Hmanni lawk khan kan thian pakhatin, “Mizoram tana MP tangkai dan hi rawn ziak teh a,” a tia. Kei lah chuan fiamthuin, “MP-te tangkai lohzia hi ziah a chakawm zawk asin,” ka ti nghal zat a. Ka fiamthu mai mai chu a ni na a, han ngaihtuah chian chuan tunhma atangin Lok Sabha leh Rajya Sabha-a kan MP-te hian thil lian tham tak an nawr chhuah leh an sut kuak sawi tur hi awm nual mahse, a la tam lo khawp mai. Mipui pawh hian an Area Develoment Fund (MP Fund) hmanga an tih bak hi hnathawh dang nei thei vak lo turah kan ngai deuh ni pawhin a lang. Kan ram tana tha tur leh kan hnam tana pawimawh tur thil parliament-a sawi chhuak ve tur pawh hian kan beisei ngai lem lo a, an lakah hian beisei teh vak hi kan nei lo a ni ber awm asin.
State tê kan ni a, senior tak tak an tam a, keini ang MP pakhat lek nei tan thusawina hun chan a har, tihte hi an sawi kan hre fo a. Vaiho zinga zum taka zuk thu ve mai mai turah an inngaih vang pawh a ni mai thei. Mizoram mipui maktaduai chuang aiawh an nih avangin zumzuk lutuk bik lo se, engkim inchuh a innek buai thin vaiho zingah hian thil tam tak hi an chuh ve ngam a ngai ang. MP junior zingah hian viak tha tak tak an tam khawp. Tuna Lok Sabha kal mek hi Lok Sabha 16-na a ni a, May thla tawp lamah hian a hun a tawp dawn a. Tun Lok Sabha-ah hian session a sawihona (debate) a tel tam ber mi pangte hi MP vawi khat tlinna an ni vek. Chumai a ni lo a, zawhna zawt tam zingah pawh MP vawi khatna an awm fur mai. Chuvangin, thawmna ve deuh thlang tling ila chuan an ding ve fo ang a, Mizoram chungchang pawh an auchhuahpui ve thin ngeiin a rinawm.
MP-te Performance hi Lok Sabha website-ah leh site dangah pawh chhiar tur leh hmuh tur a awm nual. An tarlan dan chuan kan Lok Sabha MP hi thawm nei lo pawl tak a ni. PRS Legislative data atanga a lan dan chuan 16 Lok Sabha ah hian chawhrualin MP pakhat Private member bill 2.3 vel pu lut ang an ni a. An vaia chawhrual zat pu lut lo Congress MP zingah 34 an awm a, chung zingah chuan private bill pu lut lo hrim 28 zingah Pu CL Ruala hi a tel a, an hruaitu lu Sonia Gandhi leh Rahul Gandhi te pawh an tel bawk.
Rorelna in (assembly & parliament)-ah hian member-ten zawhna an zawt thin a, an bial tana tul leh pawimawh te, sorkar hmalakna chungchangte leh thil dang zawhna hun remchang a ni a. Mizoram Assembly-ah pawh hian MLA chak deuh chuan zawhna an zawt peih a, zawh belh tur pawh an hria a. Ram hruaitu tha tehna atan pawh hei hi a pawimawh viau a ni. Chutiang bawkin zawhna zawh dan hi MP chak leh chak lo (active leh active lo) tehna pawh a ni. Lok Sabha 16-naah (2014-2019 chhung) hian chawhrualin MP pakhatin zawhna 293 zawt ang an ni a. Kan MP hi chuan zawhna 4 chiah, ziaka chhan chi vek a zawt. Chutihlaiin, attendance tha berte zingah a tel thung, national average 80% a nih laiin Pu C.L. Ruala attendance hi chu 91% a ni thung.
Parliament-a sawiho leh inhnial (debate)-a MP-te tel dan pawh hi record a awm vek a. Inhnialna/sawihona (debate) a tel ve hi MP mawhphurhna pawimawh tak a ni a, sorkar khalh ngilna hmanraw tha tak a ni bawk. Kan state assembly-ah pawh MLA tha leh tha lo kan tehna langsar tak chu debate-a an thawhhlawk leh hlawk loh hi a ni fo a. Tun Lok sabha term chhung hian chawhrualin MP pakhat zel hian debate vawi 67.1 a sawi ve ang an ni a. Kan MP hi vawi hnih a tel ve nghe nghe.
MP-te hi committee peng hrang hrangah an tel a, telna nei lo pawh an awm a. Tuna kan MP pawh hi committee on agriculture-ah a tel nghe nghe. Heng parliamentary committee standing committee, department related-standing committee vela tel hi mahni bial tan a tangkai thei viau a. Keini phei chu kan state pumpui hi MP bial pakhat a ni lehnghal a, tangkaipui theih tak tur kan ni zual awm e. Kan MP thar tur pawh hi hetiang committee penga a tel hlauh chuan Mizoram tan thil langsar tak an tih ngei a beisei theih awm e.
MP te hian an tum tak tak chuan an ‘area development fund’ (MP fund) kum tin Cheng vaibelchhe 5 an hman theih atang ngawt pawh hian hna langsar tak an thawk thei. MP tam tak chuan an fund hi kawngpui siamna atan te, damdawi in tihchangtlunna atan te, zirna leh infiamna lam tihhmasawnna atante an hmang thin a. Kum khata an hman zawh loh pawhin an dah tha a, a kum leh lamah a hman theih a. Kum nga chhungin Cheng vaibelchhe 25 an hmang thei tihna a ni a. Ruahmanna tha tak siam a, mumal taka hman chuan thil ropui tak a tih theih ang.
MP te hi India ram roreltute an ni a, an dinhmun hi a sang hle. MP viak tha, vaiho hmaa tlangtla thei tur, Mizoram tana hmala ngam leh a ngaihna hria, thil sukaw thei tur chi nei ila chuan kan ram dinhmun pawh hi a dang zak mai awm mang e, a tih thei. State sorkar hmalakna nen insubuai loin MP-te hian an bial (Mizoram pum pui) tan hmasawnna hna a thawh hi an tih tur a ni. Entirnan, kan rama kawngpui thenkhat sorkar laipui hnuaia enkawlte hi MP-in han vil se, kawngpui tha zawk siamna tur te nawrin, a tul angin hmala se kawng tha kan nei thlur sung mai thei. Ramri nei (Bangladesh leh Burma nena inri) kan ni a, hei pawh hman tangkai thiam chuan kan ram hmasawnna tur thil eng eng emaw nawr chhuah theihna tur a ni.
India sorkarin thangkhat lian zel a lo kalpui tawh Look east policy/Act east policy pawh hi kan aiawh hruaitute hriatpui lem loa Delhi tlang atanga an ruahman a, an kalpui mai niin a lang a. Hetiang ang chi kan ram hrut tel zawnga sorkar laipui hmalakna lian thamah te hian kan ram tana lo sawh thlak ve tur dap zung zung thei tur, a ngaihna hria MP neih a chakawm. Chutiang bawkin, sorkar laipui hian India ram pum hrut rual zawnga ruahmanna (development/welfare policy) siam an ching viau a. Thenkhat hi chu Mizote tan leh hmarchhak biala chengte tana remchang vak lo te a ni fo. Kan hnam zia leh kan khawtlang nunphung mil zawnga her rem ngai hi a awm fo thin. Chutiang huna Delhi tlanga Mizote zia leh nunphung, kan sakhua zu sawifiah thei tur, kan hnam aiawh zo MP neih a ngai ta hle a ni.
Thil ropui tak ti thinte hi mi pakhat an ni tlangpui a, ram hruaitu ropui tak takte pawh hi mahnia thutlukna siam a, mahni a ding ngam thin an ni chawk. Thil ropui takte hi a bultumtu chu mi pakhat an ni thin. Mizoram aiawh MP pakhat kan thlan tur pawh hi mahnia insukaw thei tur, a hmaa mite aia hriam leh hrat, tumruh leh taima, a tul huna thurualpui siam thiam ni thei se. An thusawi dan leh an campaign auhla atang hian an laka kan beisei pawh a sang viau dawn a. Kan ram leh hnam himna, kan sakhaw humhimna atana tang ral raih ngam, ram hmasawnna tura mahni chauh pawha beihpui thlak thei tur MP neih kan duh khawp mai.