Mi pangngai chuan hmeltha tih zawng te, duh zawng te, ngainat zawng te kan nei vek mai. Duh zawng leh ngainat zawng neih hi sual a ni lo a, mihring ziaa bet a ni. Ngaihzawng/tha tih zawng neih nachang kan hriat hian mi pangngai kan ni tihna a ni zawk. Chutih rualin, ‘mihring ziaa bet, sual a ni lo’ tih vanga ngaihzawng ringawt buaipui te, zirlai tih chhiat phah khawpa ngaihzawng lak nat te hi thil atthlak tak a ni. Tleirawl lai atanga star nei thei deuh, ngaihzawng nei kur zut mai te hian nupui pasal tha tak an nei mawh khawp a sin.

Tum khat chu Revival speaker pakhat hian veng pakhatah hian tleirawl pual lang camp a buatsaih a, counselling class ah chuan hmeichhe tleirawl te chuan Speaker chu an duh zawng apiang an zawt sep sep a, an zawhna tam zawk chu ngaihzawng chungchang a ni. ‘Ngaihzawng neih hi sual a ni em? Ngaihzawng nei chungin a pianthar theih tho em?’ tih ang reng te an zawt a, speaker chuan dawhthei takin a thiam ang tawkin a chhang zel a. Tleirawl pakhat chuan, ‘In kiss hi sual a ni em?’ a rawn ti leh ta kauh a. Chutah speaker chuan a ning ta deuh a, “Ka beng ang che u. Enga ti nge ngaihzawng chungchang ringawt in zawh a, ngaihzawng ringawt in buaipui ni? Ngaihzawng buaipui rual pawh in la ni lo. In nu leh pa te’n an zirtir ngai lo che u em ni?” a ti ta hrep mai a, ti tha ka ti ngawt mai. Ngaihzawng chungchang hi chhungkuaa inzirtir ngai tak a ni.

Tin, ngaihzawng hmasa ber (first love) nupui pasala nei chat hi an tam lo mai thei. Kan lengzem hla tam takah hian ‘Sam ang then, lunglai her, lem ang der’ tih ang reng hi a in bahra ngul zem chuat mai a, inthenna lam hla hi a tam em em mai a ni. Lengzem hla tam zawk hi ngaihzawng te then vanga lungleng rilru nain an phuah a nih a rinawm. Tleirawl laia kan ngaihzawng, tunlai tawng takin kan ‘star’ deuh te hi kan nupui pasal tur te an ni ngawt lo. Chuvangin, kan star deuh emaw min star tu apiang nupui pasal tur ang riaka cheibawl chiam mai hi a tha lo a, thil fin thlak a ni hek lo. Kan bialnu bialpa te nen hian eng vang pawhin kan la inthen leh thei a, anni aia duh zawk leh hmangaih zawk pawh kan la nei thei. Inthen thulah pawh mi dangin min iai phah rawih na tur khawpa ngaihzawng te nena inchul nel leh taksa inphalral lutuk hi thil tha a ni lo a,  puithiam hmaah ‘Tiam tlat e’ kan tih hma chu eng pawh a la thleng thei a, kan la inthen leh thei tih kan hriat fo a tha khawp mai.

Mi thenkhat inngaizawng chu an inngaizawng leh lutuk a, an bual awm pawh inthlahrun awm khawpin an mi dip a na thin. Inngaihzawn lai atangin vahrit nupa ang maiin khawi kipah an in zui a, fellowship naah te, hnatlannaah leh khawhar inah te nen lam an in zui awl lo a, tlang hriatin an inngaizawng thin. Enge maw thulah an inthen lehin he’ng mite hi mi dangin an iai tawh thin a, an phu tawk aia hniam nupui pasalah an neih phah fo thin. Ngaihzawng lak nat luat avanga nih tur ang ni zo lo te, zirnaa tih chhiat phah ta te, mahni nun tihchhiat phah te hi an awm nawk a, fimkhur a tha khawp mai. Tin, inngaihzawn laia romantic tak, khawi kipah pawh in zui chawt, in care em em mai te hi an han innei ta cheng a, thenkhat chu an romantic zui lo khawp mai. An in vin khur khur a, kum hnih khat lekah an in then leh mai thin. Chuvangin, inngaihzawn laia romantic chiam ai chuan inneih hnu hian romantic zawk ila, in care tulh tulh ila a fuh daih zawk.

Tin, kan fate hi an la rawn thang lian ang a, mi an an chuan duh zawng te an la rawn nei ang a, ngaihzawng te pawh an la rawn nei ang. Inngaihzawn laia inzui dan tawk leh inkawm dan tawk te, tlang thang khawpa inngaihzawn kher a tul loh dan te pawh hrilh fo a tha khawp mai. Kawppui zawn kawngah pawh thil dang zawng aia nungchang en hmasak a pawimawh thu te kan hrilh fo thin tur a ni. Tlangval pakhat chuan nula hmeltha tak, pian nalh tak, sawrkar hna thawk a ngaizawng a, a duh viau mai bawk a. Nula pawh chuan a iai bik lo a. Amaherawhchu, nula chuan tlangval chu duhlohna deuh pakhat a nei a, zu a in ngai tlat lo a ni. Nula chuan tlangval zu in ve zeuh zeuh a duh mauh mai si a, tlangval lah chu nungchang tha pangngai tak, school zirtirtu, zu leh ruihtheihthil engmah ti ngai lo a ni bawk si a, an inthathen ta tawp mai a ni. Nula chuan a duhthusam ang ngeiin tlangval zu in zeuh zeuh thin pasalah a nei ta a, ti fuh zel tak maw? A tlangval hnawl tak erawh chuan nupui dang neiin chhungkaw tha tak a din ta a ni. Kha nula khan nupui pasal zawn kawngah a nu leh pate hnen atangin zirtirna tha a dawng ngai lo a ni ngei ang.

Ngaihzawng neih kawnga rilru put hmang dik te, tunlai tawng takin in break a tul thut pawha lak nat loh te, ngaihzawng neih hi hringnun peng pakhat ve mai a nih dan te, rilru zawng zawng leh ngaihtuahna zawng zawng pek na chi a nih loh dan te, thianghlim tak leh kohhran sadai thiat loh zawnga inngaihhzawn dan te, nupui pasal zawn dan dik te hi chhungkuaah kan inzirtir fo a tha hle mai. Tunlaiah chuan nu leh pate hlei hlei hi kan rilru put hmang hi a tisa a, kan fate nupui pasal atan pawh nungchang aiin chhungkaw khawsak tha, hausa in leh lo ngelnghet nei hi kan en ta zawk mah. Nu leh pain an boral san ruala ngaihtuah awm tak kan ni ta fur mai.