Nilaini khan Union Cabinet chuan ‘National Education Policy, 2020’ chu a pawm ta a, he policy thar hian India rama zirna kalphung chu nasa taka a sawi danglam rin a ni. Tuna National Education Policy kan hman mek hi kum 1986-a siam a ni a, kum 34 hnuah kalphung tharin a thlak dawn ta a ni. Cabinet meeting hian ‘Human Resource Development Ministry’ chu ‘Education Ministry’ tia thlak a rem ti bawk.

New Education Policy, 2020 chu a tlangpuiin i han sawi thuak thuak teh ang:

*NEP, 2020 hnuaiah hian Right to Education Act, 2009-in a huam naupangte chu kum 14 atangin kum 18-ah tihsan a ni a, hei hian naupang sikul-a inziak lut zat Gross Enrolment Ratio (GER) chu nasa taka a tihpun beisei a ni a. Kum 2025-ah chuan GER hi 50% -ah a kai theih beisei a ni a, kum 2030-ah chuan 100% a nih theih beisei a ni.

* New Education Policy, 2020 hnuaiah hian School kalphung chu nasa taka tihdanglam a ni a, 10+2 structure chu nuai bo a ni bawk.

*School structure chu 5+3+3+4 a duan a ni a, a tir kum 5 hi zirna bul tan hun, foundational stage a ni ang. Chu chuan pre-school (kum 3) atang pawl 2 thleng a huam ang. Foundational stage-ah hian naupangte chu zirna pangngai (formal education) pek an ni dawn lo a, a hlimawm zawng leh activity nei tam zawng (play/activity based learning) a zirna kalpui tur a ni. Foundational stage-a hman tur Early Childhood Care and Education for National Curriculum and Pedagogical Framework (NCPFECCE) chu NCERT-in a duang ang.

*Preparatory stage chuan pawl 3 atanga pawl 5 thleng a huam ang. Preparatory stage-ah hian naupangte chu zirna pangngai pek tan an ni ang a, text book pawh holam tete an nei tawh ang. Preparatory stage thleng hian naupangte chu anmahni pianpui tawngin lehkha an zir ang.

*Middle School chuanpawl 6 atanga pawl 8 thleng a huam ang. Middle School-ah hian subject hrang hrang-Science, Mathematics, Social Science, Humanities leh Arts-ah te naupangte hriat thiam theih tawk ang zelin abstract concept lam uar tum a ni ang. Middle School atang hian zirna pangngai bakah eizawnna atana hman theih tur, vocational course hrang hrangte zirtir an ni bawk ang.

* High School (Secondary stage) chuan pawl 9 atanga pawl 12 thleng a huam ang. High School-ah hian zirlaite chuan an zir duh subject an thlang thei tawh ang. High school hi phase hnih- first phase (pawl 9 &10) leh second phase (pawl 11 &12)-a then a ni ang a, pawl 10 leh pawl 12-te chuan Board exam an hmachhawn ang.

*NEP, 2020 hnuaiahhian School Curriculum-a zir tur (content) chu nasa taka paih thawl tum a ni bawk. *School syllabus-ah Curricular leh Extra Curricular chu then hran a ni tawh lo ang a, Science, Mathematics leh Humanities subject bakah Physical Education, Arts leh Vocational crafts te chu School Curriculum-ah telh vek a ni tawh ang.

* NEP, 2020 hnuaiahhian ram chhunga higher education institution te chu enkawltu pakhat, Higher Education Commission (HECI) hnuaiah an awm ang a, hei hian Medical college leh Law college te erawh a huam lo ang. * Research lama hmasawntheih nan National Research Foundation din tum a ni a, MPhil nuai bo tum a ni bawk.

*College leh University-a zir turte tan National Testing Agency chuan common entrance test a buatsaih thin ang.

*UG, PG leh PhD zirnate chu interdisciplinary approach a kalpui a ni ang.

* Under Graduate course chu kum 4 zir tura buatsaih a ni ang a, zirlaite’n duhthlanna zau tak an neih theih nan UG course-ah hian subject tam zawk introduce a ni bawk ang. Tin, zirlaite’n kum laklawhah pawh zirna an chawlhsan thei ang. Chutiang zirlaite chu certificate/diploma certificate pek an ni ang.

* Ram chhung hmun hrang hrangah College leh University tereuh tete awm thluah chu tihtawp tum a ni ang a, College tenau deuhte chu sawikhawma college pakhatah pawh zirlai sangthum chuang awm theihna tura hmalak a ni ang.

* College te chu accreditation status an dinhmun san ang zelin sum leh pai leh inrelbawlna thilah thuneihna zau zawk pek an ni ang.

* Public leh private higher institution te tan inkaihhruaina thuhmun (common norms) hmang a ni ang.