Mizo hian hun chhiar dan hming hi kan lo nei thui khawp mai. Saphoin Today - Yesterday leh Today - Tomorrow an nei chauh a; keini hi chuan Vawiin, Nichin, Nizan, Nimin, Nikum tiin a thumal hma lama NI a awm chuan hun kal tawh a sawi a. A thumal tawpa IN a awm chuan tun (present) tihna - Tukin, Vawiin, Zanin, Kumin. A thumal tawpa NAK a awm chuan hun lokal tur sawina... Naktuk, Nakin, Nakzan, Nakkum tiin. Hapta kar ni hi Zosap min siamsak ni awm tak a ni. Pu L.M.Chhinga, L.P zirtirtu, Baktawng khaw ziak, Mizo leh Vai Chanchinbua mi ka chhiar, ka hriat dan ang angin ka’n ziak chhawng ang e.

Sunday atangin tan an tum a; mahse, an inhnial nasat em avangin chawhnu lam atan an dah tha a. Thawhtanni, Thawhlehni, Nilaini, Ningani, Zirtawpni leh Inrinni chu harsa lo takin an phuah thei mai a ni awm e. A ni hming khi han chhutpui la, Sunday atangin thawh tan ni... thawh leh ni. Ni laita chu Nilaini, chutah Sunday atanga ni 5-na chu Ningani, Sikul kal tawp chu Zirtawpni, chutah Sunday atana Inrinni. Inhnialna em em awm loin Thawhtanni atanga Inrinni chu an phuah fel mai a ni.

Sunday chu an han khel leh ta a, a tam ber chuan Pathianni tia phuah an duh a; nimahsela, chutih lai chuan Pathian thute hi an la runthlak em em mai a, “LALPA i Pathian hming a naranin sawi suh,” tih kha Thu Sawm pekah a awm si a, hapta kar ni hminga an phuah mai chuan ‘Pathianni’ tih a tul sek dawn si a, Pathian hming an sawi naran tihna a ni ang tih an hlau si. Chawlhni han tih teh tlawng chu... Pathian biak ni ber hming atan chuan ho an ti leh bawk si. Pa pakhat, vai tawng thiam chuan, “Vai pawhin Robibar an ti mai a, Robibar i phuah ve mai ang u,” a lo ti ve mek bawk a; mahse, tu khaw khain vai tawng hming put chu an ngaihsak lo. A ni hrim hrim chu ni zahawm, Pathian kan biak ni a nih si avangin an uluk em em lawi si. Pathian tih chu duh ngawih ngawih mah se Thu Sawm Pek kha an hlau em em lawi si, sawi naran dawna an inhriat tlat avangin, an khel an khel mai a. Kha pa pakhat, Robibar rawttu khan lungawi lo deuhin, “Phuah tur in hre tawp si lo a, a hre ber keiin Robibar i phuah mai ang u ka tih leh in uksak hlawm si lo, in duh leh ‘CHUKCHU’ ti mai rawh u,” tiin titau deuhin a tawng chhuak a ni awm e, Zosap chuan, “Nang kha ngawi reng rawh... A! I kawr pawh a bal hle a ni, inah hawng la, luiah i kawr suk pahin inbual rawh,” tiin a tir hawng ta a ni.

Chawhnu lam chuan an han thukhawm leh a, an khel ngai bawk chu an khel leh ta a, Pathian an tih em avangin PATHIANNI tih duh ngawih ngawih mah sela an phuah ngam si lo (Chhiartu duh tak, kan pi/pu Khristian hmasate hian Pathian thu hi an lo awih teh a nia, “LALPA i Pathian hming a naranin sawi suh,” tih Thu Sawm Pek avangin duh ngawih ngawih mah se an ngam tlat lo). A tawpah chuan sit deuh chungin CHAWLHNI tihah chuan a tlu tlang thei ta hram a ni an tia lom...