Thing mistiri hna thiam em em mai, a hnathawh chawlhsan tum hnai hi a awm a. Kum rei tak in saa hna a thawh hnuah a chawlh a lo hun ve dawn ta a ni. Hna a thiam em em a, a kuthnu mam tak avang chuan mi hriat pawh a hlawh hle. 

Eizawn nana mistiri hna a thawh tan dawnah khan, contractor lar tak hnuaiah a inziak lut a, intiamkamna pawimawh tak erawh a neih a ngai thung. A intiamna tur chu - a in sak apiang a kuta hna pawimawh ber pek anga ngaiin a thawk thin tur a ni. Hemi bakah hian ngaihtuahna sengin inpekna nen ngunthluk leh uluk thei ang berin hna a thawk tur a ni. 

A hna atanga chawlh a lo hun chuan, a pu hnena kala a ruahmannate hrilh a rilruk a. “Ka in sak zawh chiah kha ka hna hnuhnung ber ni se, chawlh hlen ka duh ve tawh a ni,” tiin a pu chu a hrilh a. 

A pu chuan, “Kan company min chawlhsan tawh tura rilru i siam chu i uiawm dawn hle mai. A tawp nan tak tak ngen duh che ka nei.”

“Ka pu, khawngaihin eng nge ka tihsak theih ang che min hrilh rawh.”

“In pakhat chiah min sak sak leh la; tichuan, i chawl hlen tawh dawn nia.”

Chu mistiri, a pu zah thiam tak chuan lawm taka pawmin in thar sak hna chu a tan leh zui nghal thuai a. Mahse, a hma lama a in sak thin ang lo takin, a theihna leh thiamna zawng zawng tun tumah hian a hmang lo va. A rang thei ang bera sak zawh tumin hna awlsam dan kawng apiang a zawh a. A chhan pawh chawlh hlen thuai thuai a, a rang thei ang a thil danga rilru sen zui vat vat a duh a ni. A hmanhmawh em avangin a ti deuh puat puat a, hmanraw tha pawh hmang lovin sak zawh thuai thuai ngawt a rilruah a awm a ni. 

Kar rei lote chhungin a sa zo ta thuai a. A pu kovin a in sak thar chu enpui turin a sawm a. 

A pu chu a hlimin a lawm em em a. Mistiri hnenah chuan hlim takin, “Ka ngenna min ngaih pawimawhsak avangin i chungah ka lawm em em a ni.” 

A pu chuan mistiri hnenah chuan lehkha thenkhat leh kawngkhar hawnna chahbi a pe a, “Hengte hi i ta tur a ni, kum kha leh chen rinawm leh taima taka hna i thawh avanga i chunga lawmthu sawi nan leh ngaihhrui nan che, i in sak thar hi ka pe che a ni,” a ti a. 

Mistiri chu a phu zawk a. A in sak zawh hlim hlawt chu a ta tur a nih rin har a ti hle. Hre lawk ni sela a theihna leh thiamna zawng zawng nen a sa tur! 

Mahni thutiama din ngheh leh hlen chhuah hi i tih tur a ni. Mistiri hian a thutiam a bawhchhia a, a pu laka a thutiam leh ama chunga a tiam, a theihna leh thiamna zawng zawng nen hna a thawk ang, tih pawh chu a hlen lo a ni. Chuvang chuan, ama in tur ngeiah a theihna leh thiamna a hmang ta lo a ni. A thutiam a hlen loh avangin a hnathawh chhunga a insak chhiat berah a chen a ngaih phah ta a ni.