Kristian tena kan mamawh ber chu lâm nun hi a ni a, kan tlakchham ber a ni bawk hial âwm e. Mizo-te hi lam ngaina hnam kan ni a; hmanlai ata tawh tun hun thlenga kan nun luahtu ber zinga mi chu 'Lam' hi a ni. Lam hian kan nun bu lailum a luah a. Lâmin kan inawi a, lâmin kan inchawimawi a, lâmin kan inthlah liam a, kan inlâwm bawk thin. 

Hmanlai Mizo nunah khan zu hmun, sa hmunah lam hian a hmun lailum a lo chang tawh thin a. Nun vawr tâwp a ni a, hun hlimawm lai ber luahtu chu lam bawk hi a ni. Khuang chawi ni khuaah chhepchher chitin hmangin an neih zawng zawng chenin an lo chai tawh thin a. Inkutsuih ringawt an duh tawk lova, kut ben ringawt lah a ni hek lo. Ban pahnih phar leh vaiin chawnban vuanin lam an thai thin a ni a. Hun ropui ber ber an hman a an hlim lawmna nasa tak teh fung chu LÂM a ni mai. Thil dang teh chiam a awm lo. 

Khawvel hnam hrang hrang pawh hi an lam nasa ngiang mai. Lam thiam pawh an lar a, ram changkangah phei chuan lamin ei an zawng hial a, hausak pui fe fe pawh an awm a ni awm e. Keini ramah hi chuan lam thiam kan neihte hi nitina inhlawhfa chawpa eizawng an nih lo pawhin eizawnna tlak a ni lêm lo rih a ni. Mahse, lam hi kan nun hruaitu tha tak a ni. Tuna kan sawi tum ber chu Pathian chawimawi leh faka lam chungchang hi a ni. Thuthlung hluiah hian Israel te chu lam uar tak an ni tih Bible kan chhiar chuan kan hre thei a. Lal Davida pawh kha a lâm ngei a, Pathian hmâah ka lâm a ti. Keini pawh hi Pathian hmàah kan lam tur a ni. A nupui, Mikali khan a lo zahpui tih kan hre bawk. 

Israel mipuite chu lawmin ri thei chitin nen an lam thin a. Hnehna hlado chhamin Hun ropui tak tak an hmang thun.Kut ni vang thlaah phei chuan rusi ropui thehin kut an hmang thin. Sam bu-ahte hian Pathian faka lam chungchang hmun hrang hrangah kan hmu a ni. Pathian faka lam hi taksa a Pathian chawimawina a ni a. A ropui hle a ni.

Tun lai chhanah pawh hian kohhran nung leh Kohhran hlim kan tehna ber pakhat pawh a ni. Kohhran member zingah lam an tam chuan, "Kan Kohhran chu kan hlim lai a ni," te pawh kan tih thin hi. Kohhran mi thenkhat phei chuan Lam tual a kan han vir luih luih tawh hi chuan kan ngaih a tha viau zel mai bawk. Kohhran hlimna ze ropui ber pawlah kan ngai a, harhna vawr tâwpah kan ngai thin bawk. Lâm mi chu 'mi hlim' kan ti awl lo bawk nen. Lâm an tam chuan Kohhran ngaih a tha tlat zu niamaw le?. He LAM rawngbawlna hi mi thenkhat phei chuan 'practical' hle a hriatna kan nei tlat bawk thin. Lam tlem lai chu 'ro' hun lai kan ti chawk! 

Kohhran hruaitute zingah kut beng mang lo, beng ve pheuh pheuh, ban phar chu hlat takte phei hi chu kan 'hmu ro em êm phawt mai thin a nih hi! Heti fakauva LAM  kan dah pawimawh teh hrep avang hian Kristian nun vawr tâwp, a piah lam reng awm tawh lovah kan ngai ta niin a hmuh theih ta a ni. Lam kan ngaihsan avangin rinna kawngah pawh heng mi hlim, lam lamho hi chu ngaihtuahawm lo hle turah kan ngai a. Anniho pawh hian thleng sang hle a inngaihna an nei hial âwm e. Mahse, a lo ni lo nasa mai! Lam ho hian, nun practical hi an lo nei tam teh chiam bik lo a ni ang. 

Rawngbawlnaa insawisel leh insawi sep, inrêl hi hengho hian an bansan tak tak thei bik lo em? tih hi zawhna pawimawh tak a ni mek! Rawngbawlna a taima leh rinawm an lo ni bik hauh lo mai! tihte hi sawi chhuah a châkawm thin. Galatia 5: 22- 23-ah khan Thlarau rah pakua kan hmu a. Heng hmangaihna te, hlimna te, remna te, dawhtheihna te, ngilneihna te, thatna te, rinawmna te, thuhnuairawlhna te, insumtheihna te leh hlimna te hi lam mi neih ngei ngei tur te an ni a. Nun ril, nun tak neih theihna a ni a. Heng Thlarau rah tel lo hi chuan hlim lamin awmzia a nei lova, lam loh nen thuhmun reng a ni. Khawi hmunah pawh awmin hnathawk ila, a pawimawh ber chu rinawmna te, dawhtheihna te, taimakna te, hi a ni. Chu chu LAM NUN  kan tih hi a ni. A Practical em em a ni.

Lâm mite chuan tisa thil tihte an bansan tur a ni. Huatna te, Pathian kohhran ho inpawlna Biak buka kan thlarau mi hle angin pawn lamah pawh kan thlarau mi hle tur a n. Tirhkoh Paula tisa thil tih a puan te hi bansan tur kan ni. Chungte chu hengte hi an ni, inngaihna te, bawlhhlawhna te,hurna te, milem biakna te, dawi­thiamna te, huatna te, inhauna te, thîkna te, thinurna te, inkhinna te, awm hranna te, rin hranna te, itsikna te, zu ruihna te leh zu hmun hlimna te ringtute nun kawng tichhe vektute an ni.  

Lam hian Kohhran inpumkhatna thlen se, chu chu Pathian thu dik zîk tluak a ni.

Pathian thu chuan Biak in leh Biak in lo a thliar ve lova, khawi pawh hi maicham mi zel se, eng hunah pawh lam tual kan din thei a, pulpit kan hung thei a ni. Ze inang lo, Pathian tak be ho, lâm lama thleng sang thei tak, nuna lan chhuahtir mi leh lâm lama thawh hlawk lo takte hian khawiah pawh Pathian ram an din thei. Eng hna pawh thawk se la, lam nun an nunpui zel ang a, thlarau mi nih pawh thil harsa a ni hek lo. Pathian Biak In pâwn a kan danglam fo hian nun a titla bal a, nun a tihrehawm a, chhungkua, khawtlang, ramin a tuar ta thin a ni. Lam ringawt a tawk lo, a taka nunpui a pawimawh ber kan ti a nih hi! Pathian fakin chawimawi la, lam la, kut beng la, chu nun chu thlah thlam suh. I nuna entawn tur thil tha i pek chhuah theih dawn loh lâm lo ngam mai rawh.