Mite hian eng ang in nge min ngaih ang le? Miin an ngaihdan tur che hi i ngaihtuah ve ngai em? Mi thenkhatin mi tha, mi fel, kawm nuam leh thil phal tak anga min hmuh lai hian thenkhat chuan mi fekfawn, mi uikawm, phakar leh mahni hmasial tak ang pawhin min lo hmu ve mai thei bawk. Khawvel a ni miau a, mi zawng zawng kan tilawm vek thei si lo a, mi min hmuh dan pawh a hrang nuaih ta ve ang. Mi thenkhat kan chunga an lawm viau laiin thenkhat erawh an lo thinrim ru viau thei bawk.

Tun hma deuh khat thingtlang khua leh veng tlabirh deuhah chuan ‘inchhuahchalh’ tih tawngkam kha a lar ang reng viau mai a, eng emaw hlekah kan inchhuahchhal fo mai. A bikin hmeichhiain an ching zual. “Hman ni chu Pu Kapa lungphunnaah Mawii sawn a rel hrep che a, phakar a ti lutuk che a,” an tih tawh chuan, “Mawii chu ka chhuahchhal chiang khawp ang. Tih tak emah chuan ani saw asin phakar ni, mi inngaihzawnna kara tlak zeh a hrat si, a zakthei lo ropui si,” an ti let hrep mai a ni.

Mite min hmuh dan chu eng pawh nise, eng ang pawhin min lo ngai se, chu chuan kan thil tha tih leh kan nunphung hi hawlh buai lo se a tha ber mai. Mi dangte tan nasa takin luang chhuakin, inpe ral raih mah la nangmah ei lo tawk, i thil tih apiang sawisel tum ngar ngar tawk an awm reng tho ang. Chung mite avanga i hnual a, i ke pen a khaihlak zel dawn chuan hmalam i pan thei nang. 

Tlangval pahnih hi khamah an inlawn siak a, mi tam takin ral atangin an lo thir thup mai a, thlirtu mipuite chuan tlak hlauhawmzia an hmu a, lawn chhunzawm lo turin an lo au tuar tuar a, tlangval pakhat chuan mipui thu chu a awih a, lawn chhunzawm zel lovin a chhuk ta a. Pakhat zawk erawh chu a nui vur vur a, mipui  chu a kutin a rawn vai lauh lauh a, a lawn ta zel a, chu kham sang tak chu a lawn chhuak ta hlawl mai a ni. An han belchiang a, chu tlangval chu bengchhet a lo ni reng mai a, amah hlauhthawnpuia mipui au thawm an auh phurna emaw a ti a, intihsiaknaah chuan lawmman a dawng ta hlauh zawk a ni. Ui bauh nazawng i ngaih pawimawh a, i tawng zel dawn a nih chuan a vawmna tur lung i chhar chhungin hun tam tak i khawhral mai ang.

Hetih lai hian mite min hmuh dan hi hriat a chakawm chang a awm ve tho mai. A tul chang pawh a awm bawk thin. Isua meuh pawh khan miten amah an hmuh dan kha a hre châk ve tlat. A zirtirte a zawt hial a nih kha. Mite hmuh dan lah kha a lo hrang nuaih mai bawk a. Thenkhatin Zawlnei Elija a nih an ring a, thenkhatin Baptist-tu Johana a nih an ring a, thenkhatin zawlnei tu emaw a nih an ring bawk a. Mite hmuh danah hian Isua kha a buai miah lo. Pathian fapa, lei leh vana lal ber ve meuh zawlnei tu emaw ang leka an ngai kha a tlawmthlak viau mai thei. Mahse, Isua chuan tlawmah a la lo a, a nihna dik tak (true identity) chu zep tlat turin a zirtirte chu a fuih sauh sauh zawk a ni.

Hetih rual hian a hun laia mite hmuhsit leh engdawng, mi nawlpui hmuh dan erawh dik hauh si lo, insawifiah theih bawk si loh erawh a awm theih khawp ang. Josefa kha a pu Potiphera tan rinawm leh taima takin hna a thawk a, ni khat thil thuah police-in an man a, kawl an buntir sawk sawk a, kawttherah an hruai chhuak a, tan inah an khung ringawt mai. Kutkawl bun chunga khawtthera an chhawmchhuah hnak hnak lai khan a zahthlak duh ngawt ang. A lo hmu apiang khan, “Engtizia nge ni?” tiin an inzawt sup sup ang a, “A pu Potipher-a nupui pawngsual a tum a, an man ta alawm maw le,” an ti ang a, thenkhatin, “Sal leh nghal, a va zak lo ve,” an ti ang a, thenkhatin, “Vaw hrep rawh se,” an ti ang a, a duhthawh zual thenkhat phei chuan, “Khaihlum nghal rawh se,” te pawh an ti mai thei. Mahse, mite hmuh dan kha Josefa nihna dik tak a ni miah lo. Mite khan an hmu thelh a, an hre thelh a ni.

Ram buai lai khan ‘A dumpawl’ tih tawngkam kha a lar ang reng viau mai a, a phuk a phak hre lo khan ralkhatah a dumpawlho kha kan lo ngei ve em em a, ar chuk tui lovin kan lo chhuah a. Mahse, hun a kal zel a, thu ziak hrang hrang te, document hrang hrangte hmuh tur a awm chho ta zel a, a hun laia mite entleu leh endawng kha ni zawk ta riaua ngaihna a awm ta deuh tan tlat mai. ‘Kan mikhuala zawk kha a fing zawk alawm a lo nih le,’ tih ang deuhin, a vei lama thu tura kan ngaih thin kha a ding lama thu tur zawk a lawm an lo nih le, kan ti tan ta deuh niin a lang e. 

Mite min hmuh dan chu eng pawh nise, a chhe lama min hmu dik a nih chuan in enlet nan hmang ila, a tha lama min hmu dik a nih pawhin chapopui lo ila, a chhe lama min hmu dik lo a nih pawhin hun leh ni her liam zel hian a  dik zawk chu a rawn hai lang tho thin.