Phungkhothang Guite hi kum 1900-ah Sialpu khua Manipur-ah a piang a, kum 1930-ah tuna New Churachanpur - Lamka hi khua atana a sat a, a tirah hian In 7-an awm a ni. An pung chho ve hret hret a, Indopui - Kumpinu leh a lam tang leh japan an indo khan, Kawng pawimawh tak mai, Tiddim road leh Tipaimuk Road te chuan a kaltlang ruah mai a, khaw pawimawh leh hmun pawimawh tak mai a lo ni ta.

Lal- Phungkhothang Guite hian fa pakua a nei a, a upa ber dawttu Thomzapau Guite h/o Niangai a ni a. Ani hi tunlaia Lamka pa lar, Lal hausa G. Thangkhosuan h/o Laldinpuii te pa hi a ni. Pu Phungkhothang hi Lal fing leh a khua leh tuite tana inphal tak, tumah thliar hrang ngai lo a ni. 

Indopui laia sipai, New Churachanpur Lamka bel chiang ho leh khaw khat pa fing deuh te chuan Tuithaphai-a pem an sawi mawiin an sep tan a, a sawi pawh an sawi mawi thiam khawp mai a, Mizoram atangin mi engemawzat an pem chho ta a ni.

'Saikhamakawn' hming put chhan Saikhama pawh Churachanpur-ah hian a pem chho zingah hian a tel. Pu Saikhama hi kum 1920-ah a piang a, kum 1938 velah Saikhakawn Biak-in hmun velah hian a awm thin a, a mah hi mihlim lam kan tih ang hi a ni. Kum 1942-ah Tuithaphai - Churachanpur - Lamka, Manipur-ah a pem chho ta a ni. Japan ral dovin sipai-ah a tang a, kum 1949-ah sipai atangin a bang a ni. Nupui Kholniang a nei a, fa pangnga an nei a ni a, Kum 1994-ah a thi. Amah hi Mizoram mi anih avangin Mizo tawng a hmang thin a, thu pawh Mizo tawngin a ziak vek thin a, A fate erawh chuan Paihte tawng vek an hmang thung a ni.

Kum 1952 hmalam hian New Churachanpur - Lamka-ah Mizoram leh Manipur ram chhung atang pawhin Mizo hnahthlak chi hrang hrang an pem lut hlawm a ni.

North East Khawdungsei atangin Pathian rawngbawltu Pastor Raltawna Colney pawh a pem lut phei a, Kumpinu lam tang leh Japan hote indo hma daih a ni. Pastor Raltawna Colney nupui hi Tawngkungi (Kawlchhuani nu - tiih hi koh dan). Japan hovin chak takin ram an rawn la thla zel a, Burma ram atangin Manipur - Churachanpur pawh an lo thleng ta mai a. Pastor Raltawna Colney te rawngbawl chu Bizang lamah an thang hlanin an rawn thleng a, Pu Rualkhuma palian ngo deuh vuah mai chu Pastor Raltawna Colney te hi chu zawng turin tih a ni a, Japan sipai ho chuan Pu Rualkhuma chu Sap sipai CID anih an ring ta tlat mai a, an man ta a ni.

Tichuan Pastor Raltawna te ho nen mipa 7 te chu an man khawm a, thingah an phuar bet tlat a. Pastor Raltawna Colney chuan an thah hma chuan tawngtai a dil a, a tawngtai zo a men rualin an kaphlum ta a, April 14, 1944-ah Krista avangin a martar ta a ni. Japan ho man ve tho mi pahnih an tlanchhuak a, Pastor Thangzang Haukip leh a thianpa pastor ve tho an ni. Anni hi zualkovin an ruang hi an chhung ten an va hlawm a ni.

Pa ber Pastor Raltawna Colney thih thlenga Isua tana rinawm - chunglam Jerusalem tharah a hawng ta. Pathian-in a nupui fanaute a thlahthlam lo - Malsawmna tinrengin a enkawl zui a ni.

New Churachanpur - Lamka a lut hmsa hi tlem hetiangin - ka tarlang vek lo.
1. Rev Raltawna Colney h/o Tawngkungi (Kawlchhuani Nu)
2. Liankeuvunga 3. Biakhnuna 4. Chhunngenga 5. Lalzama 6. Vanlalenga 7. Hrago-a
8. Sabuta 9. Laibuanga 10. Auva 11. Thankima 12. Sub. Kapthuamna 13. Sub. Thangluaia
14. Sawivela 15. Sawikunga 16. Khuala 17. Zasanga 18. Vankunga 19. Lalhmawlha
20. Chalthianga 21. Chhawngthala 22. Kailova 23. Sub. Ralkapa 24. Thanhawla 25. Sena
26. Kawlluia 27. Nawlli 28. Sub. Hmuia 29. Chalruala 30. Aikhuma 31. Lalhmingliana
32. Lianphunga 33. Bawkduma h/o Damneihi 34. Lalpara Sailo 35. Vawmsata

Ti hian a then azar chauh kan tarlang a ni, heng ho bakah Mizo hote hian Churachanpur hmun tha leh lai lum tha zawng zawng an luah vek a ni.

New Churachanpur - Lamka pawh Lal pakhat mai ni lovin -     
    1. Phungkhothang Guite - Lamka Saltu
    2. Zin hang Lal - Lower Lamka Bazar
    3. Hill Town Lal - Thangzam Gangte

Pu Thangzam hi Pharmacy Compunder hmasa Dawmdawi zuar a ni. Tichuan New Bazar hmun atan a leilet chu a pe a, mi thenkhat In hmun te pawh pek an ni. Tiang chuan New Churachanpur khawpui khian hmasawnna kawng chak takin a lo zawh chho zel a ni.

Awle, New Churachanpur Lamka-ah hian Mizo hnahthlak, mahni hnam tawng hmang engemaw zat an awm, harsatna awm neuh neuh mah se, tute pawh hmasawn tumin tan an la vek a ni.

Tunlai khawvelah chuan Churachanpur phai ruam a kan unaute ho hi nasa takin hma an sawn a ni. An tum a ruh a, an tuarchhel a, an taima a, Mizo hnah-thlak, Kuki, Thado, Paihte, Hmar, Gangte, Vaiphei etc. te khi Central service-ah an inziaktling tam em em mai a, Sipai lam leh Bank lamah te, an lut tam hle mai a ni. Tin, khawvel ramdang pawh an dai dar zau hle mai bawk a, Hlawhtling tak tak pawh an tam hel a ni. 

Manipur state-ah thlamuang taka an awm laiin an beisei loh tak maiin Meitei ho ten kan Mizo hnahthlak kan unaute an huphurh vangin buaina rapthlak tak mai an tuar ta a ni. An In halsakin a then an that - chu chu an unauten an thlavang na takin - Mizoram sawrkar kan CM Pu Zoramthanga kaihhruaina-in All NGO te nen Zoram mipui Kohhran ten kan hauh ta a ni.

A tawp berah : Tlira te Zathangvung te khan Kawnpuih hian Lu an lo phum tawh - mi rama thi-ah an inngai miah lo, Mizoram-a thi-ah an inngai tlat mai a ni. Tin,  Hun sarih Zawlnei, Sawikunga Ralte, Dr. Lalbuatsaiha (Greenwood dintu) pa te ho khan, tunlaia Lamka khawpui leh a chheh vela hun hman mek te hi rinna mitin an an lo thlir ru reng thin ngei ang.