MP inthlan a hnai ta, kar tawp lamah hian Mizoram aiawha Lok Sabha member tur kan thlang dawn. Mizoram pum hi MP bial pakhat mai kan nih avangin kan MP lo ni tawhte pawh kha ram leh hnam tana kawngro su tham lo tura ngaihna kan nei thin a. Kan political party-te lah hian MP viak tha, parliament-a thu leh hla nei ngam tur leh vaiho kara kan ram tana au chhuak ngam tur, politician viak tha leh vengva deuh an vawrh chhuak ngai meuh lo a. Tling thei tura an rin leh politics-a an tangkaipui tur ngaihtuah chungin candidate an siam thin ni berin a lang.
Tun tum MP kan inthlang tur chu, candidate-te an hriam tlang a, an hawi harh bawk a, mipui pawhin kan ngaihven viau niin a lang a. Zep thu a cheng lo, a bikin PRISM party candidate Pu T.B.C Lalvenchhunga leh independent a ding Pu Lalnghinglova Hmar leh Pu Lalhriatrenga Chhangte te hi thalaite tuipui zawnga thusawi thiam tak an nih bakah an hawizau a, an hre zau bawk a. M.P. pawimawh zia leh an thawhhlawk theih tur zia mipui an hriattir a, MP ni mekte leh lo ni tawhte an sitawm thei rum rum hial a ni. Chutiang bawkin MNF candidate Pu C.Lalrosanga pawh sorkar laipui a lut thuk tak mai, a tawn hriat vang ringawt pawha iaiawm lo tak mai a lo ni leh zel a. Tunlaia Mizote tana thil pawimawh tak tak te an zir chiang tlang bawk a, an campaign thu leh hla a ngaihnawm thin hle.
Anni a thawm nei lian zual pali hi politician hlun an ni lem lo bawk a, neutral angin an inngai emaw tih mai turin anmahni thlawptu party mitmei an veng lem lo fo thin. Engpawhnise, campaign an tanna a la rei lo viau na a, media a chak tawh avangin candidate-te thu leh hlain ram pum a fan chhuak hle tawh a tih theih ang. Tun hma anga zan lama mipui kohkhawm a hall leh khawlaia campaign chiam kha a awm tawh ngai lo a. Zing leh chhun lama an campaign pawhin kawngpui dung remchangah mipui kohkhawm lawk awm teh chiam loin candidate-ten thu an sawi mai a. An thusawite leh interview te chu social media lamah zau takin an vawrh darh zui a. Kan inthlan campaign dan hi a changkang tawh khawp mai. Sawi tawh angin candidate thawm lian zual pali te phei hi chu an thu leh hla, an hmalak dan tur leh an rintlak dawn leh dawn loh te thlengin kan hre thaw khat viau tawh ang.
Lok Sabha MP inthlan hi vote a tla tha lo tlangpui thin a. A chhan sawi tur a awm nual anga, sawi tawh angin MP tangkaina kan hriat tawk loh vang te, candidate-ten an zir loh vang te, party-ten MP atana tha tur ngaihtuah lo a, tling thei tur leh an party tana tha tur chauh an vawrh thin vang te a ni thei ang. Kum 1996 MP inthlanah khan vote tla zat kha 73.41% a ni a, kha kha a tlak that ber tum a ni awm e. Chumi hnuah chuan za zela 70 a tla tling tawh ngai lo. Inthlan hnuhnung ber 2014 khan 61.69 % a tla a, a hma leh kum 2009 inthlan phei kha chuan vote 51.80% chauh a tla a nih kha.
Kum 2009 MP inthlan leh tun tum hi a inanna lai a awm a. A hma lawkah (2008 kum tawpah) MLA kan inthlang a, rorel lai MNF an tla a, hneh takin Congress party an tling a. Chumi hnu lawk (2009 a) MP inthlanah pawh khan Congress candidate hneh takin a tling a, eptu party MNF, MPC leh MDF tangrualte candidate khan vote nuai khat chuangin a pha lo a nih kha. Khami tum khan eptu party-te hi tangrual mahse an thawm a lian hleithei lo hle a, a bik takin MNF party phei chuan MLA inthlana an tla na lutuk kha an tuar ni berin a lang, an che chang hleithei lo a nih kha.
Inthlanah hian chhiarkawp dan angin a kal ngai lo tih chu kum 2014 inthlanah khan a chiang viau bawk. Eptu party zawng zawng tangrualin an thlawp Pu Robert Romawia kha a thawm a tha viau a. A hma lawk MLA inthlana eptu lam vote kha a hui vek chuan hneh taka tling tura ngaih a ni a. Mahse, rorel lai candidate MP ni sa, thawm zawi tak kha a tling leh ta tho a nih kha.
Chutiang chu inthlan hmasa lama thil awm dan chu a ni a, kan inthlan dan han en chuan rorel lai party candidate hi tling chiang sa tura ngaih a ni. Mahse, mipui nawlpui hian politics hi kan atchilh bur ta lo viau mai a, a bikin khawpui deuh chin a chengte phei chuan party lam thlir vak loin an duh zawng an vote mai niin a lang. Chuvangin, tuna MP candidate-te pawh hi Aizawl leh khawpui lian deuha an dinhmun tur hi hriatthiam a har viau. ZPM leh INC tangrual candidate hi mi tam takin an hmelhriat sa, thalai zinga langsar pawl tak a ni sa a. Mipuiin an bawh huk thei. Hnehna sang vak lo a a tling a nih pawhin a mak lo ang.
Chutihrualin, ZPM leh INC thawhdunna hi a tir atangin a fuh lo hle tih a lang reng mai. Nikum lama ZPM tana phur taka campaign thin mi langsar tak tak te, pa rawnkai tling thah rual press conference ko thin te, TV leh chanchinbu lama an hmel kan hmuh thin te kha thehmeh ang maiin an reh diak mai. Hetia pawn lam atanga lo thlir mai maiah phei chuan MPC lam hi an reh zual hle a tih theih. An candidate tana press mite kokhawm thin te hi congress party lam an tam ber a, ZNP president hian thu leh hla a nei fo bawk. Anniho hian an candidate tan hian theihtawp chhuah se la chuan mipui an al hneh zual viauin a rinawm. An chak zo ta lo viau a nih chuan candidate an neih that loh vang ni loin an thawhhona a khi nasa hle tihna a ni mai thei.
MNF hian candidate thawm na zawk, thalai viak tha zawk an nei lo a, an boruak a lian tawk lo viau. Mi nem, thawm na lo, politics buaipui ngai lo tih a hriat a, a thusawi tam takah hian an party aiin ama ngaihdan leh mipui sukthlek zawng a dah pawimawh tih a lang bawk. Politician a ni lo bawk a, a awm viau tho. Rorel lai party hian hmanni lawk a Budget session kha an hmang tangkai viau. Zu khapna bill an pass a, district thar pathum a hman tur sum an dah a, CAB chungchang official resolution an siam a, ram dang mi thliar hranna tur bill an pass bawk. Chumai a ni lo a, full budget an pharh duh lo a, SEDP leh thil danga chirh thehna tur a la vang viau. Chutiang karah chuan an MLA leh minister rual 26-ten an bial theuh an vil a, chak lo bik bial nih hlau takin ruling power nen an che mek a. Politics chhiarkawp atang chuan ruling nih leh MP a tlin hi inzul viau lehnghal. Mahse, lung muang ngawt thei erawh an ni lo ang, an khingpuite hi an nep lo viau.
PRISM hi, zep thu a cheng lo, zero deuhthaw atanga bul tan an ni a. Anni hi candidate nei fuh ber an ni mai awm e. thalai kum 40 hnuai, hawi zau leh dai zau, politics leh society ngaihven tak leh hre tak a ni tih a hriat a. A inchhiar zau a, a zir peih bawk a, a ngaihna a hria a, a thusawi a chiang bawk a, TV, Social & Electronic media a tangkaipui hle. Ani kher hi candidate lo se tun inthlanah hian PRISM party hi an lang pha lo ang. Mahse, tunah hian PRISM leh an candidate hian ngaihventu sing tel fe an neih belh mek a. Heng mite hian an vote a nih phei chuan an party hmalam hun a eng chho thei dawnin a lang. ZPM beltu tam tak khan an hmu tai mek ni pawhin a lang. Chu chu anmahni vote-tu a an siam thiam dan azirin an hma a eng ang.