Kum 20 kal ta, 1999-a general election-ah khan a vawi khatna atan MNF candidate Pu Vanlalzawma chu Lok Sabha MP thlan tlin a ni a. Pu Zawma hian amah hnaih bertu Pu Rokamlova hi vote 68,659 zetin a hneh a, hetih hun lai thleng hian Mizorama MP inthlan awm tawha inhnehna sang ber nghe nghe.  A hma kum tawp lam (1998) ah MNF leh MPC tangdun sorkar a piang a. Chuvangin, a nihna takah chuan Pu Zawma hi MNF leh MPC tangdun candidate a ni zawk.

	Pu Rokamlova pawh hi party pathum INC, MNF(N) leh MJD tangho candidate a ni bawk. Kum 1999 MP inthlan kha Mizoram inthlan politics chanchin a thil chhiah tlak tak a nihna dang pawh a awm nual. State kan nih hnua party lian pahnih MNF leh INC in an party bil candidate ni lo, party dang nena intawm independent candidate an neih vawi khatna a ni a. Chumai bakah MNF hian (MP atan) politician ni lo, mi hmingtha leh langsar an vawrh chhuah tanna a ni a. Remna ziah hnua MNF candidate (MPC nena an intawm chu a ni tho a) tlin hmasak ber a ni bawk.

	Kar kal ta a MP inthlan zawh fel takah khan kum sawmhnih a liam ta ang deuh thil sawi tur a awm nual. Eptu party lian INC in party mal candidate an siam lo a, independent candidate bawk an thlawp leh. Kum 1999 a an tanrualpui ZNP (khatih laia MNF(N) tih) telna ZPM an tanrualpui leh a. Sorkar thar phur vanglai MNF candidate an hneh lo leh bawk.

	District Council hun lai kha chuan Cachar District nena MP inthlan tawm thin kan ni a. UT kan nih atangin Mizoramin keimahni pual MP kan nei ve ta a. Tun tum khi Mizoram MP tur kan thlan vawi 13-na a ni a, Lok Sabha MP hi mi 7 kan nei tawh a, Pu C.Lalrosanga hi pariatna tur a ni.

	Tun tum MP inthlanah hian a tir atangin MNF candidate Pu C.Lalrosanga leh INC leh ZPM tangdunin an thlawp independent candidate Pu Lalnghinglova Hmar te an inbei tawk viau a. Vote an hmuh dan leh an hmuh zat leh an chakna leh chak lohna bial hrang hrang han en hian an inhneh tawk hle tih a lang. A tling ta zawk Pu C.Lalrosanga hian MLA bial 21 ah vote a hmu sang ber a. Pu Lalnghinglova Hmar hi bial 19-ah vote hmu sang ber a ni bawk. Thlan tlin Pu C.Lalrosanga hian vote 2,24,286 a hmu a, chu chu 44.89% a ni a. Amah hnaih bertu Pu Lalnghinglova hian vote 2,16,146, chu chu 43.26% a hmu thung. Kum 2014 MP inthlanah khan candidate pathum an awm a, INC candidate Pu C.L.Ruala khan vote tla atanga 48.59 hmuin a chakpui a, Pu Robert Romawia khan 47.17% a hmu thung. Tun tumah hian candidate pahnih emaw pathum emaw chauh awm ta se MNF candidate leh tangrual candidate hi an inbei tawk zual maithei a ni.

	MP inthlanah hian vote a tlak that hian rorel lai tan a tha lo tih thin a ni a, he ngaihdan hi a dik a nih chuan tun tumah khan 80% chung lam vote tla ta se, a bikin khawpuiah tla tha zual sela tangrual candidate a tling thei dawn tihna a ni ang. Chutihlaiin, kum sawmhnih kal ta chhung kha han chhui kir ila, MP inthlanah state a sorkar lai party an tling zel a. Rorel lai party an tlin zel chhan ber ni a lang chu chief minister leh minister/MLA rualte an campaign thin vang a ni thei ang. Eptu lam hi MP inthlanah an tih tak takin an tang ngai lo deuhin a hriat thin a, chutihlaiin, sorkar lai erawh an tang chiam thin a, MLA/Minister-ten mahni bial an han thut chilh bawk a. Chutiang a nih avang chuan an tling leh nge nge thin.

	Tun tum MP inthlanah hian a party mal chuan PRISM hian an hlawkpui ber a tih theih. Candidate hriam tak, hawizau leh inzir mi tak an nei a, rin phak bakin mipui ngaihven an hlawh a. Mi tam tak beisei aia tam vote pawh an hmu. MLA inthlanah khan an candidate zawng zawngte vote belhkhawm vote tla atanga 0.20% vel a ni a, tun tum MP inthlanah hian PRISM candidate hian vote tla atanga 2.66% a hmu daih thung, a let sawmin an vote a pung tihna a nih chu.

	MNF hian an hlawkpui a tih theih a, an tuar a tih theih bawk. Aizawl khawpui chhungah MLA a an chakna bialah tangrual candidate an hneh lo fai vek a, district dangah pawh an bial an hloh nual. Lungleiah phei chuan bial thum ngawt an chan a tih theih. Lunglei district-ah hian South Tuipui-ah hian khaw tinah MNF an chak vek thung a ni awm e. District thar piang tur an lawm lawk a ni mai thei. West Tuipuiah hian MNF candidate-in vote a hmu tam ber bawk a, he bial hi tunhma atangin congress party ni lo la chak ngai miah lohna a ni nghe nghe. Chutiang bawkin Thorang bialah pawh MNF an chak nawlh bawk.

	Lawngtlai leh Siaha district-ah MNF-in hma an sawn a tih theih. MLA inthlan a an chak lohnaah an chak vek a, district pahniha bial zawng zawngah chak ber nihna an hauh. MLA inthlana INC chakna bial pahnih leh BJP chakna bial pakhatah MNF candidate-in vote a hmu sang ber. Lunglei piah chhim lamah MNF thli a tleh a tih theih ang. Chutihlaiin, Tuichawng biala tangrual candidate-in vote a hmu tlem lutuk hian mi a barakhaih viau a, MNF candidate-in vote a hmu sang ber hi mi tam takin an sawi zui a. Tuichawng bial hi Chakma tamna bial, tun hma atanga Chakma MLA nei reng thin an ni a. BJP candidate Pu Nirupam Chakma hian vote 10,537 a hmu a, MNF candidate Pu C. Lalrosanga'n vote 12,022 a hmu thung. Hei vang hian MNF candidate hi Chakma vote vanga tling anga sawi an awm a, social media-ah a darh hle. Chutihlaiin, helai biala Chakma pa aia Mizo pain vote a hmu tam hi a lawmawm viau, a vawi khat thlenna a ni hial maithei.

	MLA leh MP inthlan result hi khaikhin dan a inang lo zung anga, ZPM pawh hian an chhiatpui nge an thatpui tih hi ngaihdan a inang lo viau ang. Congress nena an thawh dun chiah khan mi tam takin an sawisel a, an chhungah pawh inlungrual lohna a awm niin an sawi. Mahse, ZPM in MLA an neihna district pathum - Aizawl district, Kolasib district leh Serchhip district-ah te hian an candidate a che tha viau. Aizawl khawpui chhung bial tinah an candidate-in vote a hmu tam ber vek a, Chalfilh bialah pawh vote hmu sang ber a ni bawk. Aizawl district pumah bial hnihah chian MNF an pha lo. Serchhip district-a bial pathumah hian bial pahnihah ZPM candidate-in a hmu sang ber a, chutiang thoin Kolasib-ah pawh bial pathuma pahnihah a hmu sang ber bawk. Chutihlaiin, ZPM candidate bik a ni lo a, congress party nena an intawm a ni tih erawh hria ila.

	ZPM MLA bialah an candidate-in vote a hmuh san ber zel laiin Congress party MLA bialah chuan MNF candidate-in a hmu sang ber zel thung. Chuvangin, party ang chuan Congress leh BJP hian an MLA te bial an hum zo lo a tih theih ang a, a bikin congress party hi an che tha lo ber a tih theih ang. MNF lam pawh hi MLA inthlan zawhah thil langsar tak tak an ti nual tawh a, hna pawh an thawk viau hman. Chuti chung chuan an MLA bial 11-ah tangrual candidate an hneh lo. Chung zingah chuan chief minister bial pawh a tel nghe nghe.

	Nikum MLA inthlana MNF party candidate-te vote hmuh zawng zawng belhkhawm kha vote 2,37,305 a ni a, vote tla zawng zawnga 37.58% a ni a. Tun MP inthlanah hian MNF candidate hian MLA-a an party vote hmuh kha a hmu pha lo a, vote 2,24,286 a hmu a, chu chu vote tla zawng zawnga 44.89% a tling. Hei hian a entir chu Mizorama voter tam tak hi chuan party tan bik nei lem loin vote an thlak a, MLA inthlan a MNF vote-tu tam tak khan MP-ah chuan an vote tawh lo a tih theih ang. ZPM leh INC hi an inkawp avangin an candidate hi ZPM chuti zatin an vote a, congress mi chuti zatin an vote tiin a sawi theih loh. Thil lang chiang tak erawh chu, MP inthlanah hian candidate mi mal an pawimawh hle tih hi a ni. Zep thu a cheng lo, ZPM leh INC hian candidate an nei fuh hle, an party pahnih boruak siam aiin an candidate-in boruak a siam hi a lian zawk hial ang. Vote tla kha tam deuhin 80% chuangte chu tla phei se chu a tling thei hial dawn a nih kha.