nafam chuan a unaute nen room ah ball an beng a, Sudden Muanga, chu!! mihring emaw a ti pek a!! ball chu na takin ava pass ve dawt mai chu a keh ta vek mai a!! a pa Sangzuala chuan a ui hle a ni awm e.

Phone call-ka dawng: Sangzuala Aizawl-a lo zin tumin min biak pawh dan tur a ngaihtuah a, Directory lianpui mai a keu a, min rawn call kha a lo ni a. Phone a lo ri a, Halloo kan ti kha! Rinngaia... kha i ni em? a rawn ti a? Aw, ni e, nang tunge ka ti zui a, Ani chuan Sangzuala a ti a, hlim takin chanchin te kan in hrilh dun ta. Kei chuan fiamthu-in, E, thianpa min hre reng tih ka hria! Sudden Muanga thianpa ah ka la tang zel a nih kha, Darringaia (Rinngaia) kan ti chu a nui huk huk mai a. Tiang chuan hlim takin kan in kawm thin a ni.

Kum engnge maw zah hnuah ka pa V.L.Lawma lungphunna (23th August 2003) a kan kalin, kan in hmu leh a, min hmu turin min rawn pan leh vang vang a, hlim takin kan inkawm leh a ni.

A NU-NEN KOLASIB AH: Pu Lalsangzuala kum 1951-ah piang a ni a, a hringtu nu Pi Lalhluni hi a vanduai hle, a hunlai natna hlauhawm T.B. a vei hlauh mai a. An sawi dan chuan, “Sakei sa a um chuan- a tawp ah chuan a seh nge nge thin,” chutiang deuh chuan, miin T.B.-a vei chuan a tawpah an thih pui nge nge thin, an ti.

Pi Lalhluni pawh T.B. enkawlna Mizoram a awmchhun, Wales Mission Hospital, Durtlang-ah Dr.Pi Pui-in uluk tak in a enkawl a. Lalsangzuala chu a nu bul a awm a rem loh avangin in lam ah enkawl a ni. A nu u-Pi Lalpuii chuan a rawn enkawl a, kum khat chauh a nihin Manipur Churachanpur ah an pem pui leh ta mai si kha a ni. A nu Pi Lalhluni hi a khawngaih thlakin a lainatawm hle a ni. Nu tan chuan hnute hne lai nausen tuisik mai chu ngaihtuah a na duh khawp ang le. Mahse pi leh pu te sawi angin, thing delh loh lung delh loh ta chu, a lo puitling chho ve ta zel a.

Pathian zar ah! Sangzuala pawh Shillong a exam pe thei a ni ve ta, a kal atang chuan a nu hmel hmuh a chakna a zual ta. Lamka lama a kir leh hnuah a duh thlannaah a hringtunu hmuh chu a dah lal ta ber a, tuma ngai chang lovin a  hmu turin Kolasib a pan ta a ni. A nu Pi Lalhluni nen chuan an in hmu a, a fa hming koh Lalsangzuala an hmu a lawm dan tur chu han ngaihtuah teh. Lehkha te inthawnin chanchin in hrilh fo mah se, a tak taka, in hmuh chu boruak a dang an ti hle. A nau Chhanhimi’n ka u Sangzuala leh ka nu chu an inchhun chiang khawp, in ang tak an ni, a ti.

Nupui fanau a neih hnuah pawh a nu hnenah hian an zuk zin thin a, an hlim tlang hle thin a ni.