Tlàwmngaihna chuan châk záwng zawng zawng a zawng ngai lo a, a ûm ngai hek lo. “Mi dang tán” tiin, mahni nun thàpin a che chhuak zâwk thìn.

Tomir thla, ni 28, 2024, Thawhlehni kha Zofate tán chuan, a duhawm lo záwnga kan hriat reng tawh tùr, “Ni Lungchhiatthlâk!” a ni tawh ang!

Cyclone Remal kaihhnawih thli leh ruah lo thawkin Mizoram hmun hrang hrangah chhiatna a thlen a; mi 34 (hnam dang mi pariat telin) laiin nunna  an chán a nih kha! He thu ziah a nih lai thleng hian ruang hmuh zawh loh mi pali an la awm.

Thli tlehin in eng emaw zât a nuai chhia a; a thente phei chu lei minin a hnâwl bo tawp! He khuarèl chhiatna thleng hian chhúngkaw tih mang thak pawh a nei a; kawng leh ko nasa takin a min a; inkalpawhna leh inbiakpawhna a ti chhia a; khaw kár kawng thenkhat phei chu, min satliah pawh ni loin a bunin a bung hmawk mai! Thlànmual chungah takngial pawh zahngaih chhuah zu tum loa maw le!

Tûk lungchhiatthlâk

May ni 28, 2024: Thawhlehni tûk a ni a. A hma Thawhtanni niléng leh zankhuain ruah a súr tawh a; hemi tûk pawh hian a la hàn duh chuang lo. Mizoram hmun thenkhatah chuan thlí nèn a thawk a; hmun thenkhatah chuan ruah chu a baw hawk hawk a ni ber. Chutianga a thawh chiam lohna hmunah pawh, han a tum bîk chuang lo a, a tla reng tho. Chu ruah súr leh thli tleh chu, mi tam tak tána tahna thlentu a ni dáwn tih hre map lo leh ngaihtuah miah loa mahni khum luma tui taka mu chiah chiah leh ni thar hmu min hmuhtírtu hnèna làwm thu sawi pawh kan awm ang.

Khua a lo vár a—duai leh nguai zetin—lú min sùnpui tum ni àwm fahranin. Mi tam tak, khum atanga zíng tho chhuaka phone ente chuan Mizoramin chhiatna râpthlâk tak kan tâwk mék a ni tih kan hre thuai a. Mang a ang ru tan!

WhatsApp leh Facebook lamah chanchin duhawm lo a inrîk chhâwk zut a. Thingpui thlum khiat ri hruih hruih pahin kan “E he!” sup sup hlawm a. Social media lama thu thar post chhiartute tán chuan, han khîk vur vurna tùr a váng duh khawp mai!

Khami tûk kha chuan, hmun him china awmte pawh kan hlim thei lo a! A tho hma leh phone en hma apiangin chanchin râpthlâk kan hre hma a ni mai. Thenkhain mut hmun atangin thli leh ruah avànga chhiatna tuar mékte kan lo tawrhpui a; thenkhatin daikal in atangin social media lama thu thar kan ngaihven a; chokaa ei rawng báwl mékte pawh, an chawhmeh chhuan lai ngaihsak hlei thei loin he chhiatna thleng hian an rilru a chawk buai zo vek a nih kha!

A hmun va thleng hmasate leh, lei minin in a hnâwl lai hmutute tán chuan, ‘Chhantlâk kan la awm e …’ tia nutling au rawng rawng ri te kha, hriat a va han hrehawm dáwn tehlul êm! Eng mah tih theih an nei dáwn si lo a! Kei chu, khatiang “thlírtu” nih ringawt pawh kha, “a tuartu” nih ka hreh tluk thuakin ka hreh! Ni e, hlim taka chhúngkaw chènna in leh a chhúnga chëng , khatia lei minin a’n hnâwl thla rum rum mai, hmun him lam atanga lo thlírtu nih emaw, lo hmu pha vetu nih emaw ringawt pawh kha, thil thlanawm tak a ni hauh lo ang a; a thlírtute tán pawh, “en nawm leh hmuhnawm” a ni thei ngai lo ang!

Rilruah zawhna a rawn lût zut zut a; a chhànna tùr ni àwm tak, hriat châkawm loh pui pui nèn.  Lei minin a chhilh, chhuah ngaihna awm tawh si loa tángte kha, khâng nausén leh naupang te kha … a! puitlingte pawh kha, “Engtin nge an hun tàwp dáwn tak takah an awm ang le?” tih ang zawhna te ngat phei chu, rilru ringawt pawh hian a chháng ngam lo a ni e!

Lei minin a hnâwl tâk mi thenkhatte kha, a hma zàn an mut dáwna Pathian vènhimna díla an tawngtai lai khán, an tawngtaina hnuhnung ber tùr a ni dáwn tih rëng an inhre àwm si lo a! “Mang tha mut tui aw,” tia duhsakna an hlante kha, duhsakna an hlan hnuhnung ber tùr a ni tih pawh an hre hek lo ang. Amah Tluangte Hnamte iangin, ‘… lo hria ni se la chuan, kha aia sei zâwk, uar zâwk leh ril zâwkin biahthu an hlàn kúr luai tùr a ni a!’

Mi tam zâwk chuan, Thawhtan niléng leh zànkhuaa ruah súr khân, a tûkah, khati êm êma râpthlâkin chhiatna a thlen ang tih kan ring pha lo ang. Mahse, mi náwlpui kan mut tui lai takin a rawn thawk ta huk mai si kha a ni a; tu nge maw inring hman ang le?

Mihring rohlu “nunna” an chán!

Chhiatna thlen dàn leh Mizoramin kan tawrh nasatzia chu chanchinbu leh social media atang ten kan hre vek tawh ang a. Mahse, ziaka dah that ve kher ka duh avàngin, ka’n dah ve ang e (Tih dik tâwk loh ka nei a nih chuan a dik zâwk min han hrilh dáwn nia).

Mizoram sorkar hnuaia Disaster Management & Rehabilitation (DM&R) department chhinchhiah dàn chuan Cyclone Remal kaihhnawih ruah súr leh thli tleh avàngin Mizoram chhúnga khaw 167-ah chhiatna hi a thleng a. Aizawl District-ah chhiatna thleng a tam ber a; hmun 59-ah chhiatna a thleng. 

• Melthuma lei minin RCC buiding 2, Assam type in 1 leh hnam dang hna thawk awmna bûk pakhat a ti chhia a; hnam dang mi 4 telin mi 16-in nunna an chán. 

• Hlimena lei minin RCC buiding 1, Assam type in 1 leh hnam dang hnathawk awmna bûk pakhat a ti chhia a; hnam dang mi 4 telin mi 9-in chuan nunna an chán. 

• Salem Veng, Aizáwla lei minin Assam type in 1, chhúngkaw member 3 chènna a hnawl a; an boral vek. 

• Lungsei (Samlukhai bul)-a lei minin thlám pakhat a ti chhia a, mi 1-in nunna a chán.

•Falkawna lei minin RCC buiding 1, Semi RCC 1 leh Assam type in 4 hnawl a; mi 9 a hnâwl zíngah mi pahnihin nunna an chán. 

• Aibawk-a lei minin Semi RCC buiding 1 leh Assam type in 4 hnâwlin mi 2 a hnâwl telte chu an thi ve ve. 

• Kelsih-ah lei minin Semi RCC buiding 1 leh Assam type in 1 a hnâwl a, mi 8 a hnâwl tel a zínga mi 1-in nunna a chán.

Mizo dàna ni sarih chhúng ruang zawn a nih hnua an ruang hmuh zawh tâk lohte chu: Melthumah mi 4: Lalthakima (42) S/o Lalhlira (F); Deborah Lallawmawmi (11), D/o R Muanzova; Lalvênhima (8) S/o Lalremtluanga; Ramdinsângi (thla 6) D/o Lalremtluanga te leh Aibâwk mi pakhat: Matthew Lalchhanhima (34) te leh hnam dang pakhat, Hlimen quarry-a thawkte an ni.

Ruang zawn hna hi Aizáwl khawpui leh a chhehvêla YMA Branch hrang hrang, Branch 109 ten a ni inchhâwkin hnatlángin an thawk thìn a. Sorkar lam atangin State Disaster Response Force (SDRF) te, Mizoram Home Guard te, Assam Rifle te leh Quick Response Team (QRT) te pawhin ngawrh takin, a thente phei chu zan riakin an thawk bawk a ni.

June 3, 2024, Thawhtanni khán, a náwlpuia ruang zawn khàrna inkhâwm chu Mêlthum leh Aibâwkah te hman a ni. Hemi hnu, a ni riatna June ni 4, 2024-ah, hnam dang pakhat ruang chu Serlui Lungleng kaiah PHE hnathawkten an chhar a. Hemi ní vëk, tlai lamah, mi tlàwmngai ruang zawn hna chhunzawmten Deborah Lallawmawmi ruang chu, an in slab chim thlang lam kawrah an hmu leh bawk a ni.

He chhiatna thleng hian chènna in leh lo a ti chhia a ni mai lo a, lui lianin a kama khaw hrang hrang tán harsatna namén lo a thlen a. Tlawng lui paw’n a chîm sàn ber tum chhinchhiahna a pèl vai vai a ni. Tlawng kama khawsa chhúngkaw eng emaw zât chu mahni in leh loa riak ngam loin hmun him lamah an insangseng hlawm a. Central YMA hruai­tuten an report dàn chuan, tui lianin a chîm avànga bungraw chhia leh bungrua a len bo tâk hlut záwng chu, chéng vbc. 13 lai a ni (https://zalen.in). 

Hmäna Hlimen quarry chim bawk kha!

Kan ramin hetiang khuarèl chhiatna kan tawh cháng hian, “Mizorama chhiat tawhna râpthlâk ber” tia sawi theih tùr, kum 1992, August 9, Pathianni zíng dár 4-a Hlimen quarry-a lei min râpthlâk tak mai, mi 70-in nunna an chánna kha, rilruah a lo lang nawn leh thìn—ngaihawm hlawl lo mah se!

Kum 32 liamtaa Hlimen quarry chimah khán, Mizo mi 16-in nunna an chán a, an ruang hmuh kim vek a ni. (Tùn tuma chhiat tawhna ai hian Mizo nunna chán an tlém zâwk!) Hnam dang mi 54 thiin mi 31 ruang hmuh an ni a; mi 23 ruang chu hmuh zawh an ni ve ta lo! Hlimen quarry chim thu hi zíng lamah AIR, Aizawl Station-ah puantír nghâl niin BBC pawhin a puang a nih kha.

Quarry chim tûk, khawvàr hlim atangin chhanchhuah hna thawh nghâl a ni a. Hemi zíng dár 7:00 vêlah lung a tlâk leh avàngin insasengna lamah mi 17 zetin hliam an tuar a. Ni sarih chhúng ruang zawn hna thawh a nih hnuah, August 15-ah ruang zawn hna tih tàwp a ni. Hemi ni hi India Independence Day nèn a innan avàngin Aizáwlah chuan intih hlimna lam hawi eng mah programme siam a ni lo.

Hei hi Hlimen Kohhran Upa, Upa Rinngaia Colney-in a lehkhabu, “Zoram Chhiatna Rapthlak Ber Kum 1992 Hlimen Quarry Chim, Mi 70 Thihna”-a a ziah dàn a ni.

Zo Nun-ze-mawi “Tlàwmngaihna” a pár mawi thìn!

Mizo nih nawmna leh thlamuanthlâkna chu Tlàwmngaihna hi a ni. Kan chhiat ber lai hian Mizo Tlawmngaihna ropuizia a lo lang chhuak leh thìn a; engti kawng záwng maha sawi nêp theih a ni ngai lo ang!

Tù mah ruang chhar châkin an hnatláng lo ang a; zêp nâk emaw, ni eng emaw zât leiin a chhilh tawh ruang hmutu nih pawh, thil châkawm tak a ni lo ang! Mahni chhúngte thlàn pawh ni lo, tuihâwkin a hawrh chhuah kuang leh ruang zawn leh zàwn kual te pawh kha, phür taka thawh chi zawng a ni hauh lo ang! Mahse, Tlàwmngaihna chuan châk záwng zawng zawng a zawng ngai lo a, a ûm ngai hek lo. “Mi dang tán” tiin, mahni nun thàpin a che chhuak zâwk thìn.

Vawiin thlenga he Tlàwmngaihna min la kenkawhsak tlattu YMA kan nei te hi a va ropui êm! He hnam hi a awm chhúng chuan, he Tlàwmngaihna hi awm reng se la, a aia nasain pàr chhuang zêl rawh se.