Kan naupan lai khan Zoram khua ah te khan di in a la ni ber a, rangva in nei kha chu Khawkhatpa awm thei an ni thin. Fu her khawl leh Buhher khawl nei te phei kha chuan an bangah tile an hmang pha a, tukverh darthlalang vuah an nei a, rangva tuizem an nei bawk a, bawngpuisawrlai an neih tel ngat phei chuan kan ngaisang zual em em em thin kha a nia. In dang zawng zawng tih theih kha chu a chung di a bang leh chhuat dap hmang a in sak kha a nia. Khang inchung di hmawr buk chhum maiah khan VAMUR te an thlawk lutin an thlawk chhuakcham chi a. 

Khang di hmawrah te khan riahrun remin bu an chhep thin. Khang Vamur te kha dum nil nel thla zum sei tak nei, mei tawite leh hmui tawite nei an ni a, naupang ninhlei zualkhan mau tlawn leh phelsep ten an hawlh a, an hlimpui viau laiin Upa te khan "E khaih khaih! kha tin Vamur Bu an sawisa ngailo, thlipui a tleh duh a nia," te an ti a. A duhthawh zual khan "ininchung thlipuiin a la daih mai ang," ti te pawh an awm thin a nih kha. Khang laia naupangkuthlei zia leh nungcha te an khawih phak kha chu perh/vuak leh vawm zel mai kan ni chung khan Vamur kha chu zalen ang reng takin kan chenna in kha min tawmpui ve theih phah na tepawh a ni fahmiang.

Vamur kan tih te hi chi hrang hrang an awm a; Murfang, Murpui, Lengder, leh Pengleng khang hunlaia Vamur kan tih dum hlang, te tak te, inchung di hmawra bu rawn nei, kan chenpui thin te kha Murfang kan tih te hi an ni a, Vamur chi dang ho hi chu ramhnuai kham kar sang tak takbawma bu nei an ni thin. Kan ram Vamur chi a lian ber Pengleng hi sava chi a thlawk chak berkan tih an ni a, vana thlawk kan hmuha 'peng' kan tih zawha 'leng' kan tih hian "hmuh phak lohah mual a liam hman" kan ti thin a nih kha. Kum sawmnga dawn liam ta atang khan Vamur te kha an bo ta vek a, ramhnuai kham kara cheng Lengder kan tih te khan an rawn luahlan ta veka nih hi. Tun hmaa Vamur kan tih te kha hmuh tur an awm ta lo, khawiah tak tuan ta ang mawle…

Lengder hi chu a ngum a var a, Vamur aiin an lian a, hmul dum nei angin lang mahse a hmunaen chuan a buang deuh thek a. Bu an neihna Cement bang mihring khawih phak loh ah bu an chhep a, an bu awmna hi an hlat ngailo, thlawkin an leng kual reng a, boruaka leng heng thosi ang te hi thim dawn thlengin an man a, chu chu an chaw ber a ni, thil dang an ei ngailo ni awm a ni. Tui an in lai hmuh mai tur lah hi a vang phian, an bu awmna hnuai zawn hi an ek a awmnual thin a, hei hi an note, a bu pawna rawn inthiar te atanga lo chhuak a ni a, a puitling hi chu thlawk chung hian an inthiar mai niin a lang. Kan in leh a chheh vela Lengder an rawn awm hma hi chuan chawngzawng hi an tam em em a, pangpara tui mi te tan phei chuan an hnawk thin hle a, pot-a lei te hi an thai darh a. Tin, zingkhawvar hnu atang hian an chiar nasa a, mut rei tum deuh zing phei chuan ninawm an tling tak zet. Inchung kil leh ceiling chhunga bu nei an ni a, in an ti tawp a, hrik te tak te an theh darhphei hi chuan an huat thlala duh khawp thin a nia… 

Kan in leh a chhehvel boruaka Lengder an rawn lawi atang hian Chawngzawng hi an reh hmiah a. Tin, thosilen hnawk taka kum tam tak kan zar thin kha kan zar ta ngai lo, Lengder hi kan tan a lo va han tangkai em ka ti ta ni. Kan Pathian hian engpawh mai hi awmze nei vekin a lo siam a lo ni.

Tin, an mize danglam tak nia ka hriat chu Lengder pakhat thi hi a bu tlangah a inkhai a, thlathum chhung zet amaha a ral raih thlenga inkhai thin hian 'thihna hi an ngai urhsun hle a nih dawn hi' te ka ti ta mai mai… Fanghmir te pawh hi tetlai atanga thlir reng thin ka nia, an thian te thi hi hmun khatah thli leh ruah laka him turin an dahkhawm reih thin. Vamur awm hunlaia in-a sazu khawsa thin, inzu kan tih mai sazu dum rin ren, lian lemlo ho te kha an bo vek tawh. Tunah chuan ram sazu kan tih, a dul var, inzu aia lian zawk hlir an awm ta a nih hi. Inah sazu an tam viau chuan sazu var hi in chhungah chhuah la, an tlat tlatin tla sela, an kua ah te luh-chhuahin sazu pangai hi an eizo zung zung mai thin. Tin, Zoram dai leh huan zawng zawng motor kawngtlangdunga Tlangsam, Masi dawn a par vul chuk thin te pawh hian mual min liam zawh san zo ta a nih hi. Khing thu te khi khawvel hetiang lam zir bingna atanga ziak ni lo in, ka dai hriat atanga kam liam a ni e.