Hmanlai Mizo nunah chuan mipa in lu an met ngai lo, an sam an zial thin a ni. Hualchhunga hi Mizo ah chuan lu met-a eizawng hmasa ber a ni awm e. Kum 1942 Indopui lai vel khan Shillong lamah ‘Puanthui’ zirtir in a liam thla ve a, a zir tum tak puanthui pawh chu a zir chhuak ve ta mai a, chutia puanthui a zir rual chuan lu meh pawh a thiam tel bawk a ni.

Kulikawn dam lamah an awm a, a nupui hi Hlimen khaw mi Nuzawni a ni. An fate: 
1. Thanrumi , 1942 w/o Lalthakima
2. Thanmawii , 1945 (Nurse) w/o Rinliana
3. Hnehtua , 1948 (driver) h/o Zaremi

Hualchhunga puanthui zir zo Shillong atanga a lo hawn hian Aizawl an awmna veng Kulikawn leh Thakthing Mission veng velah hian puanthuia eizawng an lo awm nual si avangin an kara han inzeh ve leh ai chuan lu meh a lo thiam thova, lu met a eizawn chu a fuh zawkin a hria a, bul a tan ta a ni.

Kan nu Zachhungi pa hi Chhawngkhala, Thakthing dawrkai puanthui thiam tho a ni, an dawr kawt bathlar vel ah pa ho te hian Hualchhunga chu lu an meh tir thin a, a nupui leh a fate hian an rawn zui diah diah a, a lu meh chhung chu an nghak thap mai thin a ti. Lu meh a thiam a, tin, miin an ring a, an khawngaih bawk a, kotu leh lu meh tur a hmu tam telh telh mai a ni. Pa rual deuh chhungkua te chuan Hualchhunga chu Theka a ruai tawk an awm, chung zinga mi chu Upa Ch. Pasena te chhungkua an ni. Chhuanliana BVT pawhin, “A sam khuih kha a na riau mai a, a lu meh dawn hi chuan kan biru a, tlan bo tawk kan awm chawk thin,” a ti. Tlanbo/biru bo awm mah se, a hlawh a tlem chuang lo a, atan a pawi miah lo a ni. Pastor Chhuahkhama te leh mi dang te pawhin Theka in an ruai thin. Hetih hunlai vela lu meh man chu naupang lu meh man siki a ni a, tunlaiah chuan, ‘pawisa 25’ ang hi ti mai ila, a chiang mai awm e. Puitling lu meh man atan chuan duli (Pawisa 50) a ni. A khawsa thei deuh ho hian Theka in an ko mai thin.

Aizawl Dawrpui veng lam te pawh an lu a meh sak thin a, Dawrkai te, sawrkar hnathawk leh mi lian hote pawh an lu a meh sak zel mai thin a ni. Pu Vankhama lu te pawh a meh sak thin a. Pu Hrangchhuana, Hrangchhuana Pharmacy neitu pawh kha a lu meh sak thin a, Rs.3-a dil thin a, a pe ve mai thin a. Nikhat chu, “Huala, engatinge midang lu i meh in Siki thum i dil a, kei Rs.3 min dil bik?,” a ti a,  Huala chuan eng danga chhang ta lo chuan, “A nih siki thum man in ka met mai dawn em ni,” a ti a, Pu Hrangchhuana chuan a duh ta bik lo a ni.

A lu meh thiam zia an hria a, lu meh tur pawh hmu tam telh telh a. A vak zauva hre lo pawh an awm lo a ni. Nikhat ah lu a meh tam tum leh mi khawngaih a dawn deuh ni chuan Rs.50 lai han hawn tum te pawh a nei thin. Hetih hun lai chuan Rs.50 te chu tam deuh mai a ni.

Huala hian Bawrhsap lu te pawh a meh sak ve thin a, Bawrhsap pawhin a nupui hrisel lohna avanga rualbanlo a nih avang chuan a lainat hle. In hmun pawh ‘Zodin Cinema hall’ bul hnai deuh ah hian a pe a, Sipai lal lam ten an remtih chiah loh avangin an cancel  leh a ni.

A NUPUIIN AT SAN 
Hualchhunga Nupui  Nuzawni hi a fapa, an unau zinga naupang ber Hnehtua kum 1948-a a pian atangin hnute pek na chang a hre tawh lo, Chhul lam fel lo a ni. Hualchuunga hi a buai thei em em thin a ni, a fa u te la naupang bawk si, a nu hoin buaipui an ngai vek ta si a ni. Huala hi pa fel ve deuh mai a ni a, Welsh Mission Hospital Durtlang Dr. Pi Puii khan a lo khawngaih em em mai a, Hnehtua, nausen pawh chu an enkawl sak ta a. naupang pangngai taka a nih chhoh thlengin a enkawl sak a ni. Dr. Pi Puii hian kum 7 lai a enkawl sak niin hriat a ni a, Sapram thlenga hruai haw pawh a duh hial a ni. Hualchhunga hian a nupui chu Doctor hnenah te a tihdam leh dan kawng a awm em ti in a entir thin a,  Tawngtai dam thei pawh a pan pui thin bawk a ni.

Amah Nuzawni hi chhul lam fel lo a ni a, a tha thei tak tak thei lo. A chang leh ramhnuai lamah te a kal daih mai a, Huala hnathawk hawng hah deuh chauh deuh tum pawhin a hmuh hma lo chu a zawng mai thin a ni. Hlimen lamah Nuzawni hi a phei tam ber a, mahni seilenna veng leh In awmna chu a hai miah lo. A nu Pi Mawii leh a chhungten thiam takin an lo ngaih sak thin. An pa in a rawn lam a, a hawng phei duh lo hi a tap vak vak a, a pasal hi a hauva, a an khum bawrh bawrh a, ti chung chuan dawhthei takin a hruai haw phei leh mai thin a ni. Huala hnenah hian Nuzawni u,  Khuanduha chuan a farnu chu, “Ka lo enkawl chhawk ang che,” te pawh a ti thin a, mahse a remti lo. A nupuiin chaw a ei duh loh tum te hian, a eisan ngailo reng reng a, chutiang tak chuan a nupui hi a enkawl a, Saruaka a vah chhuah tum te hian puan nen a um zui tawk tawk thin a ni.

Tunlai ah chuan, mipa tam tak chu - an nupuiten an at san chuan - nupui dang an nei leh mai thin a, Hualchhunga chu thihna chauh lo chuan a pawt then ve lo a ni. A entawn tlak hle.

A fapa HnehtuaSawrkar ah Department  Driver in a thawk a, Mizoram buai khan MNF- ah Hnam Sipai ah a tang a, hun enge maw chen a tan hnuah India Sipaiin an man a, Phai lam ah Jail- ah a tan laiin kum 1969-ah a pa Hualchhunga hi a thi a, a nu Nuzawni pawh kum 1970-ah a boral zui ve leh ta mai a ni.