Covid-in chhungkua min luhchilh ve tak zanah chuan, kan fapa, mi rama awm nen, keini chhung pindan hranga awm darh nuaih ngai thar ta nen, (inti) changkang tawkin zoom hmangin chhung inkhawm kan hmang a. Nu ber hun a ni. A chhiar kal mek lai sa, Daniala a chhiar chhunzawm a. Bung 3 na,  Sadraka-te thian zaho meipuia paih luh thu tak kha a lo ni a.

“Kan Pathian a rawng kan bawl thina chuan rawh tuina meipui ata min chhanchhuak thei si a, i kut ata pawh aw lalber, min chhanchhuak mai ang,” tih chin kha a thlamuanthlak em em a ni. Covid han vei ve tak chiah phei chuan a ngaihnawm thar khawp a, by heart thar a nuam a, thupui bera neiha underline sen tuar mai chi tur a lo ni a.

Covid-in min han luhchilh meuh chuan ngaihtuahna a vak thui ve duh asin! A chhe ber ngaihtuah a awl ve khawp. Chuvang chuan, ka tan, ka chhungte tan, rilru inbuatsaih a ngai ve. Ka sermon zui ta lawk a, chhung inkhawmah chuan, hetiangin :

“Pathian hian harsatna atangin min chhanchhuak thei dawn a, natna lak ata pawh min chhanhim thei a, thihna lak ata pawh min chhandam thei. A thlamuanthlak asin!

“Mahse chu aia ril leh Pathian rin dan dik zawk chu, khami thu dawt chiaha mi kha a ni zawk. ‘Chuti lo pawh ni sela (Min chhanchhuak dawn lo pawh ni sela) i pathiante rawng kan bawl dawn lo a, i rangkachak milim din pawh chu chibai kan buk hek lo vang tih hi hria ang che,’ tih hi a ni.

“Kan Pathian hian Covid lak ata hi min chhanhim thei a, min tidam thei asin! Halleluiah!

“Min chhanchhuak loin kan thihpui hial thei a, pathian tak ni lo rawng kan bawl phah tur a ni lo a, milim chibai kan buk chuang tur a ni hek lo. Pathian kan rinna a nghing tur a ni lo ang. Hei hi a pawimawh lai zawk a ni. Thlamuanna tak tak chu chutah chuan a awm zawk.

“Tunlai thalai zingah harsatna an tawh a, an beisei anga chhanchhuahna an hmuh loh avanga Pathian ring ta lo, vui ta tlat, beidawng ta tlat an awm fo. Pathian an rinna nghing ta mai an awm thin. Lei malsawmna hmuh nan leh leia taksa leh rilru damna atan chauha Pathian ringtu tan Sadraka te, Mesaka te, Abednegoa te thu hnuhnung zawk hi inzirna tur a ni.

“Covid kan kai a. Pathianin min tidam thei. Pathian min tihdam theihna hi hlimpui a, lampui a, ‘rau pui’ a awl khawp. Tu pawhin hemi chin hi chu kan thlamuanpui vek.

“Mahse, he harsatna atang hian min chhanchhuak dawn lo pawh ni sela, covid hi kan thihpui hial ta a nih pawhin, milim chibai kan buk tur a ni lo ang. Pathian hi rin reng tur a ni tawp. Chu chu ‘a rau ber’ lai tak tak zawk chu a ni,” tiin.

Ka fate chu an bu ve nghat nghat chuan ka hria a, an la naupang deuh a, an rilruah Pathian rin dan dik tur zawk hi lut fuh se ka ti hle mai.