Chhiartute chibai ka buk a che u. 

Mizoram hi Kristian te tamna ber ram, Kristian ram tih a ni thin a, Hetih lai hian kan Kristianna a ni lo dal chho mek zel a, Pathian thu tak pawh kan buaipui dan a dang ta hle a ni. Pathian Biak In te chu mi tam takin kan thla hlel tawh lova, Pathian chibai bûk pawh chakna kan nei tlem tial tial niin a lang zo ta! Pathian thu tak aiin sum thawh chhuah lamah kan vengvâ a, kan hawi zauva, sum kan la khawm ruih ruih a, Sum tuak kohhran tih kan hlawh zo ta bawk! Kan Biak In te chu a lian tial tial a, a nalh tulh tulh a, a tawp changkangin a mawi hle. Kan sa uluk hle a, chhuan pawh kan chhuang! Mahse, kan sawi mek ang hian inkhawm kan uar lo tulh tulh a, inkhawm kan tlem tial tial a nih hi! Kan ngaihtuahawm ta khawp mai. Kan Kohhran nun piah lam pawh belhchian a dawl tak chuang hek lo. Kan ringtu nun a dal sawt ta hle.

Kristian sawrkar kan din a, kan Kristianna a takin kan nunpui leh chuang si lo. A derin ram kan hmangaih a, a derin mipui kan hmangaih mek a ni! He Lem channa khawvelah hian thu dik leh thil dik thliar hran theih loh khawpin bumna in lian pui kan din mek a. Thil tha leh thil tha lo pawh kan hre hrang thei tawh lo ni berin a lang. Mizoramah hian dawt hmangin ro kan rel a, dawt hmangin ei kan zawng a. Politics suak khelin kan hmanhlel a. Kohhran dik aiah kohhran lem kan din mek a nih hi! 

Tun laia mipui kan benga kan hriat leh kan mit ngeia kan hmuhte hian ngaihtuahna a tibuai satliah lo hle a. Mitinin kan beng khawn a, kan sawi a, kan ti ti tuina ber a ni! Tihvak ngaihna erawh kan hre chuang si lo a nih hi. Thil tha tih tum inti thil tha kara thil sual tih hreh miah lo mihring lo inphum ru thinte hian mipui min chawk buai mek a ni. 

Tun hnaiah chanchin mak danglam tak tak, chanchin chhe buru tak takin Zoram min țhawng ching chi vet a. Hmun thenkhat, veng thenkhatah tute and chuan  ruihhlo a sumdawng lian tak man chhuah an ni ta fo mai a. Hnam leh ram mualpho na a va ni chiang em! Chung  ruihhlo zuartu lian tak chu mi taima tak, zing taka thova a sumdawnna a kal thin. Ni tlak hmaa a dawr khar ngai lo. Sumdawng taima lutuk leh mi fak hlawh tak chuan ruihhlo a lo buaipui hle a ni tih hailan a ni a. Zan khat thil thuah a chhe ta buai a. A sumdawnna paw'n a tuar ngei bawk ang. Mi taima, rinawm leh sumdawn thiam tak chu lemchanna khawvela a lo inchiah ve tlat avangin atan mualphona zakhua a lo thleng ta a ni! Chu a lemchanna thing chuan a vaw tlu sawp a, a hming thatna chu chawp leh chilhin tihbovin a awm ta a ni. He pa hi vantlang mipuiin an ensan a, an ngei a, an haw hle ni tur a ni. Veng chhunga awm atan an duh lo hial a ni. 

Hetiang ang mihring hi he Zoram khawvelah hian hmun tinah an awm mek a. Dik inti, rin­awm inti, fel inti leh thianghlim intiten Zoram khawvel hi kan awp mek a. Politician dik hmel hmuh tur an  vâng hle! 

Politician suakin ro min relsak mek a nih hi! Kohhran hruaitu zingah pawh a langa tha, a taka tha si loten ro an rel thin avangin nasa takin kohhranin a tuar thin a ni.

Lem chan thiamte din chhuahna hmun kan din mek. Ruihhlo ngaite enkawlna hmun an mualpho mek. Tunah Centre pakhat mualphona pawh hi lemchan thiam vang kan ti lo thei lo. Engatinge heng Centre enkawltu committee pawh hian hetiang thil tha leng lo khawp Centre te chu an lo kalpui le?. 

TBCC a thil thlengte hi han thlir ila, he Board-ah hian mi thiam pui pui sawrkara mi hming tha tak tak pawh an awm a. Kha chen kha an kuta awm a nih mek laia hetiang teh hrepa mualphona lo awm ta hi an mawhphurhna a ni a tih loh theih loh? A hmingah Tawngtai Bethel Camping Centre tih a ni. A hming a ropui, a tha. Mahse, he Centre atang hian chanchin tha hriat hian a tha lam reng hriat tur a awm lo a nih hi. 

Kan hriat angin Mizoram, Kristian 87% kan nih mek laiin thalai drug ngawlvei a sang tel an awm. Zoram hmun tin, hmun tang­ah an awm mek. Thingtlang kilkhawr tak tak takah ruihhlo ngai, thalai eng emaw zat hmuh tur an awm reng. Ruihhlo ngaite enkawlna hmun 30 vel zet Mizoramah hian a awm mek. Heti chung hian Zoramah hian kohhran hrang hrangin Evange­list team eng emaw zat kan nei a, an zavaia belh khawm phei chuan 100 an tling hial awm e. Thlarau Thianghlima harhna pawh a thleng deuh reng, mahse, he lemchan khawvel hi kan la chhuahsan thei si lo! 

Zoram hmangaihtu inti, a dera hmangaihtu nih bansan thei chuang hauh si lo. Mahni inhai vur nana ruihhlo ngai buaipui, mahni tana politics khela ram tana thawk inti mekte hian he Zoram riangte hi an hmangaih meuh em? Politician ten inthlan dawn hnaiah thil tha tinreng mipuite hnenah an tiam a. Mahse, eng teh chiam mah tihsak an nei si lo. Thu tha tak tak an sawi a, mahse mipuite chu lemchanna khawvelah an hnuk lut leh lawi si a. Mipuite chu bumna kawr ruamah an hnuk lut mek a ni. Sawrkar thianghlim, fel fai tha, sual kai lo, kalphung thar kan intiam a. thinlung thar a awm miau loh avangin , kalphung hlui bawkin min hruai leh tho si, tihte hi a dik leh dik loh chu a hretu, mipui te hi kan ni. 

Nitin, darkar tin kan hmu mek zel a. Mipui, mirethei sum hmangin kan inti lian a, eng Centre leh Home emaw, eng zirna in emaw kan din a, chhuanlamah mite tana  rawngbawlna kan ti leh zaih a. Mahse lemchan thiam­te, dawt sawi thiamte zia chu an in leh loah a hriat a..an ei leh in, silh leh fenah a hriat bawk. Hei thu  hi thil dik a ni. Lemchan nun hi bansan a nih loh chuan kan tuar zel ang a, a tawpa chhiat­na pawh Zofa te nunah a lang zel dawn a ni.