MNF sorkar thar budget pum (regular budget) hmasa ber chu Ningani (June 13, 2019) finance changtu chief miniter Pu Zoramthanga'n a pharh ta a. Sorkarin a ngaih pawimawh zawng te, hma a lak dan tur te budget-ah hian a hmuh theih thin avangin budget hi sorkar hmel lanna pawimawh tak a ni a. Tun tum budget-ah pawh hian chutianga sorkar ngaih pawimawh zawng leh a hmalakna tur pawimawh te chu hmuh tur a awm nual a ni. Tichuan, kum 2019-20 chhunga Mizoram budget chu Cheng vb 10,692.30 a ni a.

Sorkar a inthlak hian ram hruaitute an inthlak a ni ngawt lo a, kalphung tam tak a inthlak tihna a ni a. Sorkar inrelbawlna lamah tihdanglam a awm nual a, official ho chanpual pawh tihdanglam a ni hlawm a. Congress sorkar hmalakna pui ber NLUP leh NEDP kha tun sorkar tharah hi chuan a zuzi nghal a, hmalakna thar tur SEDP bul an tan dawn thung. NEDP chu sum sem zawnga kalpui an tum loh thu an sawi a, state budget pawisa hmang tam lo a, sorkar laipui leh hmun dang atanga project siam a sum hai luh an tum thu finance minister hian a sawi.

NLUP kha an sawiselna lian tak chu state budget a ei hek a, plan sum a hman avangin hmalakna dangin a tuar thin kha a ni a. Chumi hnuah NEDP pawh kha state budget sum hmanga kalpui a ni leh bawk a. Sorkar laipuiin state sorkar hnena sum a pek dan kalphung hi finance commission 14-na atang khan a danglam ta a. Kum nga chhunga state-in sum a dawn tur leh kum tina a dawn tur a chiang nghal a. Tun hmaa state plan sum ruahmansak tu ber planning commission a awm tawh lo bawk a. Finance commission atanga sum hmuh hi tha taka hman thiam a pawimawh ta ber a. Chumi atan chuan sorkar hmasa pawh khan NEDP pawh khan an buaipui a nih kha.

SEDP hi chu state budget pawn lam sum hmanga an kalpui thei tak tak a nih chuan a zia viauin a rinawm. Finance minister sawi anga kalpui tur chuan mithiam zawk te, consultancy firm te, etc., an inrawlh viau a ngai ngei ang. Sorkar a fimkhur viau loh chuan SEDP hi tute emaw sum siamna a ni mai ang tih a hlauhawm a. Hmun dang atanga sum hmuhte pawh chu a puka puk a nih chuan leiba tipungtu, nakina phurrit a ni thei. Nakina phurrit ni lo tur zawngin hma la lo hram se a duhawm khawp ang.

India ram pumah hian chhiah intawm GST hman a ni tawh a, state bil hian chhiah lak theih a nei tam tawh lo. Tun hnaiah chhiah lakna thin zu khap a ni a, lirthei chhiah lak thin ‘life time vehicle tax’ pawh tihtlem a ni bawk a. Chuti chung chuan chhiah lak tlingkhawm hi a pung tura ruahman a ni thung, kumin chhunga state sorkarin ama puala chhiah a lak (state's own tax revenue) atanga sum hmuh tur chu Cheng vbc 573.69 tling tura chhut a ni. Sorkar laipui nena chhiahlak intawm atanga hmuh tura beisei zat pawh Cheng vbc 3,885.19 tling tura chhut a ni a. Nikum lam aiin chhiah tling khawm zawng zawng zat hi 13.52% a pung tura chhut a ni bawk.

Budget speech-ah GST huang pawn lama chhiah thar lak tur sawi lan a ni lo a, state sorkar chhiah awm sa tihpun tur tarlan a ni lo bawk. Sawi tawh angin sorkar chhiah lakna hnar pakhat zu khap a ni bawk a. Chuti chunga chhiah tlingkhawm punna heti a ni thei tur hi rin thiam a har viau. Press conference-ah pawh chanchinbu miten an zawt nghe nghe. GST atanga state sorkar sum hmuh tur hi a pung viau turah an ngai a ni thei ang. Non tax revenue lamah an tang viau anga, user charges-tui bill, buhfai man, electric bill, etc., te hi an tipung mai ang tih te a hlauhawm.

Sum hmanna tur langsar zual zingah mipui ngaihven tak district thar pathum tana sum ruahman zat chu Cheng vbc 15 (Nuai 1500) a ni a, hei hi DC leh SP office bul tanna leh district ding tir inrelbawlna atana hman a ni ang. Sorkar hmalakna pui ber (flagship programme), SEDP kalpui nan Cheng vbc 750 dah a ni a, hei bakah hian SEDP atana project siam leh buaipuina atan Cheng vbc 30 dah a ni bawk. Heng bakah hian ram chhung kawng thawm thatna atan Cheng nuai 15,000, healthcare scheme hnuaia medical reimbursement chinfel zung zung nan Cheng nuai 2,000, infiamna lama hmasawnnan leh infiamna hmunhma thuam that leh enkawlnan (SEDP hnuaiah) Cheng nuai 1,000, healthcare scheme thar changtlung tak kalpui nan Cheng nuai 5,000 dah a ni a. State chhung inkalpawhna kawng, PWD hnuaia (Road Fund Board) siam thatna tur Cheng nuai 5,000 dang dah a ni bawk. UD&PA kaltlanga kalpui, PAHOSS, mi mal in/ram a lirthei dahna tur hmunhma siamna atan Cheng nuai 6,000 dah a ni bawk.

Sorkar hmalakna tur hrang hrang atan hian sum tam tak hman a ni dawn a, state sorkar sum hmuh turin a daih dawn lo tih a chiang a. Kan state hian thawhchhuah kan la nei tlem bawk si a. Leiba tling khawm pawh a tla hniam hleithei lo a ni. pawisa kum liam ta 2018-19 tawp a state leiba tlingkhawm zat hi Cheng vbc 7,992.34 tling tura chhut a ni a. Chu chu state sum thawh chhuah zawng zawng (GSDP) atanga 35.89% lai a ni. Tun pawisa kum tawp ah hian state leiba tlingkhawm hi Cheng vbc 8447.92 lai a tling tura chhut lawk a ni bawk.

Kan economy hmasawnna a kal chak theih loh chhan langsar ni a budget document-a tarlan chu kan awm hmun kilkhawr vang (geographical factor) vang te, hmasawnna ruhrel that tawk loh vang te, leilung hausakna (natural resources) awm loh vang te hi a ni. Thawhchhuah a tam miau loh avang leh hmasawnna ruhrel tha a awm loh avangin hmalakna (investment) lian tham a awm thei lo a, chu chuan hmasawnna tha a tithu niin a tarlang bawk. Chutihlaiin, hetiang dinhmuna ding chungin inrelbawlna (good governace) leh hmasawnna ruhrel dinna lam (infrastructre development) lamah hian thawk tha ber (best performing state) zinga mi kan ni thung, tiin tarlan a ni. Heng hi a dikna chen a awm a. Chutihrualin hmasawnna kan hriat leh kan hmuh tam tak hi chuan mipui nawlpui a la huap zo lo tih erawh zep thu a awm lo. Kum 20 kal taa khawpui leh thingtlang dinhmun inthlauh dan leh tuna kan dinhmun hi a la danglam vak lo.

Mizorama hmasawnna hnathawh/hmalakna tam ber hi chu sorkar hmalakna (investment) a innghat a ni a, private sector hmalakna lia tham a vang hle, a bikin industrial sector ah te hian pvt hmalakna lian tham a tam lo. Sorkarah kan innghah nasat avangin politics tha hmuh tur a tam hle, politics khelhna hmanrua hmuh tur a tam a, party mi nih leh nih lohin awmzia a nei hle reng a nih hi.

Eizawnna pui ber primary sector hi a veiawm hle. Tlangram lo neih hlawk lohzia leh environment-in a tawrh nasa avangin a thlakna tur hi hman atangin sorkar kan hrawn tawhten an ruahman thin a. Mahse, tun hi kan thlen chin a ni a. Kum sawm kal ta chhung khan NLUP hlawhchhamzia kan hmu a, tunah hian SEDP an sawi leh ta a. Hei leh zel pawh hi a hlawhchham leh a nih chuan kut hnathawka eizawng, lo neitute hi khawngaihthlak tur zia hi sawiin a siak lo. Primary sector bikah hian loneih (Agriculture) bik hi chhungkaw tam ber innghahna ni mahse innghahna tlak loh ber a ni hial ang, a hlawk lo e mai. Kan economy a thawh tam ber chu Tertiary sector/service sector hi a la ni reng thung. Sawi tawh ang khan industry lamah hian mi mala hmalakna (private investment) lian tham a awm lem loh thin avangin hmasawnna a sang tak tak thin lo.

Kum khat chhunga kan state sum thawhchhuah ‘GSDP’ leh mimalin kum khat chhunga a thawh chhuah chawhrual ‘Percapita income’ hi a pung a. Sorkar lam leh politician-te pawhin sawi nuam an ti fo thin. Mahse, a punna chhan hi ngaihtuah ngai a ni. Tun hnaiah primary sector hian GSDP-ah a thawh tam chho thar viau a. Kum 2012-13 khan state sum lak luh zawng zawng (GSDP) a primary sector thawh zat chu 18.95% chauh a nih lain nikum hmasa mai 2017-18 khan 29.93% a ni ta dawrh a. Hei a chhan ber chu lo neih lama hmasawnna a thlen vang leh lo neitute thawh chhuah tam vang a ni lo a, Forestry lama sum hmuh tam thut vang a ni. GSDP a forestry in sum a thawh zat hi hemi kum (2017-18) hian 16.23% lai a tling. Primary sector chhunga mi eizawnna dang (agriculture, livestock, fishing leh aquaculture te) thawhchhuah zat percentage chu a tlahniam vek thung.

Thunawi dang han sawi mai mai ila. Tun ministry tharah hian finance changtu leh taxation changtu hi an hrang a. Hei hian harsatna a thlen thei maithei, sorkar laipuiah leh state tam takah chuan ministry khat a nih loh pawhin minister pakhatin a chang dun thin. Mizoram finance commission pakhatna rawtna huam chin kha a zo dawn hnai a. Tun thleng hian Mizoram Finance Commission pahnihna hi din a la ni loin a lang, din tawh loh an tum pawh a ni thei.

Kan state hian sum hnar tha kan nei lo a, hmasawnna ruhrel din belh zel a la ngai a. Chhungkaw tam ber innghahna lo neih leh a kaihhnawiha hmalak a zuzi leh thin a, thalai eizawnna hna mamawh tak tak, hna nei lo an tam em em a. Thil man a pun zel avangin khawsak a harsa chho tial tial a. Zu leh ruihhlo vangin thalai leh nu leh pa tam tak buaipui ngai an awm. Hmasawnna a kairual loh avangin hmun kilkhawr zawka chengte an bet tlawk tlawk a. Heng zawng zawng ngaihtuah hi chuan kan budget hi a hmaa mite nena danglamna sawi tur a vang hle. An sawi uar em em SEDP hi kan enchhin leh phawt a ngai dawn a nih hmel.