Zing dar 4:00-ah ruah a sur avangin ka tho a, dar 5:30-ah pawh ka la nghak hret a, Biakin lam panin ka chhuak a, ka huh nghal chu a ni mai. Hmun pakhatah lei lo min tlem a awm a. Dar ka vua a, dar 6:00-ah chuan mi paruk chiah kan kal hram a ni.

Ka tawngtai zo dar 6:15 ah chuan Pu Laldailova kawmchhak chu nasa deuhin a lo min tawh, ke pawhin a hawn tlang theih lova, hmun dangah ka hel ta a ni.

Chhiatna thlen dan Melthum lam :

1. Pi Vanlalhriati : Hriati Zion Veng, Melthum chuan Pu Saihmingliana Local Council Chairman In bul leimin chu chiang deuh maiin a thlir a, a hnu reiloteah Pu Ringa rawra khawl hlui zawnah nasa deuh maiin chhak lam lei a rawn min leh bawk a. Dar 6:10 velah chuan thil puak pawp a hria a, Pu Valtea te In chu leimin rapthlak tak maiin a hnawl chu chu a hmu a, a mangang hle. A fate chu rang takin a kaitho a, "Pu Valtea te In leimin in a hnawl zuk chhar ang ui," a ti chul mai a! An chhuak thla a, mi an kaitho thla zel a ni.

2. Ruatsangi : Pu H Lalawmsanga fanu Thlanmual Veng Hlimen chu zing karah dawnkan bula a thufel chiah Melthum Zion Veng chung lam a hawi chho a, a ripawp mai a, leimin chu a tawlh thla hum hum mai chu chiang zet maiin a hmu a, thawm pawh a ring hle a ti a, dar 6:10 vel chiah a ni.
    
3. He chhiatna thlenna hmun a awm Pu Duhsanga Melthum Furniture Workshop neitupa in Melthum LC Chairman Pu Saihmingliana in rawn khawihtu lei min chu a hmu, a bul lawk Pu Ringa khawl hlui chhak lam leimin in Motor a la lai te nen lam an nupa in an thlir a, chu mi hnu ah Melthum Quarry hlui chunglam Pu Valtea te In leimin Sabereka khuangkaih nasa lutukin a rawn hrut thla. Vai In te Pu R Muanzova in te a thlang lam a mi te chu A rawn len mâm thla duak mai a ni. Tichuan Pu Duhsanga te, Pu Thantea te, Pu Samsona, Hlimen vengchhak te, Pu Tepuia, Zion veng Melthum te ho hi Pu Valtea leh a fanu ruang buaipui tu te an ni a, Claire Zoremmawii hliam pawh.

4. Pu Levia, Tresurers Melthum YMA pawh chhiat tawkte tanpui a ruang leh hliam te buaipui turin Zion veng Melthum lam a thleng chho a, Pu Marina leh Pu Vanhlira Valupa te uapna hnuaiah tlangvâl pa hote'n ruang leh hliam an buai pui a ni. Tin, Pi Mahriati Colney pawh sawi hmaih chi a ni lo, a lo hrufai in a lo siamfel thei zel. Nu huaisen chhuan awm tak a ni.

Pu Famkima'n JCB-in kawngpui clear ngai thui tak a ti fai bawk.

Pu Thanmawia'n Bialtu MLA messages in chhiat tawh thu a va hrilh a, Baryl Vanneihsangi hi Dar 8:00 hnu lam ah Melthum a lo thleng phei. Zing Chaw pawh Pu Dawnga in ah a ei nghal a ni.

Pu Lalduhawma Chief Minister leh Pu K Sapdanga Home Minister te leh mi dang anmahni zuitu te chuan Dar 11:00 vel ah Melthum Kohhran hall ah ruang te puanin an zavaiin an tuam a, mitthi te Rs 200000/- an chhungte pek an nih tur thu an sawi nghal.

Tichuan chhiat tawhna hmun an thleng pheia a, lo phei zelin Pu Lalremsanga, MCS in ah an chawlh laiin Pu R Lalngheta leh mi dangten Hlimen chhiat tawh dan te an hrilh ve nghal, tiang taka Hlimen-in chhiat an lo tawk hi an lo hre lo a ni.

5. Pi Sawmi w/o Upa Lallianngura Sailo Melthum leh Pu Lalduh­thlanga (Valtea) te phone-a inbiak thu :

Pu Valtea - Pi Sawm.. Hei chhiat kan tawk rup mai!
Pi Sawmi - In him em?
Pu Valtea - Kan him e, Bangchhak lam a rawn tichhe phei vek...
Pi Sawmi - Hello.. (a ti a.. Biak zawm tur an awm tawh lo, an kawmchhak leimin chuan a rawn hnawl ta rup mai a ni!)

Pu Lalbiakdika, Asst Secretary YMA Melthum chuan mipuite hriaturin Vantlang mike chuan an puang a chuta Melthum Leimin a thi te chu :
1. Lalduhthlanga (Valtea) kum 66 - te chhungkua
2. Thantluanga kum 50
3. Baby Zoremsiami kum 36
4. Dorothy Lalruatkimi kum 20
5. Gloria MS dawngliani kum 14
6. Abel Lalmalsawma kum 4
7. Claire Zoremmawii kum 6- damdawiin-a enkawl mek a ni.

1. Muanzova kum 56 te chhungkua
2. C. Lalsiamliani kum 46
3. Deborah Lallawmawmi kum 11

1. Lalremtluanga kum 34 te chhungkua
2. Lalduhawmi kum 34
3. Lalhlimpuii kum 6
4. Lalthakima kum 42, Ruang hmuh loh
5. Lalvenhima kum 8, Ruang hmuh loh
6. Ramdinsanga thla 6, Ruang hmuh loh

Hnamdang
1. Beetu Manjit
2. Sanjay Ray
3. Dilip Manji
4. Bhuvaneswar Chowdhuri leh hliam pakhat

Melthum leimin-ah hian chhungkaw 3 leh hnam dang inluah nen mi 19 an thi, Mizo thi 15, hnamdang 4 an thi.

Hlimen chhiat tawh dan : 

1. CL Muanawma leh a nupui Julie Zothanmawii chu an vawk note buaipuiin zing lam thlengin an buai a, Zing Dar 5:50 ah chuan tui hawk lo luang an hmu a, an pa chu In-ah a tlan lut a, bedroom tukverh-ah an fa chu a thlak thla a, an thenawmte an ko tuar tuar a, a pa Lallianzama te In a him loh bakah chirh leh tuihawk a nasa si a, an pate Lalbiakmawia In-ah an tlan lut a, chulai pawh chu chirhin kawt chu a khat a, R. Dingliana In lamah chirh te chu dai pheiin an pan ta a ni.

2. Vanneihchhunga - Vantea h/o Sangkimi, an harh hma a, kawngka an hawng kha an nu Sangkimi hnenah bawihteii pua la, tlanchhuak nghal rawh a ti. Tichuan, an pute Martina te kawngka a sawi vak vak a, Pu Rammawia te a au tuar tuar bawk. Pu Rammawia chuan ri pawp a hria, dar 6:00 vel a ni, an step lamah tuihawk a lo luang chhuak sen nguk nguk mai a, Martina te nen an chhuak a. Pu Lalbiakmawia In kawt-a mi Lalpiantluanga te an koh theihnghilh a, In lamah an tlan kir leh a an va kaitho leh a, tichuan Pu R. Dingliana In lamah bawk an tlan phei ta a.

3. Nl Ruatsangi : Pu H. Lalrinmawia leh Pi Lalramthangin te fanu a ni. A khumah Ruatsangin saisir zawngin a mi a, a rawn ripawp chu chirh leh thing ten a rawn chhilh, a tirah chhuah a tum a, a thei mai lo. A insiam a, a nu leh pa an auva - chhang tur an awm tak si loh avangin 'Lalpa min tanpui rawh' tiin a au leh a, A nu leh a pate mutna lam chu a mam thla vek tawh a ni. Kawngkapui lam atangin a chhuak a, Vantea nen an intawk a, an In lamah a chhoh pui a. Ruatsangi hi a nu leh pa awmna lai ni awma a hriatah chuan a bawk a, Martina'n a kai thova, hmun him lam an panpui ta a ni.

4. Pi Chawngmawii te In leh Pu Dengkhuma te In : Pi Chawngmawii fapa naupangber Benjamin-a chu an dawr chung-ah a riak a, leimin hmasa zawkin a riahna chu a rawn chhawk thla a, an motor pawh a hnawl tel a, an In thlang kawr atangin a vakchhuak thei a ni. Ral leh lama awm Pu Dengkhuma te chhungkua pawh an au a, lung ten an In an vawm a, an tlanchhiat fel hnuah Sabereaka Khuangkaih turu tak chuan an In te chu hneh takin a la fai thla ta vek a ni.

Hlimen Leimin-a thite

1. H. Lalrinmawia kum 56.
2. Lalramthangi kum 53.

Hnam dang thi te:
1. Santosh Nanjhi
2. Gautam kuwar
3. Nepal Dehari
4. Pradip Ray

(Chawngmawii te In leh  Dengkhuma te In Sabereka khuangkaih in a la a, thi leh hliam an awm lo)

Hlimen lam pawh: Kawnglaih thar a tam si a Mauhakkawn hla lam atangin JCB ten kawng Motor kal theih in an rawn siam phei zêl a ...

Pi Zamliani, Pu Lalzualaleh Pu Lalhminga Chairman LC ten an JCB khâwl a tul tul motor kal theih in Melthum lei min na te an nawr tluan phei vek a ni. He mi rual hian Motor nei ho pawh ui lovin an motor a thawh zêl bawk. Sawrkar lam PWD pawh engmah chêtna a nei lo.

Hlimen Khaw  chhûng lam lo thleng hmasa te:

1. Prof F Lalnunmawia, Ex MLA
2. KS Thanga, Ex MLA 
3. Robert Romawia MLA ke a lo kal ngat.
4. Lalsawivunga, Minister 
5. Ramthanmawia, MLA
6. Bialtu MLA Barelyn Vanneihsangi hi Dar 4:00 pm ah a lo thleng thung.

Motor kawng JCB ten an nawr tlang nghal hi a lawmawm hle a ni.

Falkawn lam : Pu Lalthanzama leh Pi Lalhmangaihzuali -  Anni hi unau an ni a, an kawmchhak leimin In a hnawl a, an unau hian an boral a ni.

Kelsih Lam : Pi Lalnunziri Kelsih a awm an ni a, vanduaithlak takin an In luah lai leiminin a hnawl a, an boral ta a ni.

Maubawk nu Pi Lalrimawii chu Lungsei-ah leiminin an In a hnawl a, a boral a ni.

Aibawk lam : Pu Mathew Lalchhanhima leh a nupui Pi Lalduhsangi te chu an In leiminin a hnawl a, an nupa hian an boral, an fate hmun dangah an riak a, an him thung a ni. Pu Mathew Lalchhanhima ruang phei hi chu an hmu zo ta lo.

Hlimen lam leimin chhui zauna

June 3, 2024-a Aizawl DC Order chhuah angin Hlimen quarry veng phei-ah hian In dinglai 46, chhungkaw 68 vel luah chu thu leh awm hma chu an In chhuahsan tura tih an ni.

June 4, 2024-ah Home Minister K. Sapdanga chuan Hlimen leh Melthum Joint Meeting te ro a relpui a, heng In chhuahsan te, chenna tur atan hian Joint Committee te chu Planning leh Estimates siam turin a tih bakah ei leh bar tur thlengin a ngaihtuahpui tur thu a sawi.

Local Council leh YMA Joint Committee chuan Estimates a siam ta a, Rs 44,28,512/- chu mamawh tur zata an chhut a ni.

Relief Camp sak nan Transport lam dil an ni a, Director berin a remti lo, Vawi hnih lai dil an ni. Hlimen field tur man awm mang lova sawrkar kan pek dan te thlirin lung­awi a har khawp mai.

A tawpah Chief Minister hnenah thlen ni se tiin heng mite hi an thawk chhuak phei - Pu R. Lalngheta, Pu Rothuama, Pu Lalrinmawia. Bialtu MLA Beryl Vanneihsangi'n a ho a ni.

Hemi rual hian Aizawl DC lam leh PWD lamah lamkal intirh a ni bawk a, Chief Minister-in Transport lam leh DC lam te a rang lama hma la nghal turin a ti a. Tichuan, sawrkar hian estimate siam chu sum indaih lohna avangin Rs. 6,00,000/- ah tih hniam a nih thu an sawi.

Relief Camp Sum hmahruai engmah a awm lo a, chhiat tawh laia tanpuina dawn te chuan bul tan a ni ta. Hlimen khawtlang hruai­tute luhai zualna chu Primary School I leh Middle School II-ah hian chhungkaw engemaw zat an awm a, AMC-ah Ward No. XIX in­thlang tur kan nih avangin an chhuah a ngai bawk si, a buaithlak khawp mai. A bik takin school a awm hote hi vawi thum ka tlawh tawh, tawngtaina te ka hmang. Relief Camp a awm tum Chhungkaw 43 an ni, tuna sakah hian chhungkaw 9 te chhena tur chiah bak sak theih a ni lo.

Kum 1992-ah August 9-ah khawvela hriat khawpa chhiat tawk khua chu Hlimen-a mi 70 thihna kha a ni.  Khatih hunlai kha? Chhiat kan tawh lai vel khan kha tih laia Congress sawrkah khan Chief Minister Pu Lalthanhawla a ni a, bialtu MLA chu Pu Sainghaka, Minister a ni. A rang thei ang bera hriattir an ni. Rang takin hma an la nghal a, dil ngai lovin tul leh mamawh tur an rawn ti nghal vek a, a tawp thlengin min thutchilh tlat a ni.

Steering Committee Hlimen

Steering Committee for Relief & Rehabilitation of the Victim of Hlimen Landslide' Chairman Vaivenga, Minister. Member te - Health Director, Chief Engineer (PWD, PHE, P&E)  Aizawl SP, CYMA President, Hlimen VCP, DIPR leh MHIP te niin Aizawl DC Secretary a ni. Hetiang hian changtlung takin hma an la a ni.
    
Relief camp Mualzawl-ah sak a ni

Aizawl DC-in hma a la, ADC Pu Thanglianruma chuan mawh a phur a, a rawn thutchilh tawp mai a ni. Heng bakah hian ram zau deuh mai sawrkarin a lei a, an chenna In sak sak a ni a, a thlamuanthlak em em a ni.

May 28, 2024 zingkar chhiatna lo thlengah chuan Melthum leh Hlimen khawtlangin theih tawp an chhuah. 

Aw le hmabak thui tak a la awm, Pathian leh sawrkar, Zoram mipuite min theihnghilh lo turin kan ngen che u a ni.