Favàng lunglèn!

September thla liam ruai ruai dáwn thleng pawh chuan, Amber-i nèn chuan a taka “suih zawm” kan ni thei chuang lo a! “Kan hla” kan tih mai, “Love in September” pawh chu “hla” a la ni reng a; “Tisaah a chang thei si lo a!” tiin ka hnual lek lek fo mai. Ngaihthlâk zui tawh loh pawh ka tum uai uai thìn. Mahse, “Keima lamah tal awmzia a nei tho aläwm,” ka ti fan a. Kan pahniha tána awmzia a neih tak tak hun tùr thlír chungin, “Engtik ní-ah emaw chuan …”  tiin, beiseina ka chhi ëng lui thìn.

Tichuan, September thla chu a liam a. October thla—pi leh pute khuang chawi thla pawh kan chuang kai leh ta. Chü thla chu kumina ka hun nghahhlelh ber a ni a; kum dang zawng aiin a thleng har fe-in ka hre hial!

Khua lah chu a máwi ang tawlh tawlh a. Tùn hmain hetiang rëng rëng hian favàng khua hi a mawiin a lunglènthlâk thìn tih ka lo hre ngai lo a; mäwl pawh ka inti angreng fú! Khaw thiang vûk hnuaiah eng pár nge an ni tih pawh ka hriat chiah loh pangpár chi hrang hrang an lo vul chúk a. Tlai ni tla tùr mawlh mai hi áw … an máwi a ni mai lo a, thinlung chhun hním dup thei khawpin lunglènna an pai tel tlat niin ka hre hial thìn!

Puja chawlh chu a hnai tawh viau a; mahse, chawlh hmang tùra rawn hàw tum, Amber-i lah chu a reh tlawk tlawk mai si! Telephone-in min rawn be tawh ngai lo a. Thla hmasaa ka lehkhathawn lah chu min rawn chháng thei rëng rëng mai bawk si lo. Lehkha kha a chhúngte ka pe ngawt pek a nih kha. Min thawnsak ta lo nge tih pawh ka hre lo e!

Puja chawlh ní tak a ni a, sikul pawh kan chàwl ve a. Kum dangah, vai puja vànga kan chawlh àwm ka hre ngai lo a, kumin chu puja chawlha rawn häw tùr an awm vàngin chawlh a ni tih ka hre chiang mai si! Fing sawtin ka inhria a. Mahse, ka fin sawtna chu min ti hrehawmtu a ni si—Amber-i hmél hmuh tùr a awm thei si lo a!

Tlai khat chu walkman paiin kan sikul tláng lamah ka tei chho a. A lo reh thuap mai. Kan tei dun rek rek thinnaah te chuan mahniin ka tei rek rek a. Ka hla ngaihthlâk, hla pakhat chu ka rewind leh thìn. Tùn hmaa ka lo ngaihthlâk fo, Johnny Horton-a hla, “All for the love of a girl” kha a ni.

“Well, today I’m so weary, today I’m so blue, / Sad and broken hearted and it’s all because of you; / Life was so sweet dear, life was a song, / Now you’ve gone and left me, / Oh, where do I belong? / And its all for the love of a dear little girl…”

A thunawn ngaithla zo loin ka hmet tàwp a. Ka dinna thlang lawk thing zára lelte lo kiu vawl vawl chu ka ngaithla zui ta zâwk a. Ka khua a har ngawih ngawih a. He khawvêlah hian “mahni maia” awm niin ka inhre ta hial a!

October thla chuan Amber-i chu a rawn häw lo! A chhan pawh ka hre lo. November thla rawn inher chhuak pawh chuan a rawn her chhuahpui chuang lo—December thla paw’n! A tel loin board ka êkzam a. A tel lo bawkin Krismas pawh ka hmang! Ka mal a, ka lung chu a léng namén lo hle thìn a. Hun chu a kal hian a kal bek bek tak zet zet a ni!

High sikul naupang thar

Kum a lo thar a. Kan véng high sikulah, sikul naupang thar ni tùrin ka inziak lût ve a. Zirlai pawh kan tam hle mai a; mahse, “mahnia lût” niin ka inhre tlat a! Ka nuna “nuam” leh “hlimawm” ni thìn zawng zawngte khân min thlawh bosan zo ta vek niin ka inhre bawk!

Naupan laia kan lo châk ve êm êm thin—high sikul zirlai nih pawh chu a nawm vakna pawh ka hre hran chuang lo e! Green bag kan ak ve tawh a, a ipte chhìnah rock band hming hrang hrang kan ziak ráng ve thei tawh tih chauh lo chu!

Sikul tharah chuan thian thar pawh an tam; mahse, thian bulfûk ka nei lo a, han kawm bîk pawh ka nei lo tluk a ni. Ka khawvêl chu—ka sawi fo angin “mahni” tih hian a sawi fiah vek àwm e!

Tum khat ka sikul báng, ina ka häw, pindana ka lût chu, ka lehkha zirna dawhkànah lehkhathawn hi a lo awm a. Envelope-a rose pár lem a chuan vàng leh a inchàrna bula “Open with smile” tih a inziah “kher” vàng pawh ni loin, pen tui päwl hmang loa pen tui dum hlïr hmang thin ka thiannuin, pen tui duma uluk tih hriat fahrana ka hming a ziah vàng zâwkin, a chhúnga “thu awm” chu chhiar thuai thuai ka duh a ni. Inthlâk hmasak emaw, inbual hmasak të të emaw ka tum lo. Bag pawh dah loin envelope chu ka hawng thuai thuai a. A perfume hman thin, mipa perfume rim kha a lo nam chék chék a. Uluk mangkhèngin, hawrawp pakhat pawh ka chhiar hmaih ang tih hlau tak chungin ka chhiar ta a …

“To, king of my heart …” tiin bul a tan dáwn emaw ka ti a; a tan awkawng lo mai! Enga chutia a tan ngawt ang? |anna chhan tùr awm hek lo! “|hian ngaih êm êm…” tia bul tanin  an sikul, hmeichhe hlang sikul leh an hostel chanchin chu, sei mangkhèng a rawn ziak a. A hnuah, nikum puja chawlh lai leh Krismas laia a dam loh vànga chawlh a rawn hman theih loh thu a rawn sawi a. A dam that chuan kumin October thlaa rawn hàw a tum ngei tawh thu a rawn sawi bawk.

Ka chanchin leh a tel loa ka awm zui dàn emaw, ka board result takngial emaw pawh min rawn zâwt aih lo! Ka vui lek lek. A tàwpah, “… letter min rawn fly ve duh bawk si lo a. Ka kal dáwna ka sawi, ‘…kim lo lam ngaihtuah loin in lo hlim dáwn nia,’ ka tih kha i nunpui hle a nih ka ring a. A lawmawm tho e!” a la rawn ti zui lehnghâl!

Ka lehkhathawn kha a hmu lo tih ka chiang ta! A chhan tùr àwm pawh ka hria … in ka hria! Chu chuan min ti nuam lo a. Chu ai mah chuan, an sikul chanchin sawi luam sia hrehawm a tih thu emaw, keimah anga lunglénga a khawhar ve thin thu emaw pawh, kawi khat mah a rawn sawi lo chuan min ti “nuam lo” a ni!

A lehkhathawn chu chhàn lêt ngei ka tum a. Zànah chuan ka ziak kúr ve luam mai. Ka duh leh lo a, ka pawt thlër leh thìn a. “Puja chawlh a rawn hmang ‘tak tak’ tawh dáwn tho aläwm,” ti chungin ziah lohah ka tlâk ta nge nge a.

Tichuan, Puja chawlh bawk chu nghâkhlel angreng tak chungin ka nghâk leh ta fan fan a …

‘Ka hmangaih che … a ni ang!?’

September thla pawh chu a dàn ngai të-in a rawn inher chhuak leh a. Thla tàwp lam a lo ni leh ta reng mai. Zirtàwpni tlai khat chu, chawlhkár tàwp test kan nei a. Ka zo har ber lehpek a. Ka zawh chuan sikul tual leh a vêlah chuan tù mah an lo awm tawh lo. Häw ve mai ta lo chuan kan sikul hlui lamah ka tei phei a. Khua lah chu a nuamin a favàng tlai khua leh ruih tawh a. Ka lung chu a léng êm êm mai a. Ka khua chu namén loin a har thar leh a ni.

Chutia mahnia tei ruk ruk ringawt chu dikin ka hre chiah lo a. Hàw tuma ka inher chiah chu, kan class room hlui tukverh nghênga Amber-i lo ding reng chu ka han hmu hlawl mai!

Tünah!? Ka mumang em ni!? September thla tàwpah … maw!? Engati nge? 

‘Amber!’ tih pahin ka pan chho nghâl. Min lo nuih ringawt. ‘Engati nge … tünah te!?’ ka ti háw a.

‘Á pa’n ka dam lo min rawn hruai hàw a. October puja chawlh pawh ka nghâk thei tawh lo,’ a ti. Ka mumang chu a ni lo e. A sírah chuan ka din vena tùr min lo kianin a ding sawn hlek a.

Lehkhathawna a sawi tawh angin Shillong-a an chhuk thlâk atangin Amber-i chu a hrisël thei tlat lo a. Damdawi in pawh an lût zing hle. A thisen an test lahin natna hrik eng vak mah an hmu thei lo a, tláng hri léng veiah an ngai leh mai thìn a ni àwm a. ‘Shillong khu ka ngeih lo a ni ang … ka hre thiam chiah lo,’ a ti a. Pawi hi ka’n ti lo khawp a—ngeih lo nia a inhria chu! ‘Ka thawveng thei thlâwt lo a maw … ih … hmän kha ka ang thei lo! Ka nun, ka thil thlìr dàn, a! ka khawvêl hi a dang hlawk ni berin ka hria. Ka hrisèl lohna chhan ber pawh hi … ka taksa lam hi a ni ber lo … ang!’ a ti.

Han chhàn vak ngaihna ka hre si lo a. Kan ngawi dùn deuh reng a. Chutih lai chuan a kut vei lam chu muangchánga vai dalh dalh pahin ka bán ding lam a rawn ban pah leh dá dá thìn tih ka hria. Ka kut ka lo pe a. A vuan a, min kai ta a. Inkai chung chuan kan sikul hlui thlanga sikul barel lian awmna lamah chuan kan inkai thla a—tlai ni tla tùr thlìr rem êm êmna hmunah chuan.

‘Shillong i ngeih lohna chhan chu ngaih i nei ang a, nuam i ti lo a ni zâwk lo maw?’ tiin ka fiam zauh a. Ka sawi zawh rualin a mi chhànna tùr chu hriat ka huphurh leh êm êm si a!

Min melh deuh ralh pahin, ‘Nang, nuam i ti em—ka awm lo chu?’

‘I va’n hre thei—ka ti lo tih! A mak! Ih … ka mak! Kim lo … ka awm! Amber … ka hmangaih tawh che a ni ang! Ka tum vàng pawh a ni lo … in ka hria!’ ka ti nuai a nih chu!

Mî pawh en chuang loin, ‘Ka ring!’ a ti leh ringawt!

Barel bula thut pah chuan Amber-i chuan, ‘ “Kim lo … ka ngaihtuah thìn,” i ti em ni? Nge, i rilru hi a kim zân lo zâwk?’ tiin min fiam zui a, a nui ar ar a!

‘Ni e, ni e. Tùn hma chuan ka rilru hi a kim loh ka hre ngai lo; mahse, Shillong-a min awm bosan atang erawh kha chuan a kim tawh lo a ni,’ ka ti ta jeih a.

‘Ka ring.’ A ngawi det a. Aw a thian leh të të a. Zawi sapin, ‘Ka awm ang hian awm ve lo la ka duh che asin le … Mahse … awm ve la ka ti tho si che a … ka hmangaih ang che hian!’

A chiang e!

Ka kut min vawnsakna chu nghet deuhin ka hmer thut a. Ka kuah a. Hmai insi lo chauh hian kan inen a. ‘Amber … “kan hla” kha “hla” a ni satliah tawh lo … kan khawvêl a ni tawh—Love in September!’ ka ti a. Ka fâwp a. Min chháng lêt ve thuai a. 

Chü September thla chawhnu lam, Zirtàwpni hnuhnung ber tlai ni tlâk rual chuan kan infâwp leh vawng vawng thìn a …

(kan chhunzawm leh dáwn nia …)